Nk’Oku Yahandiikirwe Yohana 20:1-31
20 Ekiro ky’okubanza omu wiiki, Malyamu Magadalene akaija ha kituuro, nyenkyakara muno omwirima gukyakwasire, yarora ibaale liihirwe ha kituuro.
2 Nahabweki yairuka yaija hali Simooni Petero n’omwegeswa ondi Yesu ou yagonzaaga muno, kandi yabagambira ati: “Mukama waitu bamwihire omu kituuro, kandi titumanyire nambere bamutaire.”
3 Nubwo Petero n’omwegeswa ogu ondi baagenda ha kituuro.
4 Boona babiri baagenda nibairuka, baitu omwegeswa ondi yairuka yarabaho Petero kandi yamubanza ha kituuro.
5 Obu yahikireyo, yainama yalinguza yarora engoye z’ekitaani ziri hansi baitu atataahemu.
6 Hanyuma Simooni Petero na uwe yaija amuhondiire kandi yataaha omu kituuro. Kandi yarora engoye z’ekitaani ziri hansi.
7 Orugoye orukaba rusibirwe ha mutwe gwe rukaba rutali hamu n’ezindi ezi bakaba bamuzingiremu, baitu rukaba ruzingirwe ruli rwonka.
8 Hanyuma omwegeswa ogu ondi ayabandize kuhika ha kituuro na uwe yataahamu, yarora kandi yaikiriza.
9 Habwokuba bakaba bateetegeriize ekyahandiikirwe ekirukugamba ngu, asemeriire kuhumbuurwa kuruga omu bafu.
10 Nubwo abegeswa baagaruka owabu bo.
11 Baitu Malyamu yaikara ayemeriire aheeru haihi n’ekituuro narra. Obu akaba naakyarra, yainama yalinguza omu kituuro,
12 kandi yarora bamalaika babiri bajwaire ebirukwera baikaliire nambere omubiri gwa Yesu baali bagubyamize, omu aikaliire nambere omutwe gukaba guli, kandi ondi aikaliire nambere amaguru gakaba gali.
13 Baamugambira bati: “Mukazi, habwaki norra?” Yabagambira ati: “Batwaire Mukama wange kandi timmanyire nambere bamubyamize.”
14 Hanyuma y’okubaza eki, yahinduka enyuma yarora Yesu ayemeriire aho, baitu ateetegereze ngu ni Yesu.
15 Yesu yamukaguza ati: “Mukazi iwe, habwaki norra? Noserra oha?” Malyamu yateekereza ngu muntu ow’arukukora omu musiri, yamugambira ati: “Waitu, obu oraaba niiwe omwihiremu, ngambira nambere omubyamize, kandi ndamwihayo.”
16 Yesu yamugambira ati: “Malyamu!” Malyamu yahinduka yamugambira omu Ruheburaniya ati: “Rabboni!” (ekirukumanyisa, “Omwegesa!”)
17 Yesu yamugambira ati: “Leka kunkwata habwokuba tinkagarukire hali Isenyowe. Baitu genda hali bagenzi bange obagambire oti: ‘Ningenda hali Isenyowe kandi Isiinywe, hali Ruhanga wange kandi Ruhanga wanyu.’”
18 Malyamu Magadalene yaija yagambira abegeswa ati: “Ndozere Mukama waitu!” Yabagambira Yesu ebi akaba amugambiire.
19 Orwebagyo orw’ekiro eki, ekiro eky’okubanza omu wiiki, abegeswa bakaba beekingiire omu nju habwokuba bakaba nibatiina Abayudaaya, Yesu yaija yayemerra hagati yabo, yabagambira ati: “Obusinge bube na inywe.”
20 Obu yamazire kubaza eki, yabooleka emikono ye n’orubaju rwe. Abegeswa be boona baasemererwa habw’okumurora.
21 Yesu yayongera yabagambira ati: “Obusinge bube na inywe. Nk’oku Isenyowe yantumire, na nyowe nimbatuma.”
22 Hanyuma y’okubaza ebi, yabahuuhaho orwoya kandi yabagambira ati: “Mutunge omwoyo ogurukwera.
23 Obu muraganyiraga ebibi by’omuntu weena, birimuganyirwa; kandi obu mutaliganyira ebibi eby’omuntu weena, tibirimuganyirwa.”
24 Baitu Tomasi, omu ha ikumi na babiri kandi ayayetwaga Omurongo, akaba atali na bo Yesu obu yaizire.
25 Nahabweki abegeswa abandi baamugambira bati: “Turozere Mukama waitu!” Baitu yabagambira ati: “Tindukwija kwikiriza kuhikya obu ndarora enkojo z’emisumaali ha mikono ye kandi nkacumita orukumu rwange omu nkojo z’emisumaali kandi nkateeka omukono gwange omu rubaju rwe.”
26 Harabireho ebiro munaana, omurundi ogundi abegeswa be bakaba bali omu nju, kandi Tomasi na uwe akaba ali na bo. N’obu kiraaba ngu enyigi zikaba zikingire, Yesu yaija yayemerra hagati yabo, yabagambira ati: “Obusinge bube na inywe.”
27 Hanyuma yagambira Tomasi ati: “Ekyara kyawe kiteeke hanu, orole emikono yange, kandi oteeke omukono gwawe omu rubaju rwange nukwo oikirize, oleke kugurukyagurukya.”
28 Tomasi yamugarukamu ati: “Mukama wange kandi Ruhanga wange!”
29 Yesu yamugambira ati: “Waikiriza habwokuba ondozere? Baine okusemererwa abo abaikiriza, batarozere.”
30 Amananu gali, Yesu akakora ebyamahano ebindi bingi omu maiso g’abegeswa be ebitahandiikirwe omu muzingo gunu.
31 Baitu binu bihandiikirwe nukwo musobole kwikiriza ngu Yesu nuwe Kristo, Omwana wa Ruhanga, kandi habw’okwikiriza, musobole kutunga obwomeezi kuraba omu ibara lye.
