Якынча бер ярым ел вәгазьләгәннән соң, Гайсә мөһим карар кабул итәргә тиеш булган. Ул кем белән якын хезмәттәшлек итәр? Мәсихче җыелышта җитәкчеләр булсын өчен, кемне өйрәтергә? Дөрес сайлау ясар өчен, Гайсәгә Йәһвә белән киңәшләшергә кирәк булган. Шуңа күрә ул, тауга менеп, төне буе берүзе дога кылган. Иртән ул, кайбер шәкертләрен чакырып, рәсүлләр итеп 12 кешене сайлаган. Син аларның исемнәрен беләсеңме? Менә аларның исемнәре: Пете́р, Әндри́, Ягъкуб, Яхъя, Фили́п, Бартолма́й, Тома́с, Матта́й, Алфа́й улы Ягъкуб, Фадда́й, Шиму́н һәм Яһүд Искарио́т.

Бу 12 рәсүл Гайсә белән бергә вәгазьләп сәяхәт иткән. Ул аларны өйрәткәч, алар үзләре вәгазьли башлаган. Йәһвә аларга җеннәрне куып чыгарыр өчен һәм авыруларны савыктырыр өчен көч биргән.

Гайсә үз рәсүлләрен дусларым дип атаган һәм аларга таянган. Фарисейлар аларны белемсез һәм гади кешеләр дип санаган. Шулай да Гайсә рәсүлләрне йөкләнгән  эшне башкарырга өйрәткән. Алар Гайсә тормышының иң мөһим вакытларында, мәсәлән үлеме алдыннан һәм терелүеннән соң, аның белән бергә булган. Гайсә кебек, 12 рәсүлнең күбесе Гәлилә́ядән булган. Кайберәүләре өйләнгән булган.

Рәсүлләр камилсез булган һәм еш кына хаталар ясаган. Кайвакыт алар уйламыйча сөйләгән һәм дөрес булмаган карарлар кабул иткән. Кайвакыт аларның сабырлыгы җитмәгән. Алар хәтта араларында кем иң мөһиме дип бәхәсләшкән. Әмма рәсүлләр яхшы кешеләр булган һәм Йәһвәне яраткан. Соңрак алар мәсихче җыелышның беренче әгъзалары булып киткән һәм җыелышта мөһим роль уйный башлаган.