Үлем — бу яшәүгә капма-каршы хәл. Үлгән кеше йоклый дип әйтеп була (Яхъя 11:11—14). Үлгән кешеләр ишетми, күрми, сөйләшми һәм уйламый (Вәгазьче 9:5, 10). Ялган диндә болай дип өйрәтәләр: имеш үлгәннәр үзләренең үлгән туганнары белән бергә яшәр өчен, рухлар дөньясына күчә. Әмма Изге Язмаларда алай дип әйтелми.

Үлеләр безгә ярдәм дә итә алмый һәм зыян да китерә алмый. Күп кенә кешеләр туганы үлгәч төрле йолалар үткәрә һәм корбаннар китерәләр. Алар андый эшләр аша үлгән кешенең күңелен табабыз дип ышаналар. Аллаһы андый эшләрне хупламый, чөнки алар Шайтан ялганына нигезләнгән. Андый эшләр үлгән кешеләргә дә бернинди файда китерми, чөнки алар үлем йокысы белән йоклый. Үлгәннәрдән курыкма һәм аларга табынма. Без Аллаһыга гына гыйбадәт кылырга тиешбез (Маттай 4:10).

Үлгәннәр тереләчәк. Йәһвә үлгән кешеләрне, алар оҗмах җирендә яшәсен өчен, үлем йокысыннан уятачак. Әмма бу вакыт әле килеп җитмәгән (Яхъя 5:28, 29; Рәсүлләр 24:15). Син кешене йокысыннан уята аласың, нәкъ шулай ук Аллаһы да үлгән кешеләрне үлем йокысыннан уята ала (Марк 5:22, 23, 41, 42).

Шайтан Иблис кешеләр үлми дигән ялган тарата. Шайтан һәм аның җеннәре кешеләрне үлгәннәрнең рухы яши, алар кешеләргә авырулар һәм башка бәлаләр китерә дип уйларга мәҗбүр итә. Кайчакта Шайтан төшләр һәм төрле күренешләр аша кешеләрне алдый. Йәһвә үлгәннәр белән сөйләшергә тырышкан кешеләрне хупламый (Канун 18:10—12).