1. Twine kukora ki okusimibwa Ruhanga?

OKUBA n’oruganda orurungi orukusimibwa na Ruhanga, twine kwetantarra kimu ediini z’ebisuba. Twine okusoma ediini ey’amazima. Mubiro binu baingi h’abantu omunsi bakikozire.

2. Abakaiso ba Yahwe basangibwa nkaha kandi mulimu ki ogubakora?

² Nkoku Baibuli yaragwire ira ngu, abaramya ba mazima bakufokere “ekitebe kingi” okuruga “omu mahanga gona, nenganda nabantu, [hamu] nendimi.” (Okusuku’rwa 7:⁠9) Abakaiso ba Yahwe abali munsi 235, bajumbire muno omulimu gw’okukonyera abantu okumanya emihanda ya Yahwe hamu n’ebyagonza.

3. Abakaiso baramya oha, kandi kuramya kwa mulingo ki okubetantara?

³ Abakaiso nibakyetegereza ngu Yahwe nuwe wenka asemerire kuramibwa. Bangira kimu kwinamira ebisisani ebisarwirwe rundi n’ebisisani by’ediini. (1 Yohana 5:​21) Tibahaisaniza abafu nibentantara okurara ha murro; rundi okukora emigenzo erukuhagira ediini z’ebisuba ‘n’enyegesa z’amasetani.’ (1 Timoseo 4:⁠1) Baitu, bagarramu amani abo abaferirwe nibabahumuza ngu Ruhanga nanihiza okuhumbura abo abafiire okwija kubaho omu rugonjo rwa Ruhanga omunsi.​—Yohana 5:​28, 29; Engeso 24:⁠15.

4. Abantu ba Ruhanga barora bata eby’amasano rundi oburogo?

⁴ Bakaiso tibaine kakwate koona na by’amasano n’obusezi hamu n’oburogo, nibakimanya ngu binu byoona nibiruga hali Omuhangirizi. Tibesiga ngisa rundi ehirizi kubalinda, baitu obwesigwa bwabu bwoona babuta muli Yahwe.​—Enfumo 18:⁠10.

5. Bakaiso ba Yahwe baikara bata ngu “tibali b’ensi”?

⁵ Yesu akagamba ngu abegeswa be baali ‘tibaine kuba b’ensi.’ (Yohana 17:16) Yesu wenyini akangira kimu kwetahya mu by’obulemi obw’ensi obw’omubiro bye. (Yohana 6:​15) Nikyo kimu, Bakaiso tibetahya mu byobulemi, mu by’omwoyo gw’ihanga rundi ebyokwesarasaramu okwensi enu. Baitu basasura emisoro yabu; kandi borobera ebiragiro byensi ei baikaramu.​—Yohana 15:19; Abarumi 13:​1, 7.

6. Biragiro ki abairu ba Ruhanga ebibakuratira ebikwatiraine n’obuswere hamu n’okubinga abakazi?

⁶ Habwokuba borobera abakuru ab’abalema, kinu bakigumya nibahandikisa obuswere bwabu. (Tito 3:⁠1) Bahuliriza okuhaburwa kwa Ruhanga nibetantarra kimu okuswera abakazi baingi. (1 Timoseo 3:⁠2) Okwongera hali eki habwokukozesa enyegesa ya Baibuli mu bwomezi bwabu abahereza ba Ruhanga tibakira muno kutunga emitalibano eri kusobora kumaraho obuswere bwabu.

7. Bakaiso boleka bata ngu nibagonzangana?

⁷ Abakaiso bagonzangana. Okugonza kunu, hamu n’okugonza hali Ruhanga kubateraniriza kimu mu bw’oruganda obwamali, n’obukiraba kiri nti nibaruga mu nganda rundi amahanga maingi. Obu habaho emihito ey’amani hali ab’oruganda mu nsi ezindi, bairukirrangana. Bakaiso boleka okugonza mumulingo ogu baikaramu buli kiro.​—Yohana 13:⁠35.

8. Bintu ki ebibi abantu ba Ruhanga ebi betantara?

⁸ Abantu ba Yahwe bakora namani nukwo babe besigwa. Betantara kwiba, kubiha ebisuba, obusihani, obutamizi, n’obugobya muby’obusubuzi. Abasaija abaswire tibatera bakazi babu. Abamu obu baali batakafokere bakaiso baali nibakora ebimu hali ebyo, baitu habw’obuyambi bwa Yahwe bakaleka kubikora. ‘Bakogebwa bayezebwa’ omu maiso ga Ruhanga.​—1 Abakolinso 6:​9-​11.

9. Ekitabu ekimu kikagamba ki hali ediini ez’omu Afrika ezeyeta ngu z’omwoyo?

⁹ Kyamananu, ediini nyingi z’egamba kuba n’amazima. Obundi boleka ha bintu ebyamani ebibakozire okusagika okwegamba kwabu. Nk’ekyokurorraho, ekirukukwata ha madini ageyata ag’omwoyo ag’omu Afrika, ekitabu kimu kigamba ngu: “Omulimu gw’abamasano rundi ogw’omuraguzi hati nigukorwa ganu [Amadiini amahyaka ageyeta Makristayo]. . . . N’ibegamba ngu nibatererra n’okukora n’ebyamahano. Abanabbi babu nibegamba ngu nibaha kwolekebwa, nibasoborra ebirooto. N’ibakozesa amaizi ngu g’omugisa, amafuta agarukwera, iju, obubbani kukiza n’okutanga endwaire.”

10, 11. Habwaki eby’amahano eby’ebiro binu tibirukwoleka ngu ediini egi n’eruga hali Ruhanga?

¹⁰ Abali mudiini zinu nibagamba ngu ebyamahano binu nibyoleka ngu Ruhanga naziha emigisa. Baitu ebirukwetwa eby’amahano byonka tibirukugumya ngu Yahwe egi nagisima. Setani aha amani abaramya abamu abebisuba kukora eby’amahano ‘eby’amani.’ (2 Abasesalonika 2:⁠9) Kwongera hali eki, Baibuli ekagamba ngu ebyamahano ebyali nibiruga hali Ruhanga nka okuragura, okubaza mundimi n’okumanya, “kulihwaho.”​—1 Abakolinso 13:⁠8.

¹¹ Yesu akarabura: “Omuntu wena anyakungambira ati, Mukama wange, Mukama wange, tali ogu alitaha mu bukama obwomu iguru; baitu ogu anyakukora Isenyowe ali omu iguru eby’agonza. Baingi balingambira ha kiro kiri ngu Mukama waitu, Mukama waitu, tutagambire omu ibara lyawe? [T]utabinge emizimu omu ibara lyawe? Nyowe ndibagarukamu ningamba nti tinkabamanyaga inywe: murugeho, namberendi inywena abakora ebyokwema.”​—Matayo 7:​21-​23.

12. Nibaha abalitaha mu Bukama bwa Ruhanga?

¹² Nibaha, nu, abalitaha mu Bukama obw’omwiguru? Nibo abo abakora Yahwe eby’agonza.

13. Ruhanga aragire abantu be kukora mulimo ki, kandi nibaha abarukugukora?

¹³ Kiki Ruhanga ekyarukugonza abantu be bakole mu bwire bunu? Yesu akagamba ngu: “Nenjiri enu eyobukama eritebezebwa omu nsi zona, okuba kaiso hali amahanga gona.” (Matayo 24:14) Gunu nugwo mulimo Bakaiso ba Yahwe barukukora n’amani.

14. Obukama bwa Ruhanga nikyo kiki, kandi noha alibulema?

¹⁴ Omu nsi yona, Abakaiso ba Yahwe barangirra Obukama bwa Ruhanga ngu nubwo bulemi obwomu iguru oburalema ensi yona mubuhikirire. Begesa ngu Yahwe akakoma Yesu kuba Mukama w’obukama obu, hamu nawe aliyambibwa 144,000 abakomerwe kuruga omu bantu.​—Danieri 7:​14, 18; Okusuku’rwa 14:​1, 4.

15. Obukama bwa Ruhanga bulihwerekerezaki?

¹⁵ Abakaiso nibakozesa Baibuli boleka abantu ngu Obukama bwa Ruhanga nubwija kuhwerekereza entekaniza yoona eya Setani. Ediini ez’ebisuba ziriba zitakyaroho hamu n’enyegesa zazo eziswaza Ruhanga kandi zikahaisaniza Omuhangirizi! (Okusuku’rwa 18:⁠8) Obulemi bwa bantu obuhakaniza Ruhanga buliba nabwo buhoireho!​—Danieri 2:​44.

16. Abaliremwa Yesu Kristo nibaha, kandi balikara nkaha?

¹⁶ Okwongereza hali ekyo, Abakaiso ba Yahwe bamanyisa abantu ngu Yesu Kristo, alireteera abantu abarukukora Ruhanga ebyagonza emigisa y’amani. Baliba bahereza be ab’omunsi. Baibuli enihiza ngu: “Baitu alijuna omunaku obwakunga; nomusege atanyina mukonyezi. Aliganyira abasege nabanaku, nobwomezi bwabanaku alibujuna.”​—Zabuli 72:​12, 13.

17. Nibaha bonka abarukurangirra Obukama bwa Ruhanga?

¹⁷ Busaho kitebe ky’abantu ekindi ekikora Ruhanga ebyagonza nk’okutebeza enjiri ey’Obukama bwe. Abakaiso ba Yahwe nibo bonka abamanyisa abantu Obukama bwa Ruhanga omunsi yona.