Nk’Oku Yahandiikirwe Marako 1:1-45
-
Yohana Omubatizi atebeza (1-8)
-
Okubatizibwa kwa Yesu (9-11)
-
Sitaani ayohya Yesu (12, 13)
-
Yesu atandika kutebeza omu Galiraaya (14, 15)
-
Ayeta abegeswa ab’okubanza (16-20)
-
Abinga emyoyo emibi (21-28)
-
Yesu akiza baingi omu Kaperenaumu (29-34)
-
Asaba ali wenka omu kiikaro ekitarumu bantu (35-39)
-
Akiza omugenge (40-45)
1 Okutandika okw’amakuru amarungi agarukukwata hali Yesu Kristo, Omwana wa Ruhanga:
2 Nk’oku nabbi Isaya yahandiikire ati: “(Dora! Nintuma omukwenda wange, aragenda akwebembiire, arakuteekaniriza omuhanda.)
3 Iraka ly’ogu arukwamirra omu irungu naagamba ati: ‘Muteekanize omuhanda gwa Yahwe! Muterekereze emihanda ye.’”
4 Yohana Omubatizi* akaba ali omu irungu, naatebeza abantu ngu babatizibwe nk’akokurorraho akarukwoleka ngu begarukiremu nukwo baganyirwe ebibi.
5 Kandi abantu boona ab’omu bicweka bya Buyudaaya, n’abantu ab’omu Yerusalemu boona, baali nibaija nambere ali, yababatiza omu Kyambu Yorudaani, kandi baayatura ebibi byabo omu rwijwire.
6 Yohana akaba ajwaire ekijwaro ekikozerwe omu byoya by’engamiya, ayesibire omweko gw’oruhu kandi yalyaga enzige n’obwoki obw’omu kisaka.
7 Akaba naatebeza naagamba ati: “Omuntu ow’arukunkira obusobozi naija ampondiire kandi tikinsemeriire kwinama kusumurra obuguha bw’enkaito ze.
8 Nyowe nkababatiza n’amaizi, baitu uwe naija kubabatiza n’omwoyo ogurukwera.”
9 Omu biro ebi, Yesu akaruga Nazaleesi eya Galiraaya yaija, Yohana yamubatiza omu Yorudaani.
10 Ahonaaho Yesu obu yarugire omu maizi, akarora iguru nirikinguka kandi omwoyo ogurukwera gwamusirimukaho omu kisisani ky’eriiba.
11 Kandi iraka likaruga omu iguru nirigamba ngu: “Niiwe Mwana wange, ou ndukugonza muno; ou nsiimire.”
12 Ahonaaho omwoyo gwamuhambiriza kugenda omu irungu.
13 Kandi akaikara omu irungu kumara ebiro 40, naayohebwa Sitaani. Akaba ali n’ebisoro eby’omu kisaka, baitu bamalaika bakaba nibamukonyera.
14 Hanyuma ya Yohana kukwatwa, Yesu akagenda Galiraaya yatebeza amakuru amarungi agarukukwata hali Ruhanga,
15 naagamba ati: “Akasumi akatairweho kahikire, kandi Obukama bwa Ruhanga bwiriire haihi. Mwegarukemu, kandi mwikiririze omu makuru amarungi.”
16 Obu akaba naarubata ha musa gw’Enyanja ya Galiraaya, yarora Simooni na mugenzi wa Simooni arukwetwa Andereya, nibanaga ebitimba omu nyanja habwokuba bakaba bali basohi.
17 Yesu yabagambira ati: “Mumpondere kandi ndibafoora basohi b’abantu.”
18 Ahonaaho baalekaho ebitimba byabo, baamuhondera.
19 Hanyuma y’okweyongerayo omu maiso kake, yarora Yakobo, mutabani wa Zebedaayo na mugenzi we Yohana, bali omu lyato lyabo nibasona ebitimba byabo,
20 ahonaaho yabeeta. Kandi baalekaho isebo Zebedaayo omu lyato, hamu n’abakozi, baagenda baahondera Yesu.
21 Baagenda Kaperenaumu.
Sabbiti* obu yahikire, yagenda omu isorrokaniro yatandika kwegesa.
22 Kandi abantu baahunirra habw’omulingo yayegeseze, habwokuba akaba naabeegesa nk’omuntu anyakwine obusobozi hatali nk’abahandiiki.*
23 Omu kaire ako, omu isorrokaniro hakaba harumu omusaija arukutalibanizibwa omwoyo omubi, yatokera haiguru naagamba ati:
24 “Otutuzire ki, iwe Yesu Omunyanazaleesi? Oizire kutuhwerekereza? Nkumanyire, niiwe Arukwera owa Ruhanga!”
25 Baitu Yesu yagucoomera naagamba ati: “Culeera, kandi omurugemu!”
26 Hanyuma y’omwoyo omubi kunaga hansi omusaija, kandi naasambagana naatokera haiguru, gwamurugamu.
27 Abantu baahunirra muno kandi baatandika kugambirangana bati: “Kinu kiki? Nyegesa mpyaka! Aine n’obusobozi obw’okuragira emyoyo emibi n’emworobera.”
28 Amakuru agarukumukwataho, gaararanga bwangu omu bicweka byona ebya Galiraaya.
29 Hanyuma y’ebi, baaruga omu isorrokaniro, baagenda omu ka ya Simooni na Andereya, bali na Yakobo na Yohana.
30 Nyinazaara Simooni akaba abyamire hansi arwaire omuswija, kandi ahonaaho baagambira Yesu.
31 Yagenda nambere ali, yamukwata omukono yamwimukya. Omuswija gwakira kandi yatandika kubaheereza.
32 Obu bwahikire rwebagyo, izooba limazire kugwa, abantu baatandika kumuleetera boona abaali barwaire n’abarukutalibanizibwa daimooni;
33 kandi abantu ab’omu rubuga boona baayesorooleza ha mulyango.
34 Yakiza baingi abaali barwaire endwaire ezirukwahukana, yabinga daimooni nyingi, baitu ataziikirize kubaza habwokuba zaali zimumanyire ngu nuwe Kristo.
35 Nyenkyakara muno hakyaliyo omwirima, akaimuka yaturuka aheeru, yagenda omu kiikaro ekitarumu bantu yatandika kusaba.
36 Baitu Simooni, n’abo abaakaba ali na bo baamuserra
37 kandi baamuzoora. Obu baamurozere, baamugambira bati: “Abantu boona nibakuserra.”
38 Baitu yabagambira ati: “Leka tugende omu biikaro ebindi, omu mbuga eziri haihi, naho ntebezeeyo, habwokuba enu niyo ensonga habwaki naizire.”
39 Yagenda omu Galiraaya yoona naatebeza omu masorrokaniro gaabo kandi naabinga daimooni.
40 Omugenge yaija nambere ali, yamwesengereza atiize amaju, yagamba ati: “Obu oraaba nogonza, nsemeza.”
41 Yesu yamukwatirwa embabazi, yagorra omukono gwe, yamukwataho kandi yamugambira ati: “Ningonza! Semezebwa.”
42 Ahonaaho yakira ebigenge* kandi yasemezebwa.
43 Hanyuma yamuha ebiragiro yamugambira agende,
44 naamuteererra ati: “Otagambira omuntu weena, baitu genda oyeyoleke hali nyakatagara, kandi habw’okusemezebwa kwawe, oheyo ebintu Musa ebi yaragiire, nk’obwakaiso hali bo.”
45 Baitu omusaija ogu obu yagenzere, yatandika kurarangya ekyali kibaireho, n’okukibazaaho hoona-hoona kandi kinu kyaleetera Yesu kulemwa kutaaha omu rubuga bwerebwere, baitu yaikara aheeru omu biikaro ebitarumu bantu. Kandi abantu bakaikara nibamwizira kuruga omu mbaju zoona.
Obugambo Obuli Hansi
^ Rundi, “Omubatiza.”
^ Rora, Kusoborra Ebigambo.
^ Rora, Kusoborra Ebigambo. “Omuhandiiki.”
^ Rora, Kusoborra Ebigambo.
