YUSUFU akaba ahikize emyaka 17 ey’obukuru obu bamutwaire omu Misiri. Bakamuguza omusaija owakaba namanywa nka Potifa. Potifa akaba nakora ow’omukama wa Misiri ow’akaba namanywa nka Faraho.

Yusufu akaba nakora n’amaani emirimu ya mukama we, Potifa. Obu yakuzire, Potifa akamuha obujunanizibwa bwoona obw’omu nju ye. Baitu, habwaki hati Yusufu atairwe omunkomo? Kinu kikarugirra ha mukazi wa Potifa.

Yusufu obu yakuzire akafooka musaija murungi muno, nahabwekyo mukazi wa Potifa akagonza Yusufu kubyama nawe. Yusufu akamanya ngu kinu kibi muno kandi akaba atarukusobora kukikora. Kinu kikabihiiza muno muka Potifa. Iba obu yagarukire omuka, mukaziwe akamubihirra ngu: ‘Yusufu musaija mubi muno, agondeze kubyama nanyowe!’ Potifa akaikiriza ebya mukazi we, kandi akabihirirwa muno Yusufu. Akaragira bamukwate bamuteeke munkomo.

Omusaija owakaba narolerra enkomo akarora Yusufu okuba musaija murungi. Nahabwekyo nukwo kumuha obujunanizibwa hali abanyankomo abandi. Hanyuma omwambukya n’omwokya bakabihiza Faraho. Boona bakabohwa omunkomo. Kiro, kimu buli omu akaroota ekirooto ekyembaganiza, kwonka bakaba tibarukusobora kukyetegereza. Ekiro ekyakurasireho, Yusufu yabasaba: ‘mungambire ebi murosiire.’ Obu bamazire, Yusufu nakonyerwa Ruhanga akabasoborra amakuru gaabyo.

Hali omwambukya, Yusufu akamugambira ati: ‘Mubiro bisatu noija kusumururwa kuruga omu munkomo, noija kugarukamu kukorra Faraho nkaira.’ Baitu Yusufu akamugambira ati: ‘Obwoliba orugire omunkomo ombazeho hali Faraho, onkonyere kuruga omukikaro kinu.’ Baitu oli omwokyi, Yusufu akamugambira ati: ‘Mubiro bisatu Faraho naija kukutemaho omutwe.’

Mubiro bisatu, ebintu binu byoona bikabaho nkoku Yusufu yagambire. Faraho akatemaho omutwe gw’omwokyi we. Omwambukya akamusumurra yagaruka kuhereza mukama we nkaira. Baitu omwambukya akeberwa kimu Yusufu! Nahabwekyo Yusufu akaikarra kimu omu nkomo.