«Мин сиңа тагын бер тапкыр әйтәм: кыю һәм нык бул. Котың очмасын һәм курыкма, чөнки кая гына барсаң да, Аллаһың Йәһвә синең белән булыр» (Йошуа 1:9, «Яңа дөнья тәрҗемәсе»).

 «Шулай итеп, Мин сиңа, нык һәм кыю йөрәкле бул, дип боерамын, курыкма һәм рухыңны төшермә, чөнки Раббы Аллаң, кайда гына барсаң да, синең юлдашыңдыр» (Йошуа 1:9, Изге Китапны тәрҗемә итү институты тәрҗемәсе).

 Бу сүзләр белән Йәһвә a Аллаһы үз тугры хезмәтчесе Йошуаны, авыр шартларга һәм җиңелмәс булып күренгән киртәләргә карамастан, «кыю һәм нык булырга» дәртләндергән. Йошуа Аллаһының әмерләрен тыңлаганда, аның киләчәктән куркыр өчен сәбәпләре булмаган. Чөнки Йәһвә, янәшәсендә булып, аңа уңышка ирешергә ярдәм иткән. Аллаһы, Йошуага үз җитәкчелеген биреп һәм дошманнарны җиңәргә булышып, аның белән булган.

 Йошуа ничек «кыю һәм нык» була алган? Аны Йәһвә теге вакытта инде биргән язмаларны уку кыю һәм нык итә алган. Бу язмаларга Йәһвәнең хезмәтчесе «Муса [Йошуага] тотарга боерган бөтен Канун» кергән b (Йошуа 1:7). Йәһвә Йошуага «аны көне-төне укып уйланырга» кушкан (Йошуа 1:8). Шундый уку һәм уйлану Йошуаны Аллаһы ихтыярын үтәүдә ныгыткан. Аннары Йошуага Аллаһы Сүзендә «язылганнарның барысын җентекләп үтәргә» кирәк булган. Шулай эшләгән булса, ул зирәклек белән эш итәр иде һәм уңышлы булыр иде. Нәкъ шулай булган да. Авырлыкларга карамастан, Йошуа, Йәһвәнең тугры хезмәтчесе буларак, канәгатьлек китерүче тормыш алып барган (Йошуа 23:14; 24:15).

 Йәһвәнең Йошуага әйткән сүзләре бүгенге көндә безне дә ныгыта. Бу сүзләр Йәһвәнең үз хезмәтчеләре турында, аеруча алар кыенлыкларга очраганда, никадәр кайгыртканын ачыклый. Ул үз хезмәтчеләренең Йошуа кебек уңышлы булуларын тели. Һәм Йошуа кебек, алар, регуляр рәвештә Изге Язмаларны укып һәм уйланып, ә аннары язылганы буенча эш итеп, «кыю һәм нык була» ала.

 Муса үлгәннән соң, Йәһвә Йошуага Исраил халкын җитәкләп барырга боерган (Йошуа 1:1, 2). Ул вакытта исраиллеләр Вәгъдә ителгән Кәнган җиренә керергә әзерләнгән. Ләкин аларга куәтле дошманнарга каршы торырга кирәк булган. Мәсәлән, Йошуага кәнганлыларга каршы сугышырга туры килгән, ә алар бигрәк явыз булган c (Канун 9:5; 20:17, 18). Өстәвенә, кәнганлыларның саны, исраиллеләргә караганда, күпкә күбрәк булган, һәм хәрби яктан да алар яхшырак коралланган булган (Йошуа 9:1, 2; 17:18). Әмма Йошуа Йәһвәнең күрсәтәмәләрен кыюлык белән үтәгән. Аллаһы аның белән булган, шуңа күрә исраиллеләр нибары алты ел эчендә генә дошманнарының күбесен җиңеп чыккан (Йошуа 21:43, 44).