Katugarukeho enyuma. Nehemiya akaba ali muheereza w’Omukama Atakisakisi kandi akaba ali musaija Omwisareri ayaikaraga omu Susani omu bukama bwa Peresi. Mugenzi we akaruga omu ihanga lya Yuda aine amakuru amabi: ‘Abantu abaagarukire Yerusalemu tibaine bulinzi. Ebisiika hamu n’enyigi z’orubuga ebyahwerekerezibwe Abababuroni tibikombekerwe.’ Kinu kikatabura Nehemiya. Nehemiya akagonza kugenda Yerusalemu kukonyera, nahabweki akasaba Ruhanga nukwo omukama amwikirize agende.

Hanyuma, omukama akarora Nehemiya atasemeriirwe. Akamukaguza ati: ‘Tinkakuroraga obihiirwe mulingo ogu. Obaire ki?’ Nehemiya akamugarukamu ati: ‘Habwaki ntabihiirwa kandi kunu orubuga rwaitu orwa Yerusalemu rukasisikara?’ Omukama akamukaguza ati: ‘Hati, kiki eky’orukugonza nkukorre?’ Aho n’aho, Nehemiya akasaba omu mutima gwe. Hanyuma Nehemiya akagambira omukama ati: ‘Ninkusaba onyikirize ngende omu Yerusalemu kwombeka ebisiika.’ Omukama Atakisakisi akagambira Nehemiya agende kandi yamuha n’abantu abaramulinda omu rugendo rwe. Akongera yafoora Nehemiya omulemi wa Yuda kandi yamuha n’embaaho ez’okukozesa.

Nehemiya obuyahikire Yerusalemu, akarambura ebisiika by’orubuga. Hanyuma akasorooza banyakatagara boona n’abalemi yabagambira ati: ‘Ganu mahano. Tusemeriire kutandika kwombeka.’ Abantu bakaikiriza kandi batandika kwombeka ebisiika.

Baitu abamu ha banyanzigwa ba Baisareri bakatandika kubasekereza nibagamba ngu: ‘Eboha n’esobora kunaga hansi ekisiika eki murukwombeka.’ Abakaba nibombeka ekisiika batate omutima ha bigambo by’abanyanzigwa babo baitu bakagumizaamu nibakora. Ekisiika kikombekwa kyaraiha kandi kyaguma.

Abanyanzigwa babo bakacwamu kwija kurwanisa Yerusalemu kuruga ha mbaju ezirukwahukana nukwo babatahirre batabetekanirize. Abayudaaya obu bahuliire abanyanzigwa babo eki bakaba nibagenda kukora, bakatiina muno. Baitu Nehemiya akabagambira ati: ‘Mutatiina. Yahwe ali naitwe.’ Nehemiya akataho abalinzi kuliinda abaali nibombeka kandi abanyanzigwa batasobole kubatahirra.

 Omu biro 52 byonka, ebisiika hamu n’enyigi bikaba bihoire kwombekwa. Nehemiya akaleeta Abaleevi boona Yerusalemu omu kujaguza n’okusemererwa. Akababaganizaamu ebitebe bibiri eby’abazini. Hanyuma bakatemba ha kisiika nibakozesa amatembero kandi hanyuma ebitebe binu bibiri bikaraba embaju ezirukwahukana byakumba kwetoroora orubuga. Bakatera engwara, enjogera, hamu n’enanga nibakugiza Yahwe. Ezera akagenda n’ekitebe kimu na Nehemiya yagenda n’ekitebe ekindi kuhikya obu batangatangaine ha yekaru. Abantu boona​—abasaija, abakazi, n’abaana​—bakahongera Yahwe ebihongwa kandi bajaguza. Kandi bakasemererwa n’amaraka gaabo gahulirwa abanyakuli hara muno.