1. Hiswi tivisa kuyini swaku masiku lawa hi hanyaka ka wona i yawugamu?

LOKO kuli leswaku u psaliwe na lembe la 1914 li hundzile, swi vula leswaku u hanye wutomi la wena hinkwalu a “masikwini ya makumu” ka misava leyi yobiha. (2 Tim. 3:1) Swiyendlakalu hinkwaswu leswi Yesu a vuleke leswaku aswita humelela aminkameni ya hina, swoswi swa hetiseka naswona hinkwerhu ka hina haswi twa. Swin’wana swa swona i tinyimpi, ndlala, kutsekatseka ka misava, mavabyi, kuyandza ka wubihi ni kuxanisiwa ka vanhu va Yehovha. (Mat. 24:3, 7-9, 12; Luk. 21:10-12) Xin’wana lexi hixi vonaka hi leswaku mahanyelo ya vanhu namuntlha ma bihile hikuya hileswi mupostola Pawulo aswi profeteke. (Vona kwadru lelinge: “ Leswi Vanhu Vanga Xiswona Namuntlha.”) Hina Timboni ta Yehovha ha tiyiseka hi kuhelela swaku hi hanya “amasikwini ya wugamu”. — Miki. 4:1.

2. Hi swihi swivutiso leswi hi faneleke hi lava tinhlamulu ta swona?

² Leswi i nga khale na lembe la 1914 li hundzile swi vula leswaku hi hanya akuheleni ka “masiku ya makumu”. Leswi misava leyi ya kubiha yinga kusuhi ni kuhela, hi lava kutiva tinhlamulu ta swivutiso swa lisima swa kufana ni leswi: Hi swihi swiyendlakalo leswingata humelela akuheleni ka “masiku ya makumu”? Naswona i mpsini leswi Yehovha a lavaka hiswi yendla na swiyendlakalu swoleswo swingase humelela?

3. Hikuya hi wuprofeta leli kumekaka ka 1 Vatesalonika 5:1-3, hi xihi xitiviso lexi tihosi ta misava tingataxi nyikela?

³ Lerha 1 Vatesalonika 5:1-3. Ka tindzimana leti Pawulo a vulavule hi “siku la Hosi [Yehovha]” lelingata sungula loko kuhlaseliwa “Babilona Lwenkulu”, kunga wukhongeli hinkwalu la mavunhwa,  naswona siku leli, lita hela loko kufika Armajedoni. (Nhla. 16:14, 16; 17:5) Loko kaha sale nkama nyana leswaku “siku” lolelo li sungula, tihosi ta misava tita tivisa vanhu ti ku: “Kurhulile, aku na xa kukarhata” (maBibele man’wani ma li: “Kurhula ni nsirhelelo”). Minkama yin’wani tihosi ta misava ti tirhisa marito ya kufana ni wolawo loko ti lava kuyampsisa wuxaka ni ntwananu xikarhi ka matiko ya tona ni matiko man’wana. * Hambileswo, ku ni kuhambana ka marito wolawo ni xitiviso lexi Bibele li vulavulaka ha xona lexinge: “Kurhulile, aku na xa kukarhata”. Hi mhaka muni? Hikusa loko swoleswo swi humelela vanhu votala vata pimisa swaku tihosi ta misava tiswi kotile kuyendla misava hinkwayu yi va ndhawu leyi sirhelelekeke ngopfu. Phela “nhlomulu . . . lowukulu” wuta sungula hi nkama wolowo naswona ‘kuwonhaka kutavawela’ na vangaswi pimisanga. — Mat. 24:21.

4. a) I mpsini leswi hi kalaka hingaswi tivi mayelana ni xitiviso lexinge: “Kurhulile, aku na xa kukarhata? b) I mpsini leswi se hiswi tivaka?

⁴ Hi tiva swilo swokarhi mayelana ni xitiviso lexinge: “Kurhulile, aku na xa kukarhata”, kambe ku ni swin’wana leswi hi kalaka hingaswi tivi. Hi xikombiso, ahiswi tivi swaku tihosi titaxi yendlisa kuyini xitiviso lexo kumbe swaku titaxi yendla hi mhaka muni. Naswona ahiswi tivi swaku tita tivisa hi kuphindhaphindha kumbe tita tekela kutivisa hi kan’we. Kambe, hambi swoyini hina ha tiyiseka swaku tihosi ta misava atingeswi koti kutisa kurhula amisaveni naswona ahinge kanganyisiwi hi mavunhwa ya tona. Hi mhaka leyo, hiswi nyimelile kutwa xitiviso xolexo hilaha Bibele lihi byeleke ha kona swaku kuta va kuli xikombiso xa leswaku “siku la Hosi [Yehovha]” li le kusuhi ni kusungula!

5. Hikuya hi 1 Vatesalonika 5:4-6, hi fanele hi yendla yini leswaku hi lunghekela siku la Yehovha?

⁵ Lerha 1 Vatesalonika 5:4-6. Marito ya Pawulo mahi pfuna kutiva leswi hi faneleke hiswi yendla akuva hi lunghekela “siku la Hosi [Yehovha]”. Ahi fanelanga hi ‘yetlela kukota leswi van’wana vayendlisaka xiswona’. Kambe ahi tameni hi ‘hiteka’. Hi xikombiso, hi fanele hi tivonela leswaku hinga ngheneleli maguwa ya politika, hikusa loko ho nghenelela nyakanyaka ya misava leyi hita hetelela hi va “va misava”. (Yoh. 15:19) Phela hina haswi tiva leswaku i Mfumu wa Xikwembu ntsena lowunga tisaka kurhula la misaveni.

6. I mpsini leswi hi lavaka kupfuna van’wani leswaku vaswi yendla naswona hi mhaka muni?

⁶ I ntiyiso leswaku hi fanele hi tshama hi khindlimukile, kambe hi fanele hi tlhela hi pfuna vanhu van’wani leswaku va tiva leswi Bibele li vuleke leswaku swita humelela la misaveni. Swoleswo hi fanele hiswi yendla swoswi hikusa loko nhlomulu lowukulu wuta sungula kuta va kungaha na nkama wa leswaku vanhu va djondza hi Yehovha. Hi mhaka leyo i swa lisima kuva hi chumayela na kaha li swoswi. *

7. I mpsini leswi Yehovha a lavaka leswaku hiswi yendla?

⁷ Ka nkama nyana lowunga sala na siku la Yehovha lingase fika, yena a lava leswaku hi tshama  na hi khomekile ka ntirho wa kuchumayela. Hi mhaka leyo, hi fanele hi tiyiseka swaku ‘minkama hikwayu hiva ni swa kuswi yendla antirhweni wa Hosi’. (1 Kor. 15:58) Yesu a profete leswi hi faneleke hiswi yendla. Loko a vulavula hi swiyendlakalo hinkwaswu swa kuhlamalisa leswi aswita humelela ka masiku yawugamu, a tlhele a ku: ‘Evhangeli kumbe mahungu yotsakisa mafanele kurhanga matwalisiwa matikweni hinkwawu’. (Marka 13:4, 8, 10; Mat. 24:14) Phela nkama wun’wana ni wun’wana lowu u yaka kuchumayeleni, u pfuneta kuhetisisa wuprofeta leli la Bibele!

8. Hiswi tivisa kuyini leswaku a ntirho wa kuchumayela wu ya wu kula?

⁸ Kunga va leswaku ntirho wa kuchumayela wu ya wu kula? Lembe ni lembe ntirho lowu wu psala mihandzu ya kuhlamalisa. Hi xikombiso, pimisa hi kuyengeteleka ka vachumayeli va Mfumu amisaveni hinkwayu ka masiku lawa ya wugamu. Hi 1914 aku ni 5.155 wa vachumayeli ka 43 wa matiko. Kambe namuntlha se ku ni kolomuya ka 8.5 milhões wa vachumayeli ka 240 wa matiko. Hambileswo, ntirho wa hina awuse hela, hi fanele hi tama hi byela vanhu leswaku Mfumu wa Xikwembu hi wona ntsena wungata lulamisa swikarhatu hinkwaswu swa vanhu. — Pis. 145:11-13.

9. Hi mhaka muni hi fanele hi tama hi chumayela mahungu ya Mfumu?

⁹ Hita nyima kuchumayela ntsena loko Yehovha atahi byela leswaku hi nyima. Kasi vanhu va saleliwe hi nkama wa kugama kwini leswaku va djondza hi Yehovha na Yesu? (Yoh. 17:3) Ahiswi tivi. Kambe leswi hiswi tivaka hi leswaku loko nhlomulu lowukulu wungase sungula, lavanga ni “kutiyimisela lokunene ka wutomi lelinga heliki”, vangaha yamukela mahungu yotsakisa ivi va langa kutirhela Yehovha. (Mint. 13:48, NM) Hingava pfunisa kuyini vanhu lava na nkama waha pfumela?

10. Yehovha ahi pfunisa kuyni leswaku hi djondzisa vanhu a ntiyiso?

¹⁰ Yehovha a tirhisa nhlengeletanu ya yena leswaku ahi nyika hinkwaswu leswi hiswi lavaka leswaku hi kota kubyela vanhu ntiyiso. Hi xikombiso vhiki ni vhiki ha djondzisiwa ka nhlanganu wa xikarhi ka vhiki. Nhlanganu lowu wuhi komba tindlela ta kusungula mabulu ni vanhu ni kuyendla mayendzo yovuyela. Wu tlhela wuhi djondzisa ndlela ya kufambisa djondzo ya Bibele. Xin’wana hileswaku nhlengeletanu ya Yehovha yihi lunghiselela Switirho Swodjondzisa vanhu ha swona leswihi pfunaka . . .

• kusungula mabulu,

• kuyendla vanhu va tsakela rungula la hina,

•   kupfuna vanhu va tsakela kutiva swotala hi Bibele,

• kudjondzisa ntiyiso loko hi fambisa tidjondzo ta Bibele, ni

• kurhamba vanhu lava tsakelaka leswaku va nghena ka site la hina va tlhela va ta andlwini ya hina ya wugandzeli.

I ntiyiso leswaku aswi yenelanga kuva ni switirho leswi ntsena, kambe hi fanele hiswi tirhisa. * Hi xikombiso, loko higama kuva ni bulo leli tsakisaka ni munhu lweyi a tsakelaka, hingahamu siyela a tratado kumbe revhixta leswaku a sala a lerha kufikela loko himu yendzela siku lin’wana. Mun’wana ni mun’wana wa hina a fanele a tshama na a khomekile hi ntirho wa kuchumayela wheti ni wheti.

11. Hi mhaka muni kululamiseliwe Djondzo ya Bibele ka Interneti?

¹¹ Ndlela yin’wani leyi Yehovha ayi tirhisaka leswaku a pfuna vanhu akuva va djondza ntiyiso, i Djondzo ya Bibele ka Interneti leyi kumekaka ka site la hina la jw.org^®. Hi mhaka muni kululamiseliwe djondzo leyi? Xivangelo hi leswaku wheti yin’wani ni yin’wani, ku ni vanhu votala amisaveni hinkwayu va lavaka kudjondza Bibele ka interneti. Tidjondzo leti kumekaka ka site la hina tinga pfuna vanhu volavo leswaku va djondza ntiyiso wa Rito la Xikwembu. Vanhu van’wani lava uva chumayelaka, swingaha yendleka vanga pfumeli kufambiseliwa djondzo ya Bibele. Loko swi tshamise xileswo, va kombe swaku vangayi kumisa kuyini djondzo ya Bibele ka site la hina kumbe uva pfuna kunghena hi lirimi leli vali twisisaka. *

12. I mpsini leswi vanhu vangaswi djondzaka ka Djondzo ya Hina ya Bibele ka Interneti?

¹² Ka Djondzo ya Bibele leyi kumekaka ka Interneti kuvulavuliwa hi timhaka leti: “Bibele ni Mutsali wa Lona”, “Vanhu lava Kuvulavuliwaka Ngopfu hi Vona Abibeleni!” ni “Rungula La Bibele Lelihi Nyikaka Ntshembo”. Ka tidjondzo leti, vanhu vata tiva swaku:

• Bibele lingava pfunisa kuyini vanhu

• Yehovha, Yesu ni tintsumi hi vamani

• Hi mhaka muni Xikwembu xi yendle vanhu

• Hi mhaka muni ku ni wubihi ni kuhlupheka

Tidjondzo leti, ti tlhela ti djondzisa swaku Yehovha ata . . . 

• helisa kuhlupheka ni lifu,

• a pfuxa lava vanga fa, a tlhela

• a helisa mimfumu hinkwayu ya misava ivi a veka Mfumu wa yena.

13. Hlamusela swaku hi mhaka muni Tidjondzo ta Bibele ta le ka interneti tinga pfaleti djondzo ya Bibele leyi munhu a faneleka a fambiseliwa yona.

¹³ Tidjondzo ta Bibele ta le ka interneti ati pfaleti djondzo ya Bibele leyi munhu a faneleka a fambiseliwa yona, hikusa Yesu ahi nyike ntirho wa lisima wa kudjondzisa vanhu ntiyiso. Tidjondzo leti ti kumekaka ka interneti, ti yendleliwe kupfuna vanhu lava va tsakelaka leswaku va djondza ni kutlhela va navela kutiva swotala. Kutani, swoleswo switava yendla va pfumela kufambiseliwa djondzo ya Bibele. Akuheleni ka djondzo yin’wani ni yin’wani leyi kumekaka ka interneti, lweyi a djondzaka a rhambiwa leswaku a kombela munhu lweyi angatamu fambisela djondzo ya Bibele. Siku ni siku, ka site la hina nhlengeletanu yi yamukela vanhu va kolomuya ka 230 amisaveni hinkwayu, lava kombelaka kudjondzeliwa Bibele. Phela, akuva munhu a fambiseliwa djondzo ya Bibele swinga ponisa wutomi la yena!

14. Hikuya hi leswi Yesu ahi byeleke swona ka Matewu 28:19, 20, hi fanele hi zama kuyendla yini naswona hi mhaka muni?

¹⁴ Lerha Matewu 28:19, 20. Loko hi djondzisa vanhu Bibele hi fanele hi zama kuyendla  hinkwaswu leswi hingaswi kotaka leswaku hi ‘vayendla vajondzisiwa . . . hivajondzisa kuhlayisa hinkwaswu leswi [Yesu] ahibyeleke swona’. Hi fanele hi pfuna vanhu kutwisisa swaku hi mhaka muni swi li swa lisima akuva va langa kutirhela Yehovha ni kuseketela Mfumu wa yena. Swoleswo swi vula swaku hi fanele hiva pfuna leswaku va rhandza ntiyiso ni kuhanya hi leswi vaswi djondzaka kutani va tinyiketela ka Yehovha ivi va tsakamisiwa. Hi kona vangata kota kupona ka siku la Yehovha. — 1 Pet. 3:21.

15. I mpsini leswi hi kalaka hinga na nkama wa kuswi yendla naswona hi mhaka muni?

¹⁵ Hilaha swi vuliweke ha kona akusunguleni, kusale nkama nyana wawutsongo leswaku misava leyi yobiha yi lovisiwa. Hi mhaka leyo, ahina nkama wa kudjondzela vanhu lava va kalaka vangaswi lavi kucinca wutomi la vona ivi va tirhela Yehovha. (1 Kor. 9:26) Ntirho wa hina i wa xihantla! Kaha ni vanhu votala lava hi faneleke hiva byela rungula la Mfumu hi kuhantlisa.

16. Hikuya hi Nhlavutelo 18:2, 4, 5, 8, i mpsini leswi hi faneleke hiswi yendla? (Vona nhlamuselo ya le hansi.)

¹⁶ Lerha Nhlavutelo 18:2, 4, 5, 8. Tindzimana leti ti kombisa swin’wani leswi Yehovha aswi lavaka ka vagandzeli va yena. Vakreste hinkwavu va ntiyiso va fanele va tiyiseka swaku ava katseki hi ndlela yokarhi ka wukhongeli la mavunhwa. Swingaha yendleka munhu lweyi a djondzeliwaka Bibele, a alumba kereke yokarhi na angase tiva ntiyiso. Swinga yendleka a aya ni kutlhela a yendla mintirho yokarhi ya kereke kumbe ayi seketela hi timale. Leswaku munhu yelweyo a fanelekela kuva muchumayeli lweyi a kalaka anga tsakamisiwanga a fanele a tiyiseka swaku angaha lumbi kumbe kupsanya ka kereke yoleyo. A fanele a tsala papila ali rhumela ka kereke kumbe nhlengeletanu leyi a ali ka yona ya wukhongeli la mavunhwa, akuva ava byela swaku yena angaha li wa vona. *

17. Hi wihi ntirho lowu Vakreste va kalaka vanga fanelanga vawu yendla, naswona hi mhaka muni?

¹⁷ Vakreste va ntiyiso va fanele va tiyiseka leswaku ntirho wa vona awu yelani ni wukhongeli la mavunhwa. (2 Kor. 6:14-17) Hi xikombiso ava fanelanga va pfumela kutholiwa hi kereke yokarhi. Xin’wani, hileswaku avange pfumeli kuyendla ntirho wokarhi akerekeni hambiloko va rhumiwa hi komponi leyi va tirhaka ka yona. Naswona loko Mukreste a ni komponi ya yena kumbe a tiva kuyendla ntirho wokarhi, ange pfumeli kutirhisana ni wukhongeli la mavunhwa. Hi mhaka muni hi fanele hi nyima hi tiyile ka mhaka leyi? Xivangelo hileswaku ahi lavi kukatseka ka tidjondzo ta  mavunhwa ni swiyendlo swobiha swa Babilona Lwenkulu, leswi Yehovha ahi byelaka leswaku swi chakile. — Esa. 52:11. *

18. Makwerhu mun’wani ama yingisise kuyini matshinya ya minawu ya Bibele antirhweni wa kutihanyisa?

¹⁸ Ka malembe lamanga hundza, doda lokarhi leli ali tiyendlela ntirho wa kuvatla, li kombeliwe hi munhu wokarhi lweyi a athola vanhu akuva liya yendla ntirho ka kereke yokarhi, amugangeni wa lona. Munhu yelweyo aaswitiva swaku doda leli alinga pfumeli kutirha atikerekeni. Hambileswo, amu kombelile hikusa a alava munhu lweyi ata yendla ntirho lowu hi xihantla. Kambe, doda leli li khomelele ka matshinya ya minawu ya Bibele naswona li yalile kuyendla ntirho lowu. Ka vhiki lelinga landzela, ka jornali la ndhawu yoliyani, kukombisiwe mufoto wa muvatli mun’wani na a hayeka xihambanu ka kereke liyani. Phela loko makwerhu lweyi aayo pfumela kuyendla ntirho lowuyani, akuta va kuli yena lweyi a kombisiweke ka jornali. Swoleswo aswita va swi chakise lipfalu la yena ni kuwonha ndhuma ya yena leyinene tani hi Mukreste. Naswona pimisa hileswi Yehovha aata titwisa xiswona.

19-20. a) I mpsini leswi hingaswi djondza? b) Hi swihi swilo swin’wani leswi hi faneleke hi djondza hi swona?

¹⁹ Bibele li vula swaku xiyendlakalu xa lisima xa wuprofeta lexingata landzela xita hetiseka kungali khale, loko tihosi ta misava ti nyikela xitiviso lexinge “kurhulile akuna xa kukarhata”. Hikuya hileswi Yehovha ahi djondziseke swona haswi tiva swaku tihosi ta misava atingeswi koti kuyendla leswaku kuva ni kurhula ka ntiyiso. Hi fanele hi yendla yini loko xiyendlakalu xolexo xingase humelela ivi hi xihantla, Yehovha a lovisa vanhu vobiha? Yehovha a lava leswaku hi tshama hi khomekile hi kuchumayela mahungu yotsakisa ni kutama hi djondzisa vanhu votala hilaha hinga kotaka hi kona. Xin’wani lexi lavekaka i kuva hinga tipatsi ni wukhongeli la mavunhwa. Swoleswo swi katsa kuva hi tsema wuxaka ni Babilona Lwenkulu naswona hinga pfumeli kuyendla mintirho leyi yelanaka na yena.

²⁰ Ku ni swiyandlakalu swin’wani leswingata humelela akuheleni ka “masiku ya makumu” naswona ku ni swilo swin’wani leswi Yehovha a lavaka swaku hiswi yendla. Hi swihi swa kona? Naswona hinga yendla yini akuva hi lunghekela swilo hinkwaswu leswingata humelela ankameni lowu taka? Hita bula hi mhaka leyi ka nhlokomhaka leyi taka.