Nk’oku Yahandiikirwe Matayo 8:1-34
8 Hanyuma y’okusirimuka kuruga ha rusozi, ekitebe ky’abantu baingi kikamuhondera.
2 Kandi dora! omugenge akaija nambere ali, yateeza amaju omu maiso ge, yamwesengereza naagamba ati: “Mukama wange, obu oraaba noogonza, nosobora kunsemeza.”
3 Yesu yagorra omukono gwe yamukwataho, yamugambira ati: “Ningonza! Semezebwa.” Ahonaaho, ebigenge bye byakira.
4 Nubwo Yesu yamugambira ati: “Otagambira omuntu weena, baitu genda oyeyoleke hali nyakatagara, kandi oheyo ekisembo Musa eki yaragiire, nk’obwakaiso hali bo.”
5 Yesu obu yataahire omu Kaperenaumu, omukuru w’ihe akaija nambere ali,
6 yamwesengereza naagamba ati: “Waitu, omwiru wange abyamire omu nju asaraire, kandi naasaasa muno.”
7 Yamugarukamu ati: “Obu ndahikayo ninyija kumukiza.”
8 Omukuru w’ihe yamugarukamu ati: “Tikimpikiriire okukuraaliza omu nju yange, baza kwonka ekigambo, omwiru wange arakira.
9 Na nyowe ndi hansi y’obusobozi obw’abantu abandi, kandi nyine abaserikale abandukwebembera. Obu ngambira omu nti, ‘Genda!’ agenda, kandi n’obu ngambira ondi nti, ‘Ija!’ aija, obu ngambira omwiru wange nti, ‘Kora kinu!’ akikora.”
10 Yesu obu yahuliire ebi, yahunirra muno kandi yagambira abo abakaba nibamuhondera ati: “Nimbagambira amananu ngu, tinkarozere omuntu weena omu Isaleri, ow’aine okwikiriza okw’amaani nka kunu.
11 Baitu nimbagambira nti, baingi kuruga burugaizooba na bugwaizooba baliija baikarre ha meeza na Iburahimu, na Isaka, na Yakobo omu Bukama obw’omu iguru;
12 baitu abaana b’Obukama balinagwa aheeru omu mwirima. Kandi oku nuho baliririrra kandi bakanena ensaya zaabo.”
13 Hanyuma, Yesu yagambira omukuru w’ihe ati: “Genda, habwokuba oyolekere okwikiriza, leka eki osabire kikorwe.” Kandi omu saaha egi, omwiru we akakira.
14 Yesu obu yaizire omu nju ya Petero, akasanga nyinazaara Petero abyamire arwaire omuswija.
15 Nubwo Yesu yamukwata ha mukono, kandi omuswija gwakira, yaimuka yatandika kumuheereza.
16 Obu bwahikire rwebagyo, abantu baamuleetera abantu baingi abarukutalibanizibwa daimooni, kandi yabinga emyoyo emibi n’ekigambo kimu kandi yakiza boona abaali nibabonabona,
17 nukwo kihikiirize ebyagambirwe kuraba omuli nabbi Isaya ngu: “Nuwe yatwaire obusaasi bwaitu kandi yayetweka endwaire zaitu.”
18 Yesu obu yarozere ekitebe ky’abantu kimwehinguliriize, yagambira abegeswa be bagende nseeri.
19 Kandi omuhandiiki akaija nambere ali yamugambira ati: “Mwegesa, ndakuhondera hoona nambere oragenda.”
20 Baitu Yesu yamugarukamu ati: “Eboha ziine ebiina, n’ebinyonyi biine ebiju, baitu Omwana w’omuntu taine ah’okuteeka omutwe gwe.”
21 Kandi ondi h’abegeswa be yamugambira ati: “Mukama wange, nyikiriza mbanze ngende nziike isenyowe.”
22 Yesu yamugarukamu ati: “Ikara nompondera, kandi oleke abafu baziike abafu baabo.”
23 Obu yatembere eryato, abegeswa be baamuhondera.
24 Kandi dora! obu bakaba bali ha nyanja, hakaija ekiyaga eky’amaani,* ebigonzi byatandika kusweka eryato; baitu Yesu akaba agwijagiire.
25 Kandi baija baamwimukya baamugambira bati: “Mukama waitu, tujune, twagenda kuhwerekerra!”
26 Baitu yabagambira ati: “Habwaki mutiinire muno, inywe abaine okwikiriza okuke?” Nubwo yaimuka yacoomera ekiyaga n’enyanja, byatekaana.
27 Abegeswa be baahunirra kandi baagamba ngu: “Onu muntu wa mulingo ki? Ekiyaga n’enyanja nabyo nibimworobera!”
28 Obu yahikire nseeri y’enyanja, omu kicweka ky’Abagadarene, abasaija babiri abaine daimooni, abakaba nibaruga omu kiikaro ekirumu ebituuro, baija kumutangatangana. Bakaba bali bakaali muno kandi busaho muntu akaba aine obumanzi obw’okuraba omu muhanda ogu.
29 Baamwamirra nibagamba bati: “Notutura ki, iwe Omwana wa Ruhanga? Oizire kutubonabonesa akasumi akaatuteriirweho katakahikire?”
30 Haihi n’ekiikaro eki, hakaba haroho igana ly’empunu nizirya.
31 Daimooni zatandika kumwesengereza nizigamba ngu: “Obu oratubinga, tusindike omu igana ly’empunu.”
32 Kandi yazigambira ati: “Mugende!” Daimooni zabarugamu zagenda omu mpunu. Igana lyona ery’empunu likajumbutuka, lyairuka lyagwa omu nyanja, lyafeera omu maizi.
33 Abaali nibaziriisa, bairuka baagenda omu rubuga baagambira abantu ebintu byona ebyabaireho, otwaliiremu n’ebyahikire h’abasaija abakaba baine daimooni.
34 Kandi dora! ab’omu rubuga boona baayesorooza kwija kutangatangana Yesu, kandi obu baamurozere, baamwesengereza aruge omu kiikaro kyabo.
Obugambo Obuli Hansi
^ Rundi, “ihunga ery’amaani.”
