Kiro kindi, Omukama Nebukadeneza akaroota ekirooto ekirukutinisa muno. Akeeta abasaija be abamagezi kumusoborra amakuru g’ekirooto ekyo. Baitu busaho n’omu akaba n’asobora kumusoborra amakuru gakyo. Hanyuma akeeta Danieri kukimusoborra.

Omukama Nebukadeneza akagambira Danieri ati: ‘Omu kirooto kyange mboinege omuti. Omuti gunu, gukakura gwaraiha gwahika omu iguru. Kandi buli muntu wena omu nsi abaire n’asobora kugurora. Gubaire gwine ebikoora ebirungi muno hamu n’ebijuma bingi. Ebisoro bibaire nibihumurra hansi yagwo kandi n’ebinyonyi bibaire byombekere ebiju byabyo h’amataagi gaagwo. Hanyuma, maraika arugirege omu iguru nagamba ati: Muteme omuti hamu n’amataagi gaagwo. Baitu, ekikoro hamu n’emihama yagwo mubireke kandi musibe ekikoro n’ekikoba ky’ekyoma n’omulinga. Omutima gw’omuti nigwija kuhinduka kuruga hali ogu ogw’abantu hamu n’ekisoro kandi nikiija kusigara kiti habw’emirundi musanju. Abantu boona nibaija kumanya Ruhanga nuwe Mulemi kandi n’asobora kuha obukama omuntu wena ow’arukugonza.’

Yahwe akooleka Danieri amakuru g’ekirooto kinu. Danieri obuyayetegeriize amakuru g’ekirooto kinu akatiina muno. Akagambira omukama ati: ‘Ai mukama, kakuba ekirooto kinu kibaire nikikwataho abanyanzigwa baawe hakire, baitu kandi nikikwata hali we. Omuti omukooto ogutemerwege nigumanyisa iwe. Noija kufeerwa obukama bwawe, kandi noija kulya obunyansi nk’ekisoro. Baitu habwokuba maraika agambire ngu ekikoro n’emihama yakyo babireke, kinu nikimanyisa ngu noija kwongera ofooke mukama.’

Hanyuma y’omwaka gumu, Omukama Nebukadeneza obwakaba narubata ha iguru y’ekikaali kye narora oburungi bwa Baburoni, akagamba ati: ‘Rora orubuga runu orurungi orunayombekere. Ndi musaija w’amaani muno!’ Obwakaba n’akyabaza, iraka likaruga omu iguru nirigamba: ‘Omukama Nebukadeneza! Obukama bwawe hati bukurugireho.’

Omu kaire ako konyini, Omukama Nebukadeneza akaleka kwetegereza kandi yafooka nk’ekisoro. Akabiingwa omu kikaali kandi yatandika kwikara n’ebisoro eby’omu kisaka. Isoke ly’Omukama Nebukadeneza likakura lyaraiha muno nk’ebyoya by’ekihungu kandi n’enono ze zikakura zasisana ez’ekinyonyi.

 Hanyuma y’emyaka musanju, Omukama Nebukadeneza akoongera yaba kurungi kandi Yahwe akongera yamufoora omukama wa Baburoni. Omukama Nebukadeneza hanyuma akagamba: ‘Ninkugiza Yahwe, Omukama ow’omu iguru. Hati nyetegeriize ngu Yahwe nuwe Mulemi. Abundaaza abantu ab’emyehembo kandi n’asobora kuha obukama omuntu wena ow’arukugonza.’