Abaheereza Bagenzi Baitu Abagonzebwa:

Itwena nk’abaheereza ba Yahwe, tugonza Ekigambo kye, Baibuli. Nitukigumya ngu Baibuli erumu ebyafaayo ebihikire, oburagirizi oburungi obu tusobora kuhondera, hamu n’obwakaiso oburukugumya ngu Yahwe agonza abantu. (Zabuli 119:105; Luka 1:3; 1 Yohana 4:19) Nitugondeza kimu kukonyera abantu abandi kwega amananu agali omu Baibuli. Habw’ensonga enu, nikitusemeza kubaturukiza ekitabu kinu ekiine omutwe, “Eby’Osobora Kwega Kuruga omu Baibuli.” Leka tubagambireho ebike ebirukukwata ha kitabu kinu.

Esuura ezirukukira omu kitabu kinu zitekaniziibwe kukonyera abaana. Baitu nikisobora kukozesebwa kukonyera n’abantu abakuru abarukugonza kwega Baibuli. Kandi kusigikirra nk’oku Baibuli yatairweho kukozesebwa buli muntu, nitukigumya ngu naitwe itwena nitwija kugasirwa kandi tutunge okusemerererwa obuturasoma amasomo g’ekitabu kinu.

Ekitabu kinu nikisigikirra ha Baibuli kutusoborra ebyafaayo by’abantu kurugira kimu ha kuhangwa n’okweyongerayo. Tulengereho muno kworobyamu amasomo g’ekitabu kinu n’okugatekaniza nk’oku ebintu byagenzere nibibaho.

Baitu ekitabu kinu tikirukugarukira ha kusoborra kwonka ebintu ebirukubazibwaho omu Baibuli. Ebigambo n’ebisisani bitekaniziibwe kurungi nukwo bikwoleke kiki kyonyini ekyabaireho kandi bikukonyere n’okumanya enyehurra y’ogu arukubazibwaho.

Ekitabu kinu nikitukonyera kurora omulingo Baibuli ebazaaho abantu​—abayorobiire Yahwe hamu n’abo abamujemiire. Kandi nikituletera kwegera ha byokurorraho byabo. (Abarumi 15:4; 1 Abakolinso 10:6) Esuura z’ekitabu kinu zibaganizibwemu  ebicweka 14. Ha kutandika kwa buli kicweka, haroho enyanjura erukwoleka amasomo amakuru agaturasanga omu kicweka eki.

Obworaaba oli muzaire, nosobora kusoma n’omwana wawe isomo nukwo hanyuma mubazeho ebisisani ebiri omu isomo eri. Nimusobora kusoma hamu enkarra ezirukubaza ha isomo eri ryonyini. Konyera omwana wawe kurora akakwate akali hagati y’ebintu eby’asomere omu kitabu hamu n’ebi eby’asomere omu Baibuli. Nosobora kukora ekintu nikyo kimu obworukuba nokonyera omuntu omukuru kwetegereza ebintu ebiri omu Baibuli.

Katunihire ngu ekitabu kinu nikiija kukonyera buli muntu wena arukugonza kumanya amananu​—kabe muto, rundi mukuru​—kwega ebiri omu Kigambo kya Ruhanga, n’okuta omu nkora ebyarukuba ayegere. Kinu nikiija kubakonyera nabo kweteraniza ha bantu ba Yahwe nukwo tumuramize hamu.