Mali katusemeriirwe habw’okutunga burocuwa empyaka hamu n’ekitabu ekihyaka eby’okukozesa kwegesa abantu Baibuli! Nitusaba Yahwe atuhe omugisa habw’amaani tukutamu kusobora kufoora abantu baingi abegeswa. (Mat 28:18-20; 1Kol 3:6-9) Nitusobora tuta kukozesa ebikwato binu ebihyaka?

Nk’oku ekitabu Wegondeze omu Bwomeezi Ebiro n’Ebiro!, okwega Baibuli okw’okuleeta hamu ebiteekerezo, nikyoleka omulingo omuhyaka ogw’okwegesa, hondera oburagirizi bunu obworaaba n’otekaniza kandi n’oyegesa omwegi wa Baibuli. *

• Musome ebimuhairwe kandi mubazeeho ebikaguzo

• Musome ebyahandiikirwe ebiroho ekigambo “musome” kandi okonyere omwegi kwetegereza omulingo birukumukwataho

• Mutekeho vidiyo kandi muzibazeeho nimukozesa ebikaguzo ebimuhairwe

• Lengaho kumara isomo buli murundi murayega

Obworaaba oli omu buheereza, banza ogabe burocuwa nukwo orole omuntu obwaraaba n’agonza kumanya ebirukukiraho. (Rora akasanduuko “ Nk’Oku Osobora Kugaba Burocuwa Wegondeze omu Bwomeezi Ebiro n’Ebiro! ha Murundi ogw’Okubanza.”) Obumuramara kwega nimukozesa burocuwa, kandi omwegi akooleka ngu n’agonza kugumizaamu, muhe ekitabu hanyuma mutandike isomo 04. Obworaaba n’oyegesa omuntu n’okozesa akatabu Baibuli Etwegesa Ki rundi Mwerindirege omu Kugonza Kwa Ruhanga, mutwale omu kitabu Wegondeze omu Bwomeezi Ebiro n’Ebiro! kandi ocwemu ninkaha nambere muratandikira.

MUROLE VIDIYO NITUKUTANGIRRA OMU KWEGA BAIBULI, HANYUMA MUGARUKEMU EBIKAGUZO BINU:

• Abeegi nibaija kwega bintu ki omu kitabu ekihyaka?

• Habwaki osemeriire kwoleka abeegi abahyaka vidiyo enu?

• Bigendererwa ki eby’osemeriire kwekambisa omwegi kweteraho kandi akabihikiriza?​—Rora ekicweka “ Ekirabazibwaho n’Ekigendererwa kya Buli Kicweka”