N’osobora kwega ebirukukwata hali Yahwe kuraba mu kusoma Baibuli. Ira muno Ruhanga akakoma abantu abahandikire ebitekerezo bye. Ebibahandikire byetwa Baibuli. Biro binu nitwega hali Ruhanga obutusoma Baibuli. Habwokuba Baibuli niyo erimu ekigambo kya Yahwe rundi obukwenda bwe, nikyo kyetwa Ekigambo kya Ruhanga. Nitwikiriza Baibuli ekyerukugamba habwokuba Yahwe tabiha ebisuba. “Ruhanga byatasobora kubihiramu ebisuba.” (Abaheburaniya 6:18) Ekigambo kya Ruhanga kirumu amazima.​—Yohana 17:17.

Baibuli eri hakimu habisembo eby’omuhendo Ruhanga ebi yatuhaire. Nesisana nk’ebbaroha okuruga ha tata w’abaana omugonzebwa hali abaana be. Kitugambira hali emirago ya Ruhanga ngu naija kuhindura ensi enu efooke kikaro ky’okwikaramu ekirungi​—orugonjo rwa Ruhanga. Kitugambira ebiyakozire ira, n’ebi ebyarukukora hati n’ebi ebyarakorra abaana be abesigwa mu biro by’omu maiso. Ni kituyamba mu mulingo ogutukusoboramu kujangurramu emitalibano yaitu n’okutunga okusemererwa.​—2 Timoseo 3:16, 17.

 Abakaiso ba Yahwe banywani ba Ruhanga; ni baija kukukonyera okwetegereza ebi Baibuli eyegesa. Iwe mara gabagambira ngu n’oyenda kwega Baibuli. Tibasasuza sente yoona habwa kinu. (Matayo 10:8) Okwongereza hali ekyo n’osobora kubaho mu nsorrokano zabo ez’Ekikristaayo. Zinu zibaho mu bikaro by’okuramizamu ebyetwa Kingdom Hall. Ka kuba obaho mu nsorrokano z’Ekikristaayo noija kukura mu kumanya Ruhanga bwangu.

N’osobora kwega ebirukukwata hali Ruhanga kuraba mu bintu ebiyakozire. Nk’ekyokurorraho Baibuli egamba: ‘Ruhanga akahanga iguru n’ensi.’ (Okubanza 1:1) Yahwe obu yahangire “iguru,” akakora izooba. Hati ekyo ni kitusoborraki hali Ruhanga? Ni kituyamba okumanya ngu Yahwe aine amani maingi muno. Uwe wenka nuwe yakusoboire kukora ekintu eky’amani nk’izooba. Kitukonyera n’okumanya ngu Yahwe w’amagezi nk’oku kyali nikyetagisa amagezi okukora izooba, erituha obutagasi n’ekyererezi kandi tirikusobora kusisira.

Ebi Yahwe yahangire byoleka ngu natugonza. Cumitiriza hali emiringo y’ebijuma byoona ebiri mu nsi. Yahwe yakutuhaire ekijuma kimu kyonka​—rundi obutatuha. Baitu Yahwe akatuha emiringo nyingi y’ebijuma ebyabuli mulingo, erangi n’obukoto. Kinu ni kimanyisa ngu Yahwe Ruhanga tali w’engozi kwonka baitu mwenda muno, mwe cumitirizi kandi w’ekisa.​—Zabuli 104:24.