AMADIINI amaingi​—nk’ediini ey’Abakatuliki, eya Orthodox, enyikiriza ya Buddha, hamu n’agandi garagira abebembezi baago kutataha obuswere. Harubaju orundi, abantu baingi bateekereza ngu ekiragiro kinu nikyo kirugiriiremu ebikorwa by’obusiihani kweyongera omu bebembezi ba madiini.

Nahabweki, kikuru kukaguza, Kihikire omuheereza wa Ruhanga kumutanga kutaaha obuswere kusigikirra ha Byahandiikirwe? Kusobora kugarukamu ekikaguzo kinu, katubanze turole omulingo ekiragiro kinu kyatandikireho n’omulingo Ruhanga akiroramu.

Ekitabu Encyclopædia Britannica nikisoborra ngu okutanga obuswere omu diini kiragiro nambere omw’ebembezi rundi omuhereza w’ediini aragirwa kutataha obuswere n’okwetantara ebikorwa byona eby’okuterana. Omu mwaka 2006, Paapa Benedict XVI obwakaba nabaliza akatebe akakuru akabakatuliki akagamba ngu “okutanga obuswere kukatandika akasumi kake hanyuma y’abakwenda.”

Abakristaayo ab’omu kyasa ky’okubanza baali bataine ekiragiro eky’okutanga obuserwe. Amananu gali ngu, omukwenda Paulo, ayali aroho omu kyasa eky’okubanza akahabura Abakristaayo hali abantu ‘abarukwegesa enyegesa za Setani’ kandi ‘abarukutanga okuswerangana.’​—1 Timoseo 4:1-3.

Omu kyasa kyakabiri nubwo ekiragiro kinu eky’okutanga kuswera kyatandikire kuhonderwa omu madiini “ag’Ekikristaayo.” Ekitabu Celibacy and Religious Traditions, nikyoleka ngu bakatandikaho ekiragiro kinu habw’okugonza kwesisaniriza Abaroma abaali batandikire kutanga kuteerana.

Ebyasa ebyahondiireho, abebembezi bamadiini otwaliiremu n’abafaaza bakasagika muno ekiragiro kinu eky’okutaswera. Batekerezaaga ngu omuntu kusobora kuhikiriza kurungi obujunaanizibwa  obw’okwebembera ediini akaba atasemeriire kuteerana. Baitu kandi, ekitabu Encyclopædia Britannica nikyoleka ngu “omukyasa kya 10, abasesaradoti abarukukira obwingi n’abamu ha babishopu baali baswire.”

Ekiragiro eky’okutanga obuswere, kikateekebwaho omu mwaka 1123 hamu na 1139 omu nkurato eza Lateran omu Roma kandi kuruga obu ediini y’Abakatuliki ikaire n’ehondera ekiragiro kinu. Ekiragiro kinu kikatekebwaho kulemesa abasesaradoti abaswire kugwetera abaana baabo ebintu by’ekeleziya ekyaleteraga ekelezia kufeerwa itungo lyayo.

Baibuli n’eyoleka entekereza ya Ruhanga ha kiragiro eky’okutaswera. Kandi n’eyoleka ebigambo bya Yesu ebirukukwata h’abantu abacwiremu kutataha obuswere nk’oku akaba akozere ‘habw’obukama obw’omwiguru.’ (Matayo 19:12) Ha nsonga niyo emu, omukwenda Paulo akabazaaho Abakristaayo abacwamuga kusigara batali omu buswere habw’okutebeza amakuru amarungi nka uwe.​—1 Abakolinso 7:8; 9:23.

Baitu, Yesu hamu na Paulo batatange abaheereza ba Ruhanga kutaaha obuswere. Yesu akagamba ngu omuntu kusigara atatahire obuswere kisembo, baitu tibali boona abaine ekisembo kinu. Omukwenda Paulo n’obwaraaba y’agambire ngu okutaba omu buswere kirungi, akasoborra yagamba ngu: “tinyina kiragiro kuruga hali Mukama, baitu nimbaha entekereza yange nk’omuntu.”​—Matayo 19:11; 1 Abakolinso 7:25, NW.

Kwongerezaaho hali eki, Baibuli eyoleka ngu haroho abaheereza ba Ruhanga ab’omu kyasa eky’okubanza nk’omukwenda Petero abakaba baswire. (Matayo 8:14; Marako 1:29-31; 1 Abakolinso 9:5) Kandi habw’obusiihani kuba bwingi omu Roma, Paulo akagamba kakuba omuroleerezi aba aswire, asemeriire kuba “musaija womukazi omu” kandi “ahuliza abanabe omu kutinwa kwona.”​—1 Timoseo 3:2, 4.

Obuswere obu baziibweho tibuli obw’omusaija kwikara n’omukazi batateraine hamu, habwokuba Baibuli n’eyoleka kurungi ngu “omusaija amuhege omukazi ekimusemeriire” kandi abaswerangaine tibasemeriire ‘kwimangana.’ (1 Abakolinso 7:3-5) Nahabweki, okutaba omu buswere tikiri kiragiro kuruga hali Ruhanga kandi busaho asemeriire kuhambirizibwa kusigara ataswire rundi ataswirwe ngu habwokuba muheereza wa Ruhanga.

Kusigara otali omu buswere obukiraaba kitali kiragiro, habwaki Yesu n’omukwenda Paulo bakibalizeeho kurungi? Ensonga eri ngu, omuntu ow’atali omu buswere kimwanguhira kutebeza amakuru amarungi. Abo abataswire rundi abataswirwe kibanguhira kumarra obwire bwabo bwona nibaheereza Ruhanga habwokuba tibaine bujunanizibwa nk’obw’abantu abali omu buswere.​—1 Abakolinso 7:32-35.

Nk’ekyokurorraho, David akacwamu kuleka omulimo gwe omurungi omu Mexico kusobora kutebeza amakuru amarungi omu kimu ha byaro ebiri omu ihanga lya Costa Rica. Notekereza David kwikara ataswire kikamukonyera kusobora kukora encwamu enu? David nagamba ngu: “Kikankonyera muno habwokuba kikabanza kungumira kumanyira enyikara enu empyaka, baitu habwokuba nkaba ntaine muntu ondi wena ow’okuroleera kikanyanguhira muno.”

Munyanya itwe Claudia arukuheereza omu biikaro ebitarumu abatebezi abamakuru amarungi nagamba ngu: “Kuheereza Ruhanga kindetera kusemererwa. Okwikiriza kwange hamu n’enkoragana yange na Ruhanga byeyongiire kuguma habw’okurora omulingo Ruhanga arukundoleeramu.”

Okutaba omu buswere tiguli mugugu. Claudia nayongerezaaho ngu: “Obworaaba oli omu buswere rundi otaburumu tikiri kikuru. Baitu noija kusemererwa muno kakuba oheereza Yahwe n’omutima gwawe gwona.”​—Zabuli 119:1, 2.