ESUURA 37

Mbatizibwe?

Tekaho emanyikirizo ha kihikire rundi tikihikire:

Abakristaayo basemeriire kubatizibwa.

□ Kihikire

□ Tikihikire

Ekigendererwa ekikuru eky’okubatizibwa kiri ky’okukulinda otagwa omu kibi.

□ Kihikire

□ Tikihikire

Okubatizibwa kukuteeka omu muhanda ogw’okujunwa.

□ Kihikire

□ Tikihikire

Obworaaba otabatiziibwe, Ruhanga tarukwija kukujunaana habw’ebikorwa byawe.

□ Kihikire

□ Tikihikire

Banywani baawe obubaraaba nibabatizibwa, nikimanyisa ngu naiwe ohikire kubatizibwa.

□ Kihikire

□ Tikihikire

OBWORAABA n’ohondera endego za Ruhanga omu bwomeezi bwawe, n’okurakuraniza enkoragana enungi na Ruhanga, kandi n’ogambira abandi ebirukukwata ha kwikiriza kwawe, tikirukuhuniriza ngu n’otekerezaaho okubatizibwa kwawe. Baitu orakimanya ota obworaaba ohikire? Kukukonyera kugarukamu ekikaguzo eki, leka tubazeeho ebiri omu kicweka ekiri eruguru ekya kihikire rundi tikihikire.

● Abakristaayo basemeriire kubatizibwa.

Kihikire. Yesu akaragira ngu abegeswa be babatizibwe. (Matayo 28:19, 20) Kandi, na Yesu wenyini akabatizibwa. Kusobora kuhondera Kristo, n’oyetaaga kubatizibwa obworukuba okuzire ekirukumara kukora encwamu egi kandi oyegondiize kuruga ha mutima.

● Ekigendererwa ekikuru eky’okubatizibwa kiri ky’okukulinda otagwa omu kibi.

Tikihikire. Kubatizibwa kokurorraho ak’omu rwijwire akarukwoleka ngu oyehaireyo hali Yahwe. Okwehayo kwawe teri ndangaano ey’ekutanga kukora ebintu ebiwakugondeze kukora omu nsita. Oihireho, ohayaho obwomeezi bwawe hali Yahwe habwokuba n’ogonza kworobera endengo ze omu bwomeezi bwawe.

● Okubatizibwa kukuteeka omu muhanda ogw’okujunwa.

Kihikire. Baibuli n’egamba ngu kubatizibwa rutambu rukuru muno kusobora kujunwa. (1 Petero 3:21) Baitu tikirukumanyisa ngu kubatizibwa nikusisana na insuwarensi, ey’ogura kukulinda kakuba habaho ekigwererezi. Obatizibwa habwokuba n’ogonza Yahwe kandi n’ogonza kumuheereza n’omutimwa gwawe gwona habw’ebiro n’ebiro.​—Marako 12:29, 30.

● Obworaaba otabatiziibwe, Ruhanga tarukwija kukujunaana habw’ebikorwa byawe.

Tikihikire. Yakobo 4:17 n’egamba eti: “Nukwo arukumanya okukora kurungi, kandi atarukukora, eki kiba kibi haluwe”​—kaabe abatizibwe rundi nangwa. Nahabweki kakuba oba omanyire ky’okukora ekihikire kandi okuzire ekirukumara kwekorra encwamu, obundi kanu nuko kasumi obazeeho ensonga enu na muzaire wawe rundi Omukristaayo ow’akuzire omu by’omwoyo. Omu mulingo ogu, noija kumanya nk’oku osobora kukurakurana kuhika ha idaara ly’okubatizibwa.

● Banywani baawe obubaraaba nibabatizibwa, nikimanyisa ngu naiwe ohikire kubatizibwa.

Tikihikire. Encwamu ey’okubatizibwa esemeriire kuruga ha mutima gwawe oyegondiize. (Zabuli 110:3) Kusobora kubatizibwa, osemeriire kuba n’omanya kurungi nikitwarramu ki kuba omu h’Abakaiso ba Yahwe, kandi oyetekaniize kuhikiriza obujunanizibwa obu.​—Omugambizi 5:4, 5.

Encwamu ey’Ehindura Obwomeezi

Kubatizibwa eri ncwamu ey’ehindura obwomeezi kandi ey’ereta emigisa nyingi. Baitu akasumi nuko kamu, kitwarramu obujunanizibwa obw’amaani, obw’okuhikiriza okwehayo okuwayeragire hali Yahwe.

Oli haihi kuhika ha rutambu oru? Obukiraaba nukwo kiri, haroho ensonga enungi habwaki osemeriire kusemererwa. Omugisa ogurukukira endi yoona gukulindiriire, ogw’okuheereza Yahwe n’omutima gwawe gwona kandi n’okutwaza obwomeezi bwawe omu mulingo ogurukwoleka ngu okehayo kwo hali uwe.​—Matayo 22:36, 37.

OMU SUURA ERUKUHONDERAHO

Yega omulingo osobora kweteraho ebigendererwa nukwo osobole kukozesa kurungi obwomeezi bwawe.

EKYAHANDIIKIRWE

“Muheyo emibiri yanyu nkekyonzira ekyomiire, ekirukwera, ekisemeriire Ruhanga, nukwo kuhereza kwanyu okwamagezi.”​—Abarumi 12:1.

AMAGEZI

Nokonyerwa abazaire baawe, serra omuntu omu kitebe ow’asobora kukukonyera kukurakurana omu by’omwoyo.​—Engeso Ezabakwenda 16:1-3.

OBAIRE OKIMANYIRE . . . ?

Kubatizibwa kicweka ekikuru ‘eky’akokurorraho’ ak’okujunwa.​—Ezekyeri 9:4-6.

EKY’OSOBORA KUKORA!

Kusobora kukurakurana nkahika ha kubatizibwa, ningenda kwongera ha kumanya kwange okwenyegesa zinu eza Baibuli: ․․․․․

Ekinakugondeze kukaguza omuzaire (rundi abazaire bange) ha nsonga enu kiri ․․․․․

NOTEEKEREZA KI?

● Habwaki kubatizibwa ruli rutambu rukuru?

● Kiki ekisobora kuletera omwana kubatizibwa atakahikire?

● Nsonga ki etahikire ey’esobora kuletera omwana kwanga kwehayo n’okubatizibwa?

[Ebigambo ebikomerwemu]

Kukimanya ngu nkabatizibwa kinkonyera kukora encwamu ez’amagezi, kandi n’okwerinda kukora ebintu ebyakundugiiremu akabi.’’​—Holly

[Akasanduuko/​Ekisisani]

Ebikaguzo Abantu Bakira Kwekaguza ha Kubatizibwa

Kubatizibwa nikimanyisa ki? Kwibikwa omu maizi nikimanyisa ngu ofiire obukirukuhika ha kukora eby’ogonza omu bwomeezi bwawe, kandi kugarugamu nikimanyisa ngu hati oyomiire kukora Yahwe eby’agonza.

Nikimanyisa ki kuhayo obwomeezi bwawe hali Yahwe? Nikimanyisa kwefereza kukora ebyogonza, okaraganiza kwebembeza Ruhanga ebyagonza omu bwomeezi bwawe. (Matayo 16:24) Nahabweki nikyetaagisa kusaba hali Yahwe n’oyehayo hali uwe otakabatiziibwe.

Biki eby’osemeriire kuba n’okora otakabatiziibwe? Osemeriire kuba n’oyorobera Ekigambo kya Ruhanga omu bwomeezi bwawe kandi n’ogambira abandi ebirukukwata ha kwikiriza kwawe. Osemeriire kukurakuraniza enkorangana enungi na Ruhanga kurabira omu kusaba n’okwesomesa Ekigambo kye. Osemeriire kuba n’oheereza Yahwe habwokuba nikyo oyecweriiremu kukora, hatali habw’okusindikirizibwa abandi.

Haroho emyaka ey’okubatirizibwaho? Emyaka teri nsonga nkuru. Baitu osemeriire kuba okuzire ekirukumara kwetegereza amakuru ag’okwehayo.

Kiki eky’osemeriire kukora kakuba oba n’ogonza kubatizibwa baitu bazaire baawe bakakugambira kulindaho? Obundi nibagonza oyeyongere kumanyirra kwetwaza nk’Omukristaayo. Huliiriza obuhabuzi bwabo, kandi okozese obwire obu kwongera kugumya enkoragana yaawe na Yahwe.​—1 Samuiri 2:26.

[Akasanduuko]

Ebikaguzo

n’otekerezaaho kubatizibwa?

Manya okukurakurana kwawe kurabira omu kugarukamu ebikaguzo n’okutekerezaaho ebigambo ebiri hansi. Kigumye ngu obandize kusoma ebyahandiikirwe ebyolekerwe otakahandiikire eby’okugarukamu byawe.

Miringo ki ey’orukwolekamu ngu n’oyesiga Yahwe kasumi kanu?​—Zabuli 71:5. ․․․․․

Oyolekere ota ngu otungire obusobozi obw’okubaganizaamu ekibi n’ekirungi?​—Abaheburaniya 5:14. ․․․․․

Osaba emirundi ingaha? ․․․․․

Omu saara zaawe, ogamba ensonga yonyini, kandi zooleka ki ha kugonza okw’oiniire Yahwe?​—Zabuli 17:6. ․․․․․

Handiika hansi ebigendererwa ebirukukwata ha kusaba ebiwakugondeze kweteraho. ․․․․․

Oyesomesa Baibuli butoosa?​—Yosuha 1:8. ․․․․․

Kwesomesa kwawe kutwarramu ki? ․․․․․

Handiika hansi ebigendererwa byona ebiwakugondeze kweteraho ebirukukwata ha kwesomesa. ․․․․․

N’otebeza n’obwekambi? (Ebyokurorraho: N’osobora kusoborra abandi amananu agarukubandirizibwaho? Ogarukira ababa boolekere okugonza? N’oyekamba kutunga omwegi wa Baibuli?)

□ Ego □ Nangwa

Ogenda omu kutebeza bazaire baawe n’obubaba batagenzere?​—Engeso Ezabakwenda 5:42.

□ Ego □ Nangwa

Handiika hansi ebigendererwa byona ebiwakugondeze kweteraho ebirukukwata ha kutebeza.​—2 Timoseo 2:15. ․․․․․

Ogenda omu nsorrokano ez’Ekikristaayo butoosa rundi haroho obw’oyosa?​—Abaheburaniya 10:25. ․․․․․

Oyejumbira ota omu nsorrokano? ․․․․․

Ogenda omu nsorrokano bazaire baawe n’obubaba batagenzere (obubaraaba nibakwikiriza kugenda wenka)?

❏ Ego ❏ Nangwa

N’osobora kugamba ngu mali kikusemeza kukora Ruhanga eby’agonza?​—Zabuli 40:8.

□ Ego □ Nangwa

N’osobora kuhandiika emirundi erukwahukana nambere wayangire kusindikirizibwa?​​—Abarumi 12:2. ․․․․․

Oyetekaniize ota kwikaza okugonza okw’oiniire Yahwe kugumire?​—Yuda 20, 21. ․․․․․

N’osobora kugumizaamu n’oheereza Yahwe kakuba abazaire n’abanywani baawe baleka kumuheereza?​—Matayo 10:36, 37.

□ Ego □ Nangwa

[Ekisisani]

Kusisanaho n’obuswere, kubatizibwa ncwamu eyehindura obwomeezi, tusemeriire kugitwara kuba nkuru muno.