NOMANYA abasaija banu nibaha kandi kiki eki bakaba nibakora? Bakaba nibagenda omu bulemu, baitu abasaija ababebembiire nibazina. Baitu nosobora kwekaguza oti: ‘Habwaki abo abazini bataine by’okurwanisa?’ Leka turole.

Yehosafati akaba ali mukama w’obukama obw’enganda ibiri eza Isareri. Akalema omubwire obu Ahabu na Yezeberi bakaba nabo nibalema obukama obw’omumatemba obw’enganda 10. Baitu Yehosafati akaba ali mukama murungi muno nka ise Asa. Nahabwekyo obukama obw’amasirimuka bukaikara omubusinge n’abantu okuba n’obwomezi oburungi.

Baitu hakabaho ekintu ekyatiinisize abantu. Abakwenda bakaija bagambira Yehosafati bati: ‘Ihe ly’amaani kuruga omu nsi ya Moabu, Amoni hamu nab’Omurusozi orwa Seyiri niriija kukurumba.’ Abaisareri baingi bakesoroleza omu Yerusalemu okutunga obukonyezi bwa Yahwe. Bakagenda omu yekaru, kandi obu bakaba balimu, Yehosafati akasaba ati: ‘Ai Yahwe Ruhanga waitu, itwe titumanyire ekyokukora. Titunyine ekyokukorra ihe linu ery’amaani. Nitulindirra obukonyezi bwawe bwonka.’

Yahwe akahurra, nukwo kutuma omu h’abahereza be kugambira abantu ati: ‘Obulemu tibuli bwanyu, baitu bwa Ruhanga. Timurukwija kurwana. Kwihaho mwesimbe mwemerre, kandi murole nkoku Yahwe arabajuna.’

Ekiro ekyakurasireho, Yehosafati akagambira abantu ati: ‘Mwesige Yahwe!’ Nukwo kuteeka abazini omumaiso g’abasirikale be kutandika kugenda nibazina ebizina ebirukuhasaniza Yahwe. Nomanya ekyabaireho obu babaire bali haihi kuhika haali obulemu? Yahwe akaletera abanyanzigwa b’Abaisareri okurwanagana bonka na bonka. Abaisareri abu bahikireyo, bakasanga abanyanzigwa babu boona bafiire!

Kitabe ky’amagezi Yehosafati kwesiga Yahwe? Nitwija kuba n’amagezi kakuba naitwe tumwesigira kimu.