NORORA ekibaireho? Omwojo onu akirize entaama ye kuruga mu maino g’edubu. Edubu likaija lyatwara entaama kugirya. Baitu omwojo akalihambya yakiza entaama ye kuruga omukanwa k’edubu. Edubu obu lyagondeze kurwana, omwojo akaliteera yaliita. Obundi akakiza entaama ye kuruga hantale. Omwojo onu tali manzi? Nomanya noha?

Onu nuwe Daudi obwakaba akyali muto. Yaikaraga omu rubuga Beterehemu. Isenkuru nuwe Obedi omwana wa Boazi na Rusi. Nobaijuka? Kandi ise wa Daudi akaba nuwe Yese. Daudi akaba muliisa w’entaama zaise. Daudi akazaarwa hanyuma y’emyaka 10 y’okukomwa kwa Saulo okuba omukama.

Obwire bukahika Yahwe obu yagambiire Samuiri ngu: ‘Twara amagita ag’omuhendo omwingi ogende omunju ya Yese ow’omu Beterehemu. Nkomere omu h’abatabani be okuba omukama.’ Samuiri obu yarozere omutabani omukuru Eryabu, nukwo kugamba mumutima gwe ati: ‘Mananu onu nuwe Yahwe akomere.’ Baitu Yahwe yamugambira ati: ‘Otarora ha buraira n’oburungi bwe, timukomere kuba omukama.’

Yese aketa omutabani we Abinadabu yamuletera Samuiri baitu Samuiri yagamba ati: ‘Nangwa n’ogu Yahwe tamukomere.’ Hanyuma Yese akaleta omutabani we Juhama. ‘Nangwa Yahwe nawe tamukomere,’ nukwo Samuiri yagambire. Nukwo Yese yaleeta abatabani be boona musanju hali Samuiri baitu Yawe atakomemu nomu. ‘Abo nibo bonka oine?’ nukwo Samuiri yakagwize.

Yese akagarukamu ati: ‘Hakyaliyo omuto omu agenzire kuliisa entaama.’ Obu Daudi yalesirwe, Samuiri akamurora okuba murungi muno. Yahwe nukwo kumugambira ati: ‘Nuwe ogu, museseho amagita.’ Kandi kinu nikyo Samuiri yakozire. Obwire bukaba nibugenda kwija Daudi abe omukama wa Isareri.