Abakaiso ba Yahwe baikaire nibakozesa empindura za Baibuli ezirukwahukana omu kwesomesa kwabo okwa Baibuli. Baitu nabwo, tugonza muno kukozesa empindura eya New World Translation of the Holy Scriptures obuhaaba haroho endimi ezigiine habwokuba ekozesa ibara lya Ruhanga, ehikire kandi ihayo kurungi ensonga.

•   Kukozesa ibara lya Ruhanga. Abantu abamu abaturukize Baibuli balemerwe kutamu ekitiinisa ayagihandiikisize. Nk’ekyokurorraho emu ha mpindura ya Baibuli erumu orukarra rw’amabara g’abantu abarukuhingura 70 abaakozere ebintu ebimu Baibuli obuyali n’eturukibwa. Baitu omu mpindura niyo emu ibara lya Yahwe Ruhanga ayagihandiikisize bakaliihamu!

   Kwahukanaho, empindura eya New World Translation egarwire ibara eri ery’ekitiinisa omu nkumi n’enkumi z’ebyahandiikirwe nambere likaba liri omu byahandiikirwe ebya kara, baitu akatebe k’abantu abagiturukize tikarukumanywa.

•   Ebirumu bihikire. Tiziri mpindura zoona eziihayo kurungi obutumwa bwa Baibuli bw’onyini. Nk’ekyokurorraho omu mpindura emu ekyahandiikirwe ekiri omu Matayo 7:13 nikigamba kiti: “Genda omu mulyango ogufunzire habw’okuba omulyango ogurukuhikya mu gehena gugalihire kandi n’omuhanda ogurukugendayo kwanguhire.” Baitu, ebyahandiikirwe ebya kara bikakozesa ekigambo “kuhwerekerra” hatali “gehena.” Nikisobora kuba ngu abagihindwire bakatamu ekigambo “gehena” habwokuba baali nibaikiriza ngu ababi nibaija kubonabonesebwa omu murro ogutaraara ebiro n’ebiro. Baitu entekereza egi Baibuli tegisagika. Nahabweki empindura eya New World Translation ihayo kurungi ekyahandiikirwe eki n’egamba eti: “Mutaahe omu mulyango ogufunzire, habwokuba omulyango ogurukugenda omu kuhwerekerra gugalihire, n’omuhanda ogurukugendayo gugalihire kandi baingi abarukugugendamu.”

•   Kwihayo kurungi ensonga. Empindura enungi tegarukira ha kuba ehikire kwonka baitu ihayo kurungi ensonga kandi eyanguha kwetegereza. Tekerezaaho ekyokurorraho kinu. Omu Abarumi 12:11, Omukristaayo ow’arukumanywa nk’omukwenda Paulo akakozesa ekigambo ekirukumanyisa “omwoyo kucamuka.” Nk’oku ekigambo eki kitarukwihayo kurungi amakuru omu Rungereza orukukozesebwa kasumi kanu, empindura eya New World Translation ehandiikirwemu orukarra oru omu mulingo ogwanguhire kwetegereza. Nirugamba ngu Abakristaayo basemeriire “kutagata omu mwoyo.”

 Kwongerra ha kukozesa ibara lya Ruhanga, kubamu ebintu ebihikire hamu n’okwihayo kurungi ensonga, empindura eya New World Translation ine ekintu kindi eky’embaganiza: Egabwa hataroho kusasura sente. Ekirugiremu, obukaikuru n’obukaikuru bw’abantu nibasobora kusoma Baibuli omu rulimu rwabo​—otwaliremu naabo abatarukusobora kugura Baibuli.