4  Йәһвә Муса белән Һарунга мөрәҗәгать итеп болай диде: ² «Ле́ви уллары арасыннан, гаиләләре буенча һәм нәселләре буенча, Коһа́т+ улларының исәбен ал. ³ Очрашу чатырында эшләргә билгеләнгән 30+ яшьтән алып 50 яшькә кадәр+ булган коһатлыларның барысын санап чык.+ ⁴ Коһат улларының очрашу чатырындагы хезмәте+ — аеруча изге нәрсә. ⁵ Халык тукталу урыныннан юлга чыкканда, Һарун һәм аның уллары чатырга кереп, чаршауны+ салдырсын һәм аның белән шаһитлек сандыгын+ капласын. ⁶ Аның өстенә алар тюлень тиреләреннән ясалган япманы җәйсен һәм өстенә бербөтен зәңгәр тукыманы бөркәп, аны күчереп йөртү өчен, колгаларын+ кидерсен. ⁷ Алар шулай ук багышланган икмәкләр өстәленә+ зәңгәр тукыманы җәйсен һәм аның өстенә тәлинкәләрне, касәләр, шәраб бүләге өчен табаклар һәм җамаякларны куйсын.+ Даими китерелә торган икмәк+ бүләге үз урынында калсын. ⁸ Болар өстеннән алар ачык кызыл төстәге тукыманы җәйсен, аны тюлень тиреләреннән ясалган япма белән капласын һәм өстәлне күчереп йөртү өчен, колгаларын+ кидерсен. ⁹ Аннары алар зәңгәр тукыманы алып, шәмдәлне,+ аның яктырткычларын,+ кыскычларын, ут савытларын+ һәм шәмдәл янып торсын өчен кулланылган барлык май савытларын капласын. ¹⁰ Алар аны һәм аның бар кирәк-яракларын тюлень тиреләреннән ясалган япмага урасын һәм аны күчереп йөртү җайланмасына салсын. ¹¹ Алар алтын мәзбәх+ өстенә зәңгәр тукыманы җәйсен, аны тюлень тиреләреннән ясалган япма белән капласын һәм күчереп йөртү өчен, колгаларын+ кидерсен. ¹² Аннары алар изге урында хезмәт итү өчен даими кулланыла торган барлык кирәк-яракларны+ алып, зәңгәр тукымага салсын һәм аларны тюлень тиреләреннән ясалган япма белән ябып, күчереп йөртү җайланмасына куйсын. ¹³ Алар мәзбәхне көлдән* чистартсын+ һәм аның өстенә кызгылт-шәмәхә төстәге йон тукыманы җәйсен. ¹⁴ Алар аның өстенә мәзбәх янында хезмәт иткәндә кулланылган бар кирәк-яракларын:+ ут савытларын, чәнечкеләрен, соскыларын, табакларын куйсын һәм өсләренә тюлень тиреләреннән ясалган япманы җәйсен һәм мәзбәхне күчереп йөртү өчен, колгаларын+ кидерсен. ¹⁵ Халык тукталу урыныннан юлга кузгалырга торганда, Һарун һәм аның уллары изге урынның әйберләрен һәм бар кирәк-яракларын каплап бетерергә тиеш.+ Аннары Коһат уллары кереп, аларны алып китәр,+ ләкин алар изге урынның әйберләренә кагылырга тиеш түгел, юкса үләрләр.+ Очрашу чатырындагы бу әйберләрне күчереп йөртү — Коһат улларының бурычы. ¹⁶ Һарун руханиның улы Илгаза́р+ яктырткыч мае,+ хуш исле фимиам,+ көндәлек икмәк бүләге һәм изге май*+ өчен җаваплы. Ул бөтен изге чатыр һәм анда булган барлык нәрсә: чатырның үзе һәм аның кирәк-яраклары турында кайгыртырга тиеш». ¹⁷ Йәһвә Муса белән Һарунга тагын болай диде: ¹⁸ «Ле́вилеләр арасыннан коһатлылар+ гаиләләренең юк ителүенә юл куймагыз. ¹⁹ Алар аеруча изге нәрсәләргә+ якынлашудан үлмәсеннәр өчен, шуны эшләгез: Һарун һәм аның уллары, барып, аларның һәрберсен үз хезмәтенә билгеләсен һәм алар нәрсә алып барырга тиеш икәнен күрсәтсен. ²⁰ Алар, якынлашып, изге нәрсәләргә хәтта күз ташлап алырга да тиеш түгел, югыйсә үләчәкләр».+ ²¹ Аннары Йәһвә Мусага болай диде: ²² «Нәселләре буенча һәм гаиләләре буенча, Гирсә́н+ улларының исәбен ал. ²³ Очрашу чатырында хезмәт итәргә билгеләнгән 30 яшьтән алып 50 яшькә кадәрге гирсәнлеләрнең барысын исемлеккә керт. ²⁴ Гирсәнлеләр гаиләләре менә нәрсәне кайгыртырга һәм күчереп йөртергә билгеләнә:+ ²⁵ алар изге чатыр тукымаларын,+ очрашу чатырын, аның япмасын һәм аның өстендәге тюлень тиреләреннән ясалган япманы,+ очрашу чатырының керү урынындагы пәрдәне+ күчереп йөртсен, ²⁶ шулай ук ишегалды пәрдәләрен,+ чатыр һәм мәзбәх тирәли булган ишегалдының керү урынындагы ишек пәрдәсен,+ бауларын һәм аларның барлык кирәк-яракларын һәм чатырны кайгыртыр өчен кулланылган бар нәрсәне алып барсын. Бу — аларның йөкләмәсе. ²⁷ Гирсәнлеләрнең+ бар хезмәтен һәм күчереп йөртәчәк йөкләрен Һарун белән аның уллары күзәтсен. Бар бу йөкләрне аларга билгеләгез, бу аларның бурычлары булыр. ²⁸ Бу — гирсәнлеләр гаиләләренең очрашу чатырында үтәячәк хезмәтләре+ һәм Һарун руханиның улы Итама́р+ җитәкчелегендә башкарачак бурычлары. ²⁹ Мерари́+ улларын гаиләләре буенча һәм нәселләре буенча исемлеккә керт. ³⁰ Очрашу чатырында хезмәткә билгеләнгән 30 яшьтән алып 50 яшькә кадәр булган мерарилыларның барысын санап чык. ³¹ Алар очрашу чатырындагы хезмәтләре буенча күчереп йөртергә тиеш нәрсәләр шул:+ изге чатырның рамнары,+ аның колгалары,+ баганалары,+ ырмаулы нигезләре,+ ³² ишегалды әйләнәсендәге баганалар,+ аларның ырмаулы нигезләре,+ казыклары,+ баулары, аларның бар җиһазлары һәм болар белән бәйле хезмәткә кагылышлы бар нәрсәләр. Алар күчереп йөртергә тиеш әйберләрне аларга исемләп билгеләгез. ³³ Бу — Мерари+ уллары гаиләләренең очрашу чатырындагы Һарун руханиның улы Итамарның җитәкчелегендә башкарачак хезмәте».+ ³⁴ Аннары Муса белән Һарун һәм җәмгыять башлыклары+ коһатлыларны,+ аларның гаиләләре буенча һәм нәселләре буенча, исемлеккә керттеләр. ³⁵ Алар очрашу чатырында хезмәткә билгеләнгән 30 яшьтән алып 50 яшькә кадәрге коһатлыларның барысын санап чыктылар.+ ³⁶ Гаиләләре буенча исемлеккә кертелгәннәрнең тулы саны 2 750 булды.+ ³⁷ Болар очрашу чатырында хезмәт иткән коһатлылар булды. Муса һәм Һарун аларны Йәһвәнең Муса аша биргән боерыгы буенча санап чыктылар.+ ³⁸ Алар гаиләләре һәм нәселләре буенча Гирсән+ улларын санап чыктылар. ³⁹ Алар очрашу чатырында хезмәткә билгеләнгән 30 яшьтән алып 50 яшькә кадәр булган гирсәнлеләрнең барысын исемлеккә керттеләр. ⁴⁰ Гаиләләре һәм нәселләре буенча исемлеккә кертелгәннәрнең тулы саны 2 630 булды.+ ⁴¹ Болар очрашу чатырында хезмәт иткән Гирсән уллары булды. Муса белән Һарун аларны Йәһвә боерыгы буенча санап чыктылар.+ ⁴² Алар Мерари улларын аларның гаиләләре һәм нәселләре буенча санап чыктылар. ⁴³ Алар очрашу чатырында хезмәткә билгеләнгән 30 яшьтән алып 50 яшькә кадәрге мерарилыларның барысын исемлеккә керттеләр.+ ⁴⁴ Гаиләләре буенча исемлеккә кертелгәннәрнең тулы саны 3 200 булды.+ ⁴⁵ Болар очрашу чатырында хезмәт иткән Мерари уллары булды. Муса һәм Һарун аларны Йәһвәнең Муса аша биргән боерыгы буенча санап чыктылар.+ ⁴⁶ Муса белән Һарун һәм Исраи́л башлыклары барлык шушы ле́вилеләрне, аларның гаиләләре буенча һәм нәселләре буенча, исемлеккә керттеләр. ⁴⁷ Алар 30 яшьтән алып 50 яшькә кадәрге ир-атлар иде, һәм барысы очрашу чатыры белән бәйле хезмәткә һәм йөкләр күчереп йөртергә билгеләнгән иде.+ ⁴⁸ Аларның исемлеккә кертелгән тулы саны 8 580 булды.+ ⁴⁹ Алар һәрберсе билгеләнгән хезмәте һәм йөге буенча, Йәһвә Муса аша кушканча, исемлеккә кертелде. Аларны, Йәһвә Мусага боерганча, санап чыктылар.