Изге Язмаларда җенси теләкне канәгатьләндерү тыелмый. Анда Аллаһы никахта булган кешеләргә андый мөнәсәбәтләрне бүләк итеп биргән дип әйтелә. Аллаһы кешеләрне «ир һәм хатын-кыз» итеп яраткач, булдырган нәрсәләр «гаять яхшы» дип әйткән (Яратылыш 1:27, 31). Адәм белән Хаува никах бәйләнешләре белән берләшкәч, Аллаһы алар «бер тән булыр» дип әйткән (Яратылыш 2:24). Андый бәйләнешләр шуны күрсәтә: алар бер-берсенә эмоциональ яктан бирелгән булыр һәм җенси мөнәсәбәтләрдән шатлык табар.

 Никахтагы мөнәсәбәтләрдән ирләр алган рәхәтлек турында Изге Язмаларда болай дип әйтелә: «Яшьлегеңдәге... хатының белән күңелең ач; аның кайнар күкрәкләре сине һәрвакыт ашкындырып торсын, аның сүрелмәс мәхәббәте белән ләззәтләнеп яшә» (Гыйбрәтле сүзләр 5:18, 19). Аллаһы никахтагы мөнәсәбәтләрнең хатынга да рәхәтлек китерүен тели. Изге Язмаларда: «Ир — хатынына, ә хатын иренә карата үз бурычын үтәсен»,— дип әйтелә (1 Көринтлеләргә 7:3).

Нинди чикләр бар

 Аллаһының нормалары буенча җенси мөнәсәбәтләргә никахта булган кешеләр генә керә ала. Еврейләргә 13:4 тә болай диелә: «Бар кеше дә никахны ихтирам итсен, никахын саф килеш сакласын, чөнки зиначыларны һәм хыянәтчеләрне Аллаһы хөкем итәчәк». Ир һәм хатын бер-берсенә тугры булырга тиеш. Алар үз ихтыяҗларын канәгатьләндерүдән түгел, ә Изге Язмалардагы «алуга караганда бирүдә бәхет күбрәк» дигән принципны тотудан иң зур шатлык таба (Рәсүлләр 20:35).