DORA hati Kaini n’Aberi. Boona bakuzire. Kaini akafooka mulimi. Akalima ebintu eby’enjuma, ebijuma hamu n’eby’emikubi.

Aberi akafooka muliisa w’entaama. Akaba nagonza muno kurolerra obutaama obuto. Nukwo zikule kurungi nahabwekyo akesanga aine igana ly’entaama eryokurolerra.

Kiro kimu, Kaini na Aberi bakaleeta ebisembo hali Ruhanga. Kaini akaleeta ebimu ha byokulya ebyakaba alimire. N’Aberi akaleeta emu h’antaama ekaba n’ezooka kurungi muno. Yahwe akasiima Aberi n’ekisembo kye. Kyonka tarasimiire Kaini hamu n’ekisembo kye. Nomanya habwaki?

Kitabe ngu ekisembo ky’Aberi kyali kirungi okukira ekya Kaini. Kwonka Aberi akaba ali musaija murungi. Akaba nagonza Yahwe hamu na mugenzi we. Baitu Kaini akaba ali mubi muno; akaba atarukugonza mugenzi we.

Ruhanga akagambira Kaini kuhinduraho ha ngeso ze. Baitu Kaini atamuhulirize. Kaini akabihirwa muno ngu Ruhanga nagonza muno Aberi kukira we. Kaini akagambira Aberi: ‘Katugendeho mu musiri.’ Obu bakaba bali boonka, Kaini akatera mugenzi we Aberi muno, yamwita. Ekyo kitabe kibi muno Kaini eki Yakozire?

Nobu kyakuba ngu Aberi akafa. Ruhanga nakyamwijuka. Ruhanga tayebwa abantu abarungi nk’Aberi. Nahabwekyo, ekiro kimu Yahwe Ruhanga naija kugarurra Aberi obwomezi. Mubwire obu taligaruka kufa. Alisobora kuba mwomezi omu nsi enu ebiro byona. Tikiriba kirungi okumanya abantu abarungi nk’Aberi?

Baitu Ruhanga tasemezebwa ababi nka Kaini. Hanyuma Kaini y’okwita mugenzi we, Ruhanga akamufubira kandi yamubingira kimu kuruga ha b’enganda ze. Kaini obu yagenzire mukicweka ekindi eky’ensi, akatwara omu h’abanyanya ayafokere mukazi we.

Mubwire obu, Kaini na mukazi we bakatunga abaana. Abatabani n’abahara ba Adamu abandi bakaswerangana bazaara abaana. Bwangu abantu bakakanya muno omu nsi. Hati katwegeho hali abamu.