Okufoka munywani wa Ruhanga nikyo kirungi muno omuntu kyasobora kutunga. Ruhanga naija kukwegesa omulingo gw’okusoboramu kuba n’okusemererwa hamu n’obusinge; naija kukusumurra kuruga munyikiriza ezisobere hamu n’ebikorwa ebikusisa. Naija kuhuliriza okusaba kwawe. Kandi akukonyere kuba n’obusinge bw’omu mutima hamu n’obugumu. (Zabuli 71:5; 73:28) Ruhanga naija kukusagika mu bwire bw’ebizibu. (Zabuli 18:18) Kandi noija kutunga ekisembo kya Ruhanga eky’obwomezi obutahwaho.​—Abarumi 6:23.

Obwosemberra Ruhanga, noba nosembera haihi n’abanywani ba Ruhanga abandi. Nabo ni baija kuba banywani bawe. Ni baija kuba nka banyanyoko kandi bagenzi bawe. Ni baija kuba n’okusemererwa kukwegesa ebirukukwata hali Ruhanga kandi ni baija kukuyamba hamu n’okukwekambisa.

Titurukwingana na Ruhanga. Obw’orukuserra obunywani na Ruhanga oine kumanya ekintu kimu ekikuru. Obunywani na Ruhanga tibuli hagati y’abantu ababiri abarukwingana ngana. Natukirra hara obukuru, amagezi kandi w’amani maingi okutukira. Nuwe ahikire kuba Mulemi waitu. Obu turaba nitugonza kuba banywani be, twine kumuhuliriza n’okukora ebyatugambira. Kinu nikija kuba habw’oburungi bwaitu ebiro byona.​—Isaya 48:18.