Orugonjo rwa Ruhanga tirukugenda kusisana ensi enu ei turukwikaramu. Ruhanga atagonze ensi okwijuramu emihito n’enaku, okusasa n’okubonabona. Mu busumi bw’omu maiso, Ruhanga naija kufora ensi Orugonjo rwe. Orugonjo rwa Ruhanga rulisisana ruta? Katurole Baibuli ekye rukugamba:

Abantu abarungi. Orugonjo rwa Ruhanga ruliba maka g’abanywani ba Ruhanga. Balikorrangana ebintu ebirungi. Balikara hamu okusigikirra hamigendere ya Ruhanga oyokuhikirra.​—Enfumo 2:21.

Eby’okulya ebingi. Mu rugonjo tihalibayo enjara. Baibuli egamba ngu: “Halibaho omweru gw’obura [eby’okulya] omu nsi.”​—Zabuli 72:16.

Amaju amarungi n’emirimo erukusemeza. Ensi obweriba efokere Orugonjo rwa Ruhanga, buli maka baliba n’enju yago. Buli muntu alikora omulimo ogurukumuletera okusemererwa kwonyini.​—Isaya 65:21-23.

 Obusinge mu nsi yoona. Abantu tibaligarukira kurwana rundi kufeera mu bulemu. Ekigambo kya Ruhanga nikigamba: “[Ruhanga] amaraho obulemu.”​—Zabuli 46:8, 9.

Obwomezi oburungi. Baibuli eraganiza: “Anyakuikarayo [mu Rugonjo rwa Ruhanga] taligamba ati Ndi murwaire.” (Isaya 33:24) Kandi tihalibaho muntu kuba mulema, rundi mufu wa maiso, rundi mufu wa matu, rundi mufu w’omunwa.​—Isaya 35:5, 6.

Emperu y’okusasa, enaku, n’okufa. Ekigambo kya Ruhanga nikigamba: ‘Tahakiroho okufa; n’obukwakuba kutera empamo, n’obukwakuba okucura n’obukwakuba okusasa tibikiroho: eby’okubanza bihoireho.’​—Okusuku’rwa 21:4.

Abantu ababi baliba bahoireho. Yahwe naraganiza: “Ababi . . . balimarwa omu nsi, nabo abakora obugobya balisikurwamu.”​—Enfumo 2:22.

Abantu baligonzangana kandi bahengana ekitinisa. Haliba hatakyaroho obutali bwinganiza, okwenderezangana, omururu n’obwiko. Abantu baliba bumu, kandi nibakorra ha bigendererwa bya Ruhanga eby’okuhikirra.​—Isaya 26:9.