HALI ABATO
11: Obwekambi
NIKIMANYISA KI?
Abantu abekambi tibetantara emirimo. Oihireho, begondeza omu kukora n’amaani kwehikyaho ebyetaago byabo n’okukonyera abandi—n’obukiraaba ngu omulimo gwabo tigurukubahaisa ekitiinisa.
HABWAKI KIKURU?
Amananu gali ngu twine obujunanibizwa bwingi omu bwomeezi. Omu ensi enu nambere abantu baingi batarukugonza kukora n’amaani, kuba mwekambi kikugasira muno.—Omugambizi 3:13.
“Nyegere ngu obw’okora n’amaani, otunga okusemererwa ha mutima n’okumarwa. Kuba omukozi omwekambi kikuleetera kuba n’ibara erirungi.”—Reyon.
OMUSINGI GWA BAIBULI: “Omulimo gwona gurumu omugaso.”—Enfumo 14:23.
HABWAKI KIKURU?
Kurakuraniza entekereza ey’ehikire ha mulingo ororamu emirimo kuraba omu kuhondera amagezi ganu.
Kora emirimo n’omutima gwawe gwona. Koobe n’okora emirimo ey’omu ka, n’omaliriza emirimo ey’ohairwe ha isomero, rundi emirimo ey’ekutaahiza sente, osemeriire kugikora n’omutima gwawe gwona. Obworaaba oyegere kukora omulimo kurungi, serra emiringo ey’orasemezaamu, ekyokurorraho kukora omu bwangu rundi kukora kurungi kukiraho. Obworayeyongera kuba mukugu, noija kweyongera kwegondeza omu mirimo yaawe.
OMUSINGI GWA BAIBULI: “Oboine omuntu arukwekambira omulimogwe? Nuwe alyemerra omu maiso ga bakama; talyemerra omu maiso gabairu.”—Enfumo 22:29.
Tekerezaaho omulingo omulimo gwawe guragasira abandi. Emirundi erukukira obwingi, obwohikiriza kurungi obujunanizibwa bwawe, kigasirau abandi. Ekyokurorraho, obw’oyekamba okahikiriza kurungi emirimo yaawe, okeehezaaho abandi omu ka yaawe omugugu.
OMUSINGI GWA BAIBULI: “Okugaba kwomugisa okukira okuhebwa.”—Engeso Ezabakwenda 20:35.
Kora ekirukukiraho. Omu kiikaro ky’okukora eby’osemeriire kukora byonka, kora ebirukukiraho. Obw’orakora eki, nikiija kwoleka ngu n’olema obwomeezi bwawe, n’okora ekirukukiraho hatali ngu habwokuba ohambiriziibwe, baitu habwokuba nukwo ocwiremu kukora.—Matayo 5:41.
OMUSINGI GWA BAIBULI: “Ebikorwa byawe ebirungi bireke okuba omu kuhambirizibwa, baitu omu kugonza.”—Firemoni 14, NWT.
Otagwera orubaju. Abantu abekambi tibaba bagara, kandi tibemarra omu mirimo yabo ekihinguraine. Tibagwera orubaju obu nibegondeza omu kukora n’amaani kandi batunga obwire obw’okuhumuraho.
OMUSINGI GWA BAIBULI: “Ekiganja kimu eky’okuhuumura nikikira ebiganja bibiri eby’okukora muno n’okuhambya omuyaga.”—Omugambizi 4:6, NWT.
