1, 2. (a) Kintu ki Yahwe eky’atumanyisize? (b) Murago ki ogu turukusanga omu Isaya 46:10, 11 hamu na Isaya 55:11?

EBIGAMBO ebirukubanza omu Baibuli nibitandikisa ebigambo ebyanguhire kwetegereza baitu ebiine amakuru ag’amaani. Nibigamba: “Okubanza Ruhanga akahanga iguru nensi.” (Okubanza 1:1) Omu ebi byona Yahwe yahangire, bike muno ebi tumanyire. Kandi bike muno ebi tumanyire ha bintu ebiri omu mwanya, ha kyererezi, hamu n’ebirukukwata ha maani agakonyera ebintu kwikara hansi hatali omu mwanya. (Omugambizi 3:11) Baitu Yahwe atumanyisize ekigendererwa kye hali ensi hamu n’abantu. Akahanga abantu omu kisisani kye n’agonza baikale omu nsi kandi bagyegondezemu. (Okubanza 1:26) Akabahanga babe baana be, kandi uwe abe Ise bo.

² Esuura eyakasatu ey’ekitabu eky’Okubanza n’etusoborra omulingo ekigendererwa kya Ruhanga kyahakaniziibwe. (Okubanza 3:1-7) Baitu, tiharoho kizibu kyona ekirukusobora kulemesa Yahwe kandi busaho muntu arukusobora kumulemesa. (Isaya 46:10, 11; 55:11) Nahabweki tukigumye ngu  ekigendererwa kya Yahwe nikiija kuhikirra ha kaire konyini akarukugonza!

3. (a) Nyegesa ki enkuru ezirukutukonyera kwetegereza obutumwa bwa Baibuli? (b) Habwaki kiri kikuru tubazeeho enyegesa zinu? (c) Bikaguzo ki ebi turukwija kugarukamu?

³ Hataroho okugurukyagurukya, tumanyire ekigendererwa kya Ruhanga hali ensi n’abantu, kandi tumanyire obujunanizibwa Yesu aine omu kuhikiriza ekigendererwa eki. Zinu nyegesa nkuru eza Baibuli kandi nizisobora kuba zimu ha nyegesa ezi wabandize kwega obw’okaba n’oyegesebwa Baibuli. Nitugonza kukonyera abandi nabo kumanya enyegesa zinu enkuru. Omu kasumi kanu ak’Ekikiijukyo, twine omugisa ogw’embaganiza ogw’okumanyisa abantu enyegesa zinu obu turaaba nitubaraaliza. (Luka 22:19, 20) Obu baraija ha mukoro gunu omukuru, nibaija kwega bingi ebirukukwata ha kigendererwa kya Ruhanga. Nahabweki kanu nuko akaire, tutekereze ha bikaguzo ebi tusobora kukaguza abantu okubekambisa okubaho ha mukoro gunu. Omu kicweka kinu, nitwija kubazaaho ebikaguzo bisatu: Ekigendererwa kya Yahwe hali ensi n’abantu nikyo kiha? Kiki ekyasobere? Habwaki ekicunguro kya Yesu nikyo kisumuruzo ekirukusobozesa ekigendererwa kya Yahwe okuhikirizibwa?

4. Ebihangwa bigamba bita “ekitinisa kya Ruhanga”?

⁴ Yahwe Muhangi arukuhuniiriza. Buli kimu kyona eki yahangire kiri ky’orulengo orwa ha iguru muno. (Okubanza 1:31; Yeremiya 10:12) Oburungi bw’ebihangwa bya Yahwe n’omulingo bitekaniziibwe nigutwegesa ki? Nigutwegesa ngu, ebintu byona Yahwe ebi yahangire, kuruga ha kitaito kuhika ha kikooto byona biine omugaso. Kwongerezaho, kakuba otekereza ha butafali obw’omubiri oburukuhuniriza, rundi kakuba orora enkerembe eyakazarwa, rundi okarora izooba nirigwa, oyehurra ota? Ebintu binu tubyegomba habwokuba Yahwe akatuhanga n’obusobozi bw’okumanya ebintu ebirungi.—Soma Zabuli 19:1; 104:24.

5. Yahwe akozere ki kurora ngu ebihangwa bye byona byakorra hamu?

⁵ Yahwe akateraho buli kintu kye kyona eki yahangire nambere kisemeriire kugarukira. Akataho ebiragiro eby’obuhangwa, kandi n’abantu abateriireho ebiragiro ebirukwoleka omulingo basemeriire kwetwaza. Akataho ebiragiro binu byona nukwo ebintu byona hansi na ha iguru bikorre hamu kurungi. (Zabuli 19:7-9) Buli kintu kyona ekyahangiirwe kiine nambere kisemeriire kuba n’omugaso ogu kisemeriire kuhikiriza. Ekyokurorraho, amaani agakonyera ebintu kwikara hansi hatali omu mwanya akagataho nukwo gakonyere orwoya orw’omu mwanya kwikara haihi n’ensi kandi orwoya runu rukonyera kwikaza amaizi g’enyanja omu kiikaro kyago. Kakuba atarataireho amaani ganu, obwomeezi tibwakubaireho omu nsi. Ensaro ezi yataireho omu buhangwa zikonyera buli kimu kwikara nambere kisemeriire kuba. Kinu nikyoleka ngu aine ekigendererwa habw’ensi n’abantu. Obu turaaba nitutebeza, tukonyere abantu kumanya hali Omuhangi onu omurungi ayahangire buli kimu.—Okusuku’rwa 4:11.

6, 7. Ebimu ha bisembo Yahwe yahaire Adamu na Hawa nibyo biha?

⁶ Ekigendererwa kya Ruhanga kikaba abantu kwikara omu nsi ebiro byona. (Okubanza 1:28; Zabuli 37:29) Yahwe mugabi, kandi akaha Adamu na Hawa ebisembo bingi ebirungi muno. (Soma Yakobo 1:17.) Yahwe akabaha  obugabe n’obusobozi bw’okutekereza, okugonza, n’okutunga abanywani. Omuhangi waitu akabaza na Adamu kandi akamugambira omulingo asobora kukora ebintu ebirungi. Kandi Adamu akega kwerolerra, okurolerra ebisoro, hamu n’ensi. (Okubanza 2:15-17, 19, 20) Yahwe akaha Adamu na Hawa obusobozi bw’okuroza ha by’okulya, kukwata, kurora, kuhurra, n’okuboyerwa ebintu ebirungi ebyakaba abahangiire. Kinu akakikora nukwo begondeze omu ka yabo enungi. Adamu na Hawa bakaba baine emirimo nyingi enungi ey’okukora. Kandi bakaba baine omugisa gw’okwikara nibega n’okuzoora ebintu ebihyaka ebiro byona.

⁷ Ekigendererwa kya Ruhanga kyali nikitwarramu ki ekindi? Yahwe akaha Adamu na Hawa obusobozi bw’okuzaara abaana. Abaana babo nabo bakaba nibasobora kuzaara, kuhikya ensi ijwire. Yahwe akaba n’agonza abazaire bagonze abaana babo, nk’oku nauwe akaba agondeze Adamu na Hawa obu bakaba bahikiriire. Abantu boona akabaha ensi hamu n’ebintu byona ebirungi ebigirumu. Ekaba esemeriire kuba eka yabo kandi akaba atarukugenda kugibaihaiho.—Zabuli 115:16.

8. Habwaki Ruhanga yahaire Adamu na Hawa ekiragiro ekirukusangwa omu kitabu eky’Okubanza 2:16, 17?

⁸ Ebintu bitabe nk’oku Yahwe akaba agondeze bibe. Kiki ekyabaireho? Yahwe akaha Adamu na Hawa ekiragiro ekyanguhire kworobera ekikaba nikigenda kubakonyera kumanya nambere obugabe bwabo bukaba bwine kugarukira. Akabagambira ati: “Ha muti gwona ogwomu rugonjo olyehoga nkokwogonza: baitu ha muti ogwokumanya oburungi nobubi otaligulyaho: baitu omu kiro ekyoliguliramu, mazimakwo olifa.” (Okubanza 2:16, 17) Kinu kikaba kitali kiragiro ekigumire kwetegereza. Kandi kikaba kitagumire kukihondera habwokuba hakaba haroho eby’okulya bindi bingi kandi ebirungi muno.

9, 10. (a) Setani akahangirra Ruhanga omu mulingo ki? (b) Adamu na Hawa bakacwamu kukora ki? (Rora ekisisani ekirukutandika ha isomo linu.)

⁹ Setani akakozesa enjoka kubihabiha Hawa nukwo ajemere Ise, Yahwe. (Soma Okubanza 3:1-5; Okusuku’rwa 12:9) Omu kiragiro kinu, Setani akakomamu akacweka akakaba nikoleka ngu baali batarukwikirizibwa kulya ha buli muti gwona ogw’omu rugonjo. Akaba n’asisana nk’arukugamba: ‘N’omanyisa timwine obugabe bwona obw’okukora eki murukugonza?’ Ekintu ekindi, akamugamba: “Okufa timulifa.” Eki kyali kisuba. Hanyuma, akatandika kusonasona Hawa ngu kikaba kitarukumwetagisa kworobera Yahwe. Setani akagamba: “Ruhanga amanyire ha kiro ekimuliguliraho amaiso ganyu nuho galigukira.” Setani akaba n’amanyisa ngu Yahwe akaba atarukugonza balye ha kijuma habwokuba kikaba nikigenda kubaha amagezi ag’embaganiza. Akamalirra n’abaraganiza ekisuba kinu: “Muliba nka Ruhanga okumanya ebirungi nebibi.”

¹⁰ Adamu hamu na Hawa bakaba baine kucwamu eky’okukora. Bakworobiire Ruhanga, rundi Setani? Eky’enaku, bakacwamu kujemera Ruhanga. Bakanga Yahwe okuba Ise bo kandi bayeteraniza hali Setani. Hati bakasigara bonka, batakyaine obulinzi bwa Yahwe.—Okubanza 3:6-13.

11. Habwaki kikaba kitarukusoboka Yahwe kweganyira bweganyira ekibi kya Adamu na Hawa?

¹¹ Adamu na Hawa obu bacwire ekiragiro kya Ruhanga, bakafooka bantu abatahikiriire. Kandi bakafooka banyanzigwa ba  Ruhanga, habwokuba Yahwe anoba obubi. Amaiso ge ‘gasemiire tarukusobora kurolerra obubi.’ (Habakuki 1:13) Kakuba Yahwe atarakozereho kintu kyona ha kibi kya Adamu na Hawa, ebihangirwe bye byona byakubaire bitairwe omu kabi. Abamaraika n’abantu boona bakubaire nibekaguza obu baraaba nibasobora kwesiga ebya Yahwe agamba. Baitu Yahwe tahindura endengo ze; tacwa ebiragiro bye. (Zabuli 119:142) N’obukiraaba ngu Adamu na Hawa bakaba baine obugabe bw’okukora eki barukugonza, bakaba batarukugenda kukira ebizibu ebikuruga omu kujemera Yahwe. Bakamalirra bafire, bagaruka omu cuucu nambere bakaba barugire.—Okubanza 3:19.

12. Kiki ekyahikire ha baana ba Adamu?

¹² Adamu na Hawa obu baliire ha kijuma, Yahwe akaba atakyabaikiriza kuba bantu ab’eka ye. Akababinga kuruga omu rugonjo rwa Adeni, kandi bakaba batakyasobora kugarukayo. (Okubanza 3:23, 24) Yahwe akabaleka batunge ebizibu kuruga omu ncwamu zabo embi. (Soma Ekyebiragiro 32:4, 5.) Habw’ekibi kinu, bakaba batakyasobora kukuratira kurungi emiringo ya Yahwe. Adamu tali nuwe wenka ayaferiirwe obwomeezi burungi baitu akabufereza n’abaana be. Obutahikirra, ekibi, hamu n’okufa nibyo byonka ebyakaba n’asobora kubagwetera. (Abarumi 5:12) Adamu akabafereza omugisa gw’okwomeera ebiro byona. Adamu na Hawa bakaba batarukusobora kuzaara omwana wena ahikiriire, kandi n’abaana babo bakaba batarukusobora kuzaara abaana abahikiriire. Kuruga Setani ayahukaniza Adamu na Hawa kuruga hali Ruhanga, aikaire n’alengaho kwahukaniza abantu kuruga hali Ruhanga.—Yohana 8:44.

13. Kintu ki Yahwe eky’arukugondeza abantu?

¹³ Okugonza kwa Yahwe hali abantu kutagarukire aho. N’obukiraaba ngu Adamu na Hawa bakamwecwaho, akaba n’akyagonza kuba n’enkoragana enungi hamu n’abantu. Atagonze omwana wabo wena okufa. (2 Petero 3:9) Nahabweki, aho n’aho Yahwe akakorraho entekaniza z’okugarraho obunywani n’abantu. Baitu kinu akaba n’asobora kukikora ata atacwire emisingi ye ey’obuhikiriire? Leka turole.

14. (a) Kusigikirra ha Yohana 3:16, kiki Ruhanga eki yakozere kusobora kucungura abantu kuruga omu kibi n’okufa? (b) Kikaguzo ki eki tusobora kubazaaho n’abantu?

¹⁴ Soma Yohana 3:16. Abantu abarukukira obwingi abaturaliza ha Kiijukyo bamanyire orukarra runu omu mutwe. Baitu ekicunguro kya Yesu nikitusobozesa kita kutunga obwomeezi obutahwaho? Twine omugisa gw’okukonyera abantu kwetegereza eky’okugarukamu eky’ekikaguzo kinu obu turaaba nitubaraaliza kwija ha Kiijukyo, obu turaaba tuli n’abo ha Kiijukyo, kandi n’obuturababungira hanyuma y’Ekiijukyo. Obu barayeyongera kwetegereza ekicunguro, nibaija kweyongera kwetegereza omulingo Yahwe  agonza muno abantu n’omulingo aine amagezi. Bintu ki ebirukukwata ha kicunguro ebi tusobora kubagambira?

15. Yesu akahukanaho ata hali Adamu?

¹⁵ Yahwe akahayo omuntu ahikiriire nuwe aheyo obwomeezi bwe nk’ekicunguro. Omuntu ogu ahikiriire akaba aine kulinda obwesigwa bwe hali Yahwe. Akaba aine kuhayo obwomeezi bwe habw’abantu ayegondiize. (Abarumi 5:17-19) Yahwe akafurra obwomeezi bwa Yesu, ekihangwa kye eky’okubanza kuruga omu iguru yabuta omu nsi. (Yohana 1:14) Nahabweki Yesu akafooka muntu ahikiriire nk’oku Adamu akaba ali. Baitu okwahukanaho na Adamu, Yesu akalinda obwesigwa nk’oku kikaba nikyetagisibwa omuntu ahikiriire. Yesu atacwe ekiragiro kyona ekya Yahwe n’obuyalengesiibwe ekihinguraine.

16. Habwaki ekicunguro kiri kisembo eky’omuhendo?

¹⁶ Habw’okufa nk’omuntu ahikiriire, Yesu akajuna abantu kuruga omu kibi n’okufa. Yesu akaba ahikiriire nka Adamu. Kandi akaba muhulizi yalinda obwesigwa bwe hali Ruhanga. (1 Timoseo 2:6) Akatufera, kandi ekicunguro kye nikiha abantu boona, abasaija n’abakazi, hamu n’abaana omugisa gw’okwomeera ebiro n’ebiro. (Matayo 20:28) Ekicunguro nikyo kisumuruzo ekirukusobozesa ekigendererwa kya Ruhanga kuhikirizibwa.—2 Abakolinso 1:19, 20.

17. Ekicunguro nikitukingurraho mugisa ki?

¹⁷ Yahwe akefereza muno kurora yatuha ekicunguro. (1 Petero 1:19) Natutwara kuba b’omuhendo kuhika n’okuhayo Omwana we ow’agonza muno kutufeera. (1 Yohana 4:9, 10) Nitusobora kugamba, Yesu  akafooka isiitwe omu kiikaro kya Adamu. (1 Abakolinso 15:45) Yesu atatukingurreho omugisa gw’okwomerra ebiro byona kwonka, baitu akatukingurraho n’omugisa gw’okugaruka tuketeraniza ha ka ya Ruhanga. Habw’ekicunguro kinu, abantu nibaija kufooka abahikiriire kandi Yahwe n’aija kubaikiriza bagaruke bafooke bantu ab’eka ye atacwire emisingi ye. Teramu akasisani orole omulingo obwomeezi bulisisana buli muntu wena anyakulinzire obwesigwa bwe hali Yahwe obwalifooka ahikiriire! Obu nubwo boona abali omu iguru n’omu nsi balifooka eka emu anyakwikara omu bumu. Itwena tulifooka baana ba Ruhanga.—Abarumi 8:21.

18. Di Yahwe obwalifooka “ebintu byona hali boona”?

¹⁸ N’obukiraaba ngu abazaire baitu ab’okubanza bakanga obulemi bwa Yahwe, atalekeho kugonza abantu. Kandi n’obu turaaba tutahikiriire, Setani tasobora kutulemesa kuba besigwa hali Yahwe. Kuraba omu kicunguro kinu, Yahwe n’aija kutukonyera kufooka abahikiriire omu miringo yoona. Teramu akasisani orole omulingo obwomeezi bulisisana buli muntu ‘wena anyakurora Omwana akamwikiriza’ obwalitunga obwomeezi obutahwaho. (Yohana 6:40) Isiitwe ow’okugonza kandi ow’amagezi n’aija kuhikiriza ekigendererwa kye kandi akonyere abantu kufooka abahikiriire. Obu nubwo Yahwe alifooka “ebintu byona hali boona.”—1 Abakolinso 15:28, NW.

19. (a) Okusiima kwaitu habw’ekicunguro kusemeriire kutwekambisa kukora ki? (Rora akasanduuko “ Leka Twikale Nituserra Abasemeriire.”) (b) Kiki ekiturukwija kwegaho omu isomo erirukuhonderaho?

¹⁹ Okusiima kwaitu habw’ekicunguro kusemeriire kutwekambisa kugambiraho abandi ha kisembo kinu eky’omuhendo omwingi. Abantu nibetagisa kumanya ngu Yahwe ateriireho abantu boona omugisa gw’okwomeera ebiro n’ebiro kuraba omu kicunguro. Baitu haroho n’emigisa endi nyingi erukukira hanu ei tusobora kutunga habw’ekicunguro. Nk’ekyokurorraho, okujangurra ensonga Setani ezi yatandikireho omu rugonjo rwa Adeni. Omu isomo erirukuhonderaho, nitwija kurora omulingo ekicunguro kikora ekintu kinu.