Аллаһы безгә искиткеч бүләк — дога кылып аның белән аралашу һәм аңа хисләребезне белдерү мөмкинлеген биргән. Давыт пәйгамбәр болай дигән: «И Догаларны Тыңлаучы, төрле кешеләр сиңа килер» (Зәбур 65:2). Әмма Аллаһы безне ишетсен өчен һәм фатихаласын өчен, ничек итеп дөрес дога кылырга?

Шәхси догалар Аллаһыга «күңелләребезне бушатырга» — иң эчке хисләребезне белдерергә мөмкинлек бирә (Зәбур 62:8). Аллаһы Тәгалә чын күңелдән әйтелгән, эчкерсез догаларны кадерли. Ул безгә таныш булмаган телдә бер үк сүзләрне кабатлавыбызны я догаларны догалыктан укуыбызны теләми.

Аллаһының күп титуллары бар. Алар арасында, мәсәлән, Аллаһы, Тәгалә, Ходай, Рәхимле, Шәфкатьле, Изге. Ләкин Аллаһының исеме бер генә. Ишагыя пәйгамбәр аша ул болай дигән: «Мин Йәһвә. Бу — минем исемем» (Ишагыя 42:8). Изге Язмаларда «Йәһвә» дигән исем якынча 7 000 тапкыр очрый. Күп кенә пәйгамбәрләр Аллаһыга исеме белән мөрәҗәгать иткән. Мәсәлән, Ибраһим пәйгамбәр: «И Йәһвә... сиңа сөйләргә батырчылык иттем»,— дип әйткән (Яратылыш 18:27). Без дә, дога кылганда, Аллаһыга «Йәһвә» дип дәшәргә тиеш.

Нинди генә телдә сөйләшсәк тә, Аллаһы уй-фикерләребезне һәм хисләребезне аңлый. Аның Сүзе безне болай дип ышандыра: «Аллаһы кешеләрне аермый, ләкин үзеннән куркучыны һәм дөреслек кылучыны, ул кайсы гына халыктан булмасын, хуп күрә» (Рәсүлләр 10:34, 35).

Ләкин, Аллаһы безне фатихаласын өчен, дога кылу гына җитми. Киләсе мәкаләләрдән без тагын нәрсә эшләргә кирәклеген күрербез.