HALI ABATO
10: Obwesigwa
NIKIMANYISA KI?
Abazaire, abanywani, n’abantu abakozesa abandi, bakira kugonza abantu abesigwa. Habwokuba bahondera ebiragiro byabo, bahikiriza ebintu ebiberagire, kandi baikara nibabaza amananu.
HABWAKI KIKURU?
Haihi emirundi erukukira obwingi, kusobora kuheebwa obugabe, oine kuba omazire obwire oli mwesigwa.
“Omulingo ogurukukirayo oburungi ogusobora kuleetera abazaire baawe kukwesiga nukwo kwoleka ngu okuzire kandi oli muntu w’obujunanizibwa hatali obworukuba oli nabo kyonka, baitu n’obworukuba otali nabo.”—Sarahi.
OMUSINGI GWA BAIBULI: “Mwerenge inywenka.”—2 Abakolinso 13:5.
EKY’OSOBORA KUKORA
Ebintu binu nibisobora kukukonyera koobe nogonza abantu beyongere kukwesiga rundi abantu bagarukemu kukwesiga omurundi ogundi.
Ba muntu ow’amananu. Busaho ekikira kuleetera abantu kuleka kukwesiga nk’okubiiha ebisuba. Ha rubaju orundi, obwoba muntu ow’arukubaza amananu—kukira muno obwoba okozere ensobi—abantu kibanguhira kukwesiga.
“Kyanguhire kubaza amananu ebintu obubiba nibigenda kurungi. Baitu obw’obaza amananu na ha kintu ekisobora kuleetera abantu abamu kukurora kubi, abandi beyongerra kimu kukwesiga.”—Caiman.
OMUSINGI GWA BAIBULI: “Nitugonza kuba abesigwa omu bintu byona.”—Abaheburaniya 13:18, NWT.
Ba muntu arukwesigwa. Omu kuseruliiriza kumu okwakozerwe omu Amerika kukooleka ngu obucweka 78 ha buli kikumi obw’abantu abagaba emirimo, bakagamba ngu obwesigwa buli kimu ha bintu bisatu ebikiru ebirukwetaagwa kuruga omu bakozi ba kampuni.” Kwega kuba muntu arukwesigwa hati nikiija kukukonyera obworakura.
“Abazaire bange bakyetegeraza ngu ndi muntu w’obujunanizibwa obunkora emirimo yange omu ka batabandize kunyijukya. Obunyongera kwetwaza omu mulingo ogu, abazaire bange beyongera kunyesiga.”—Sarah.
OMUSINGI GWA BAIBULI: “Nyesigire okuhurra kwawe, kandi manyire nti olikora, kandi olihingurana, [omu] ebi ebindukugamba.”—Firemoni 21.
Ba muntu arukugumiisiriza. Kyanguhire muno kurora ngu omwana akuzire kandi aine amaani, baitu kitwara obwire abantu kwetegereza obwaraaba akuzire omu nyehurra n’omu bitekerezo.
“Ekikorwa kimu kyonka eky’okwoleka ngu oli w’obujunanizibwa tikisobora kuleetera abazaire baawe hamu n’abandi kukwesiga. Baitu n’osobora kubaleetera kukwesiga mpora mpora kakuba oikara n’oyoleka ngu oli w’obujunanizibwa kumara akasumi.”—Brandon.
OMUSINGI GWA BAIBULI: “Nukwo mujwale, . . . nokugumisiriza.”—Abakolosai 3:12.
