Abanefirimu Baali Nubo Baha?
Abanefirimu Baali Nubo Baha?
Eky’okugarukamu kuruga omu Baibuli
Abanefirimu bakaba bali bantu abakooto muno, abaali baine amaani agatali ga buli kiro, abagonzaaga kurwana, kandi bakazaarwa bamalaika ababi obubaateraine n’abakazi ab’omu nsi omu biro bya Nuha. a
a Ekigambo eky’Oruheburaniya ekihindurwa “Nefirimu” nikisobora kuba nikimanyisa “Abanagi.” Ekitabu Wilson’s Old Testament Word Studies kigamba ngu ekigambo kinu kimanyisa abo “abagwera abantu nibabarwanisa, nibabanyaga kandi nibabaletera kugwa.”
Ebyahandiikirwe omu Baibuli bigamba ngu “abana ba Ruhanga bakarora abahara babantu bali barungi.” (Okubanza 6:2) “Abana ba Ruhanga” abo baali bali bihangwa eby’omwoyo ebyajeemiire Ruhanga ‘obubalekere ekiikaro kyabo ekyabasemeriire’ omu iguru, bajwara emibiri y’abantu kandi ‘baaswera abakazi omu bona ababakomeremu.’—Yuda 6; Okubanza 6:2.
Abaana abakooto abaarugire omu kikorwa kinu baali batali ba buli kiro. (Okubanza 6:4) Abanefirimu bakaba bali bantu abakooto muno, abakaali, abaayenderezaaga abantu, kandi abaijwize ensi okurwana. (Okubanza 6:13) Baibuli ebabazaaho ‘nk’abamaani abaabandize ira, abantu abaarangainwe.’ (Okubanza 6:4) Bakasiga enyuma ekirale ky’okurwana n’okutiina.—Okubanza 6:5; Okubara 13:33. b
b Nikizooka ngu entasi ez’Abaisaleri ezirukubazibwaho omu Okubara 13:33 zikarora abantu abakooto abaaziijukize Abanefirimu abaali bafiire kumara ebyasa bingi enyuma.—Okubanza 7:21-23.
Ebisuba ebirukukwata hali Abanefirimu
Ekisuba: Abanefirimu bakyaroho omu nsi kasumi kanu.
Amananu: Yahwe akaleetaho okusandaara kw’amaizi okwahwerekeriize ensi ey’akasumi ako ey’ekaba ijwire obubi. Abanefirimu bakahwerekerezebwa otwaliiremu n’abantu abandi ababi. Kwahukanaho n’abantu ababi, Nuha n’eka ye bakasiimwa omu maiso ga Yahwe kandi nubo bonka baakizireho omu kasumi ako.—Okubanza 6:9; 7:12, 13, 23; 2 Petero 2:5.
Ekisuba: Baise b’Abanefirimu baali bantu.
Amananu: Baisebo nibeetwa “abana ba Ruhanga.” (Okubanza 6:2) Baibuli ekozesa ekigambo nikyo kimu obw’eba n’ebazaaho bamalaika. (Yobu 1:6; 2:1; 38:7) Bamalaika baali baine amaani ag’okujwara emibiri y’abantu. (Okubanza 19:1-5; Yosuha 5:13-15) Omukwenda Petero akabazaaho “emyoyo [ey’ekaba] eri omu nkomo, nubo batarahuliire ira okugumisiriza kwa Ruhanga obukwaikaire omu biro bya Nuha.” (1 Petero 3:19, 20) Omuhandiiki wa Baibuli Yuda obw’akaba n’abazaaho enyikara niyo emu akasoborra ngu bamalaika abamu “[batalinde] obukuru bwabu bonka, baitu bakaleka ekiikaro kyabu bonka ekyabasemeriire.”—Yuda 6.
Ekisuba: Abanefirimu baali bamalaika abaali banagirwe kuruga omu iguru.
Amananu: Ebigambo ebyetoroire ekyahandiikirwe eky’omu Okubanza 6:4 nibyoleka ngu Abanefirimu baali batali bamalaika, baitu bakaba bali baana abaazairwe bamalaika abaajwaire emibiri y’abantu baterana n’abakazi ab’omu nsi. Hanyuma ya bamalaika “[kuswera] abakazi omu bona ababakomeremu,” Yahwe akagamba ngu omu myaka 120 akaba naija kugira ekiyakoraho hali ensi ey’akasumi ako ey’ekaba etarukumworobera. (Okubanza 6:1-3) Ebyahandiikirwe byongera bigamba ngu “omu biro biri,” bamalaika abaali bajwaire emiri y’abantu bakagumizaamu ‘nibaterana n’abahara b’abantu’ kandi baazaara abaana “[ab’amaani] ababandize ira,” kandi abo nubo Abanefirimu.—Okubanza 6:4.
Nosobora Kugonza na Binu;
EBIRUKUTUKWATAHO
Saba Kubungirwa
Tunga eky’okugarukamu ky’ekikaguzo kyawe, rundi omanye ebirukukiraho ebirukukwata h’Abakaiso ba Yahwe.