Omu kicweka kya Kaisaliya, hakaba harumu omukuru omu ihe lya Roma arukwetwa Koruneryo. N’obukiraaba ngu omusaija onu akaba atali Muyudaaya, Abayudaaya bamuhaga ekitinisa. Yakonyeraga abanaku n’abaseege. Koruneryo akaba ali musaija ayaikiririzaaga omuli Yahwe kandi yaikaraga n’amusaba. Kiro kimu, maraika akamubonekera yamugambira ati: ‘Ruhanga ahuliire okusaba kwawe. Tuma abasaija bagende omu rubuga orwa Yopa nambere Petero ali bamukwetere.’ Aho n’aho, Koruneryo akatuma abasaija basatu kugenda Yopa orugendo nk’orwa mairo 30.

Petero akatunga okwolekwa obwakaba ali omu Yopa. Omu kwoleka kunu, akarora ebisoro Abayudaaya bakaba batarukwikirizibwa kulya kandi akuhurra iraka nirimuragira kubirya. Petero akanga kandi yagamba ati: ‘Tinkalyaga ekisoro kyona ekitasemiire omu bwomeezi bwange.’ Iraka lyagamba liti: ‘Leka kugamba ngu ebisoro binu tibisemiire. Ruhanga abisemiize.’ Kandi iraka likongera lyagambira Petero liti: ‘Haroho abasaija basatu ha mulyango gwawe. Genda n’abo.’ Petero akagenda ha mulyango kandi yakaguza abasaija eki bakaba nibaserra. Bakamugarukamu bati: ‘Tutumirwe Koruneryo omukuru omu ihe lya Roma. Tugende omu ka ye  eyeri omu Kaisaliya.’ Petero akabasemerererwa kandi baraara owe. Ekiro ekyahondiireho, Petero hamu n’ab’oruganda abamu kuruga Yopa bakagenda n’abasaija abo Kaisaliya.

Koruneryo obuyaboine Petero, akamutereza amaju. Baitu Petero akamugambira ati: ‘Imuka! Ndi muntu nka iwe. Ruhanga angambiirege kwija omu ka yawe n’obukiraaba ngu Abayudaaya tibataaha omu maka g’abanyamahanga. Ngambira hati ensonga habwaki onyesere hanu.’

Koruneryo akagambira Petero ati: ‘Ebiro bbina ebihingwireho obu nkaba ninsaba Ruhanga, maraika akambonekera kandi yangambira ngu nkwete omu ka yange. Ninkwesengereza otwegese ebirukukwata hali Yahwe.’ Petero akagamba ati: ‘Mali ndozere ngu Ruhanga tasoroora omu bantu. Ruhanga aikiriza ogu wena ow’arukugonza kumuramya.’ Petero akabegesa ebintu bingi ebirukukwata hali Yesu. Hanyuma omwoyo ogurukwera gukasirimuka hali Koruneryo hamu n’abo boona abakaba bali nauwe kandi boona bakabatizibwa.