Икенче көринтлеләргә 1:1—24
1 Бу хатны Аллаһының ихтыяры буенча Мәсих Гайсәнең рәсүле Пау́л һәм кардәшебез Тимути́+ Көринттәге Аллаһы җыелышына һәм бөтен Аха́ядагы+ барлык изгеләргә яза.
2 Күктәге Атабыз Аллаһыдан һәм Хуҗабыз Гайсә Мәсихтән юмарт игелек һәм иминлек сезгә.
3 Хуҗабыз Гайсә Мәсихнең Аллаһысы һәм Атасы,+ рәхимлелек Атасы+ һәм һәртөрле юаныч Аллаһысы макталсын.+
4 Кайгы-хәсрәтебез нинди генә булмасын,+ Аллаһы безне юата* һәм моны без башкаларны, алар теләсә кайсы кайгы-хәсрәт кичергәндә, аңардан кабул иткән юаныч белән юата алсын өчен эшли.+
5 Чөнки Мәсих хакына чиккән газапларыбыз күп булган кебек,+ Мәсих аша алган юанычыбыз да мул.
6 Кайгы-хәсрәт кичерәбез икән, сез юаныч алсын өчен һәм котылсын өчен кичерәбез. Безне юаталар икән, сез юаныч алсын өчен юаталар, һәм бу юаныч, эш итеп, сезгә без кичергән газапларны кичергәндә нык калырга булыша.
7 Сезгә кагылышлы өметебез нык, чөнки шуны беләбез: безнең белән газапларыбызны уртаклашкан кебек, юанычны да уртаклашырсыз.+
8 Кардәшләр, А́сия өлкәсендә кичергән кайгы-хәсрәтебез турында әйтәсебез килә:+ без анда шулкадәр зур авырлыкларга дучар булдык ки, аларны үз көчебезгә генә таянып кичереп чыгу мөмкин түгел иде, хәтта исән калуыбызга да шикләр бар иде.+
9 Үзебезгә үлем карары чыгарылганына инде бер дә шикләнми идек. Бу без үзебезгә түгел, ә үлеләрне терелтүче Аллаһыга таянып яшәсен өчен булды.+
10 Ул шул куркыныч хәлдә гомеребезне саклап калды. Без аның киләчәктә дә саклап торачагына өмет баглыйбыз.+
11 Сез дә, безнең турында ялварып, безгә ярдәм итә аласыз, шулчак безнең хакка күпләрнең кылган догаларына+ җавап итеп безгә игелек күрсәтелер иде һәм, нәтиҗәдә, күпләр безнең өчен Аллаһыга рәхмәт укыр иде.+
12 Без бу дөньяда, бигрәк тә сезнең арада, дөнья зирәклегенә түгел,+ ә Аллаһының юмарт игелегенә таянып, үзебезне изгелек һәм Аллаһыдан килә торган эчкерсезлек белән тоттык, шуңа күрә без мактанабыз һәм шуңа күрә вөҗданыбыз саф.
13 Сез укый* һәм аңлый алган нәрсәләр турында гына язабыз бит. Сез аларны тулысынча аңларсыз дип өметләнеп калам.
14 Кайберәүләрегез безнең белән мактана алуларын инде аңлады, без дә Хуҗабыз Гайсә көнендә сезнең белән мактаначакбыз.
15 Андый ышанычым булганга күрә, сез кабат шатлык кичерсен өчен,* сезнең янга килергә ниятем бар иде.
16 Мин сездә тукталгач, Македо́ниягә барырга, ә Македо́ниядән сезгә кайтырга ниятләгән идем һәм сез мине Яһүдиягә озата барырсыз дип уйлаган идем.+
17 Әллә моны ниятләгәндә, мин уйламыйча эш иттемме? Әллә мин «әйе, әйе» дигәннән соң «юк, юк» диеп, гөнаһлы тән теләкләренә ияреп ният кораммы?
18 Әйткән сүзләребез хак, Аллаһыга ышаныгыз. Без башта «әйе» дип, аннары «юк» димибез.
19 Чөнки сезгә Силуа́н,* Тимути+ һәм минем аша вәгазьләнгән Аллаһы Улы — Гайсә Мәсих — башта «әйе» дип, аннары «юк» димәгән, ә аның «әйе» дигәне «әйе» булып кала.
20 Аллаһының күпме генә вәгъдәләре булмасын, Гайсә аша алар «әйе» булды.+ Шуңа күрә аның аша без, Аллаһыны данлап, «амин» дип әйтәбез.+
21 Әмма сезнең дә, безнең дә Мәсихнеке булуыбызга ышаныч бирүче һәм безне майлаучы — Аллаһы ул.+
22 Ул безгә үз мөһерен сукты+ һәм биреләчәк фатихаларга дәлил* итеп йөрәкләребезгә үз рухын салды.+
23 Аллаһы каршында үз җаным белән ант итәм: мин Көринткә сезне кызганганга күрә килми торам.
24 Бу — без иманыгыз өстеннән хакимлек итәбез дигән сүз түгел,+ без — сезне куандырырга теләүче хезмәттәшләрегез генә, чөнки сез үз иманыгыз ярдәмендә нык торасыз.
Искәрмәләр
^ Яки «дәртләндереп тора».
^ Я, бәлки, «инде яхшы белгән».
^ Я, бәлки, «икеләтә файда алсын өчен».
^ Аны Силас дип тә атаганнар.
^ Яки «беренче взнос (задаток); гарантия».