Omusaija Omwisareri arukwetwa Erekana akaba aine abakazi babiri Hana na Penina. Baitu omusaija onu yagonzaga muno Hana kukira Penina. Penina yaikaraga nasekereza muno Hana habwokuba Hana akaba atazaire mwana wena baitu kandi uwe akaba aine abaana baingi. Buli mwaka, Erekana yatwaraga eka ye kuramya Yahwe omu Siro nambere heema ya Yahwe ekaba eri. Kiro kimu obu bakaba bagenzere kuramya, Erekana akarora Hana, mukazi we ou yagonzaga muno aine enaku y’amaani. Akamugambira ati: ‘Guma Hana leka kurra. Nyowe ndoho, kandi ninkugonza.’

Hanyuma, Hana akagenda wenka kusaba Yahwe. Omu kusaba kwe kwona akacura muno nayesengereza Yahwe kumukonyera. Akaraganiza Yahwe ati: ‘Yahwe, kakuba ompa omwana omwojo, ninyija kumukuha akuheereze obwomeezi bwona.’

Eri, Nyakatagara Omukuru akarora Hana narra kandi nabaza wenka yatekereza ngu atamiire. Hana akagambira Eri ati: ‘Nangwa, mukama wange, tintamiire. Nyetuntwire muno kandi hati ningambira Yahwe.’ Eri akakyetegereza ngu akaba asobeze, nukwo kumugambira ati: ‘Yahwe akukonyere akuhe eky’orukugonza.’ Hana akehurra kurungi yataha omu ka.  Omwaka gumu obu gukaba gutakahoire, akatwara enda yazaara omwana omwojo yamweta Samuiri. Kinu kikasemeza Hana muno.

Hana atebwe ekintu eky’akaba araganiize Yahwe. Samuiri obu yacukire, akamutwara kuheereza ha heema ya Yahwe. Akagambira Eri ngu: ‘Onu nuwe omwana ou nasabire Yahwe. Muhaireyo aheereze Yahwe obwomeezi bwe bwona.’ Erekana na Hana babungiraga Samuiri buli mwaka kandi bamuleteraga ekanzu. Yahwe akongera Hana abaana basatu aboojo n’abaisiki babiri.