Naiwe kyeyongiire kukugumira kubaganiza amananu hali ebisuba? Kasumi kanu, abantu baikiririza omu bintu nibasigikirra ha mulingo barukwehurra rundi ha ntekereza yabo omu kiikaro ky’okusigikirra h’amananu n’obwakaiso obuhikire. Ekyokurorraho, abantu baingi omu nsi baikiriza ngu tihakyaroho amananu.

 Entekereza egi ikaireho kuruga na kara. Emyaka nka 2,000 enyuma, Omulemi wa Rooma arukwetwa Pontio Pirato omu mulingo ogw’okusekereza akakaguza Yesu ati: “Amananu nikyo kiki?” (Yohana 18:38) N’obukiraaba ngu atalinde Yesu kumugarukamu, ekiyakagwize kyali kikuru. Baibuli egarukamu ekikaguzo eki omu mulingo ogurukunanura, kandi nikisobora kukukonyera kumanya ekihikire n’ekitahikire omu nsi enu nambere abantu barukwikiriza ngu tiharoho amananu.

Amananu Go Garoho?

 Ego. Baibuli ekozesa ekigambo “amananu” kumanyisa ekintu ekihikire. Eyegesa ngu Yahwe a Ruhanga nuwe ndugirro y’amananu kandi emubazaaho nka “Ruhanga owamananu.” (Zabuli 31:5) Baibuli erumu amananu agaruga hali Ruhanga kandi egalegesaniza n’ekyererezi, habwokuba gatukonyera kumanya ekihikire omu nsi enu nambere baingi babuzabuziibwe.—Zabuli 43:3; Yohana 17:17.

N’osobora ota kuzoora amananu?

 Ruhanga tarukugonza tumale gaikiririza omu mananu agali omu Baibuli. Oihireho, atutererra kwekebiija ebirumu nitukozesa obusobozi bwaitu obw’okwetegereza omu kiikaro ky’okusigikirra ha nyehurra zaitu. (Abarumi 12:1) Nagonza tumwegeho kandi tweyongere kumugonza nitukozesa ‘amagezi gaitu goona,’ kandi atwekambisa kukigumya ngu ebiturukwega omu Baibuli nugo mananu.—Matayo 22:37, 38; Engeso Ezabakwenda 17:11.

Ebisuba bikaruga nkaha?

 Baibuli egamba ngu omunyanzigwa wa Ruhanga arukumanywa nka Sitaani Diabolo nuwe yatandikireho ebisuba. Baibuli emweta “ise ebisuba.” (Yohana 8:44) Akagambira abantu ab’okubanza ebisuba, kandi yahangirra Ruhanga. (Okubanza 3:1-6, 13, 17-19; 5:5) Kuruga obu, Sitaani aikaire nararangya ebisuba kandi alemesa abantu kumanya amananu agarukukwata hali Ruhanga.—Okusuku’rwa 12:9.

Habwaki ebisuba bikanyire kasumi kanu?

 Omu kasumi kanu Baibuli akeyeta ‘ebiro bya hanyuma,’ Sitaani ayeyongiire kubiihabiiha abantu omu nsi yoona. Abantu bakira kubiiha abandi nukwo batunge ebibarukwetaaga. (2 Timoseo 3:1, 13) Ebisuba byeyongiire omu madiini agarukukira obwingi. Baibuli ekaranga ngu omu kasumi akaturumu, abantu “balyetungira abegesa nkokwegomba kwabu okukuli,” nukwo babagambire ebibarukugonza kuhurra kandi ‘baliigara amatu gaabo okuleka amazima.’—2 Timoseo 4:3, 4.

Habwaki amananu g’omugaso?

 Kusobora kwesigangana, abantu nibetaaga kumanya amananu. Nambere hatali obwesigwa obunywani buhwaho kandi n’abantu tibakoragana. Baibuli egamba ngu Ruhanga nagonza okuramya kwaitu kusigikirre h’amananu. N’egamba eti: “Nabo [abaramya Ruhanga] kibahikiriire okumuramya omu mwoyo namananu.” (Yohana 4:24) Kumanya omulingo amananu kuruga omu Baibuli gasobora kukukonyera kumanyirra enyegesa z’ediini ez’ebisuba n’okuzecwaho, soma ebicweka ebiri hansi y’omutwe “Ebisuba Ebiretera Abantu Kunoba Ruhanga.”

Habwaki Ruhanga nagonza omanye amananu?

 Ruhanga nagonza otunge obwomeezi obutahwaho, kandi kusobora kubutunga osemeriire kwega amananu agarukumukwataho. (1 Timoseo 2:4) Kakuba omanya endengo za Ruhanga ezirukukwata ha kihikire n’ekitahikire kandi okazihondera, noija kufooka munywani we. (Zabuli 15:1, 2) Ruhanga akasindika Yesu omu nsi nukwo akonyere abantu kumanya amananu. Kandi Ruhanga nagonza tuhurre Yesu ebiyayegeseze.—Matayo 17:5; Yohana 18:37.

Ruhanga alimaraho ebisuba?

 Ego. Tikisemeza Ruhanga abantu obubabiiha abandi nukwo batunge ebibarukwetaaga. Araganiize kuhwerekereza boona abaikara nibabaza ebisuba. (Zabuli 5:6) Obwalikora eki, naija kuhikiiriza omurago ogurukugamba ngu: “Eminwa eyamazima eragumahoga ebiro byona.”—Enfumo 12:19.