1. Ediini ezimu ezirikusomebwa mu Afrika niziha?

ABANTU abarukukira obwingi mu Afrika nibaikiriza ngu kikuru kuramya Ruhanga. Baitu haroho obutaikirizangana ha mulingo gw’okumuramyamu. Abamu bagenda mu mizigiti baitu abandi bagya mu nsisira. Nabandi bagenda mu makanisa. Kiba kigwire okutekereza ngu omu Afrika halimu edini isatu zonka. Omu Baisiramu, halimu ebiragiro hamu n’enyikiriza eby’embaganiza. Ediini ey’obuzaliranwa nayo ebamu embaganiza kusigikirra mukikaro n’ekicweka nambere eba. Kandi nomu madiini agarukweyeta Amakristayo nago galimu obutaikirizangana bwingi. Okwihaho ezo ezabandizeho, haroho amakanisa maingi agayecwireho mu Afrika yoona.

2. (a) Kiki ekikira kusaraho ediini y’omuntu ey’asoma? (b) Bintu ki ebirukukwata ha diini yaitu ebitarukwoleka ngu n’esimibwa Ruhanga?

² Habwaki abantu baramya nkoku bakora? Abantu baingi baikiririza mu diini za bazaire babu. Ebintu ebyabaireho mubyafayo nabyo bine akakwate ha diini y’abantu ei barukusoma hati. Ekitabu The Africans​​—⁠A Triple Heritage kigamba: “Mumatemba ga Sahara Obusiramu bukajanjara mukukozesa rurara. . . . Kandi omu masirimuka ga Sahara Obukristayo nabwo bukasasana nabo bali nibakozesa emundu okuhindura abantu. Baitu baingi muli itwe nitwikiriza ngu ediini yaitu nesimibwa Ruhanga. Baitu ediini tesobora kuba  y’amazima ngu habwokuba abatuzaire niyo basomere rundi abalemi ba matwale niyo ei bahambirize baisenkuru itwe kusoma.

3-5. Kyokurorraho ki ekirukutuyamba kumanya ngu ediini zona tizisomesa amazima?

³ Nobu kiraba kiri nti nizegamba kuha oburagirizi oburukwesigwa omu kuhereza Ruhanga baitu entekereza zabu zina embaganiza. Nizegesa ebitarukusisana ebirukukwata hali Ruhanga noha, kandi kiki ekyakutunihiramu kukora. Cumitiriza hali eki: Kakuba otunga omulimu omu kampuni emu ey’amani. Ha kiro ky’okubanza ha mulimu okamanya ngu mukama wawe taroho akagenda kuhumura. Hanyuma okaguza abakozi bagenzi bawe basatu kiki ekyosemerire kukora. Omukozi ow’okubanza akugambira ngu mukama wawe nagonza ngu osingorre hansi. Owakabiri akugira nti osemerire kusiiga erangi ekyombeko kyona. Owakasatu akugambira ngu osemerire kagabira abantu amabbaroha gabu.

⁴ Hanyuma okaguza abakozi bagenzi bawe hali ebirukukwata ha mukama wanyu. Omukozi ow’okubanza akugamba ngu araihire, muto baitu agumangaine. Owakabiri akugambira ngu mugufu, akuzire mu myaka kandi w’embabazi. Owakasatu, akugamba ngu mukama wanyu tali musaija​​—⁠baitu mukazi. Aho noija kukimanya ngu abakozi banu basatu boona tibarukukugambira amananu. Obworaba nogonza kusigara n’okora ha mulimu gwawe, oine kuserra kumanya mukama wawe noha mali kandi kiki ekyarukugonza okole.

⁵ Kinu nikyo kimu naha diini. Habwokuba haroho entekereza nyingi ezirukukwata hali Ruhanga noha. Kandi biki ebyarukutwetagisa, nitwetaga kugumya ngu okuramya kwaitu nikwikirraniza hamu n’amazima. Baitu tusobora tuta kumanya amazima agarukukwata hali Ruhanga?