Obwoba nogonza kumanya kurungi omuntu, kiba kikuru kumanya ebintu ebirungi eby’akozere hamu n’ebizibu eby’arabiremu. Omu mulingo nugwo gumu, obworaaba nogonza kumanya kurungi Ruhanga, osemeriire kumanya ebintu eby’akozere. Obworayeyongera kumanya ebintu Ruhanga yakozere, noija kuhunirra kwega omulingo ebintu ebiyakozere kara birukutugasira omu kasumi kanu hamu n’omu busumi obw’omu maiso.

Yahwe Ruhanga nuwe Omuhangi w’ebintu byona, kandi emiringo ye etarukurorwa nitugirorra ha bintu yahangire. (Abarumi 1:20) ‘Akakora ensi nobusobozibwe, akagumyaho ensi namagezige, kandi omu kwetegerezakwe akabamba iguru.’ (Yeremiya 10:12) Omulingo ebintu byahangirwemu nigwoleka okugonza Ruhanga okwatwiniire.

Tekerezaaho omulingo Yahwe yafoire obwomeezi bwaitu bwembaganiza habw’okutuhanga “omu kusisanakwe wenka.” (Okubanza 1:27) Kinu nikimanyisa ngu naitwe twine obusobozi buke obw’okwoleka emiringo nk’eye n’obukiraaba ngu titusobora kugyoleka ha rulengo nk’orwe. Akatuhanga n’obwetaago obw’eby’omwoyo rundi obusobozi obw’okumanya entekereza ye hamu n’ebintu eby’agonza. Obutwekamba kukora eby’agonza, tutunga okusemererwa kwingi kandi n’obwomeezi bwaitu buba n’ekigendererwa. Baitu ekirukukira byona, akatuhanga n’obusobozi obw’okutunga enkoragana enungi nauwe.

Obuturora ebintu ebiyahangire, kitukonyera kumanya engonzi ezatwiniire. Omukwenda Paulo, akagamba ngu, Ruhanga “atebuzeho kaiso, baitu akakora kurungi, [natunagira] enjura okuruga omu iguru, nebiro ebyokwerezamu ebyokulya, naigusa emitima [yaitu] ebyokulya nokusemererwa.” (Engeso Ezabakwenda 14:17) Ruhanga atagarukire ha kutuha ebintu ebiturukwetaaga kuba bomeezi byonka, baitu akatuha n’ebintu ebituletera okusemererwa kandi akabituha omu bwingi. Baitu binu byona tibirukwingana n’ebintu byona Ruhanga akaba atutekaniriize.

 Yahwe akahanga ensi nukwo abantu bagiikalemu ebiro n’ebiro. Baibuli n’egamba ngu: “Ensi akagiha abana babantu,” kandi “[atagihangire] busa, akagikorra okuikarwamuga.” (Zabuli 115:16; Isaya 45:18) Nibaha abaali basemeriire kugiikaramu kandi kumara kasumi ki? “Abahikiriire baligwetwa ensi, baragiikaramuga ebiro nebiro.”—Zabuli 37:29.

Yahwe akahanga omusaija n’omukazi ab’okubanza Adamu na Hawa kandi yabateeka omu nsi enungi ‘kugirima n’okugiriinda.’ (Okubanza 2:8, 15) Ruhanga akabaha obujunanizibwa obw’emiringo ebiri kandi oburungi: “Muzalege, mukanye, muijuze ensi, mugirye.” (Okubanza 1:28) Omu mulingo ogu, Adamu na Hawa baali baine omugisa ogw’okwegondeza omu nsi habw’ebiro n’ebiro. Eky’obusaasi, bakacwamu kujeemera Ruhanga kandi bafeerwa omugisa ogwokuba bamu ‘h’abahikiriire’ abarukwija ‘kugwetwa ensi’. Baitu nk’oku turukwija kurora, encwamu yabo etahindule ekigendererwa kya Yahwe hali itwe abantu hamu n’ensi. Baitu hati katubanze turole ekintu ekindi Ruhanga ekiyakozere.

Baibuli emanyirwe nk’Ekigambo kya Ruhanga. Habwaki Yahwe yatuhaire Baibuli? Ensonga enkuru eri, kutukonyera kwega ebirukumukwataho. (Enfumo 2:1-5) Amananu gali ngu, Baibuli tegarukamu buli kikaguzo kyona ekirukukwata hali Ruhanga kandi busaho kitabu kyona ekisobora kukikora. (Omugambizi 3:11) Baitu byona ebiri omu Baibuli bitukonyera kumanya ebirukukwata hali Ruhanga. Etukonyera kumanya omulingo atwazaamu abantu. Etukonyera kumanya abantu abagonza n’abatarukugonza. (Zabuli 15:1-5) Etwoleka entekereza ye ha kuramya, engeso, hamu n’itungo. Kandi Baibuli niyo erukukirrayo kimu kutukonyera kumanya emiringo ya Yahwe kurabira omu bigambo n’ebikorwa by’Omwana we Yesu Kristo.—Yohana 14:9.

Ensonga endi habwaki Yahwe yatuhaire Ekigambo kye Baibuli, niyo ey’okutukonyera kuba n’obwomeezi oburumu okusemererwa kandi obwine ekigendererwa. Yahwe akozesa Baibuli kutugambira omulingo tusobora kuba n’amaka agarumu okusemererwa, kumarwa ebintu ebitwine, hamu n’okugumira okwetuntura. Nk’oku magaziini enu eratusoborra, Baibuli egarukamu ebikaguzo ebirukukira obukuru omu bwomeezi nka: Habwaki haroho okubonabona kwingi? Kiki ekirabaho omu busumi obw’omu maiso? Kandi esoborra n’ebintu Ruhanga eby’akozere kusobora kuhikiriza ekigendererwa kye eky’okubanza.

Haroho n’emiringo endi nyingi erukwoleka nk’oku mali Baibuli kitabu ky’embaganiza kandi ekahandiikisibwa Ruhanga. N’obukiraaba ngu Baibuli ekamara emyaka 1600 nehandiikwa, kandi ekahandiikwa abasaija nka 40, yoona hamu ine omutwe gumu omukuru habwokuba Ruhanga nuwe yagihandikisize. (2 Timoseo 3:16) Kutasisana n’ebihandiiko ebindi ebya ira, obutumwa bwa Baibuli tibukahindukaga n’okuhika na hati, kandi kinu nikigumibwa obw’okugirengesaniza n’enkumi n’enkumi ez’ebyahandiikirwe bya Baibuli ebya ira eby’azoirwe. Kwongerra hali eki, Baibuli esoboire kuraba omu bizubi biingi, nk’okutanga abantu kugihindura kugita omu ndimi ezindi, kugigaba, hamu n’okugisoma. Baitu omu kasumi kanu, Baibuli niyo erukukirayo kugabwa n’okuhindurwa omu ndimi ezindi omu nsi yoona. Habwokuba Baibuli esoboire kuhangaara, bwakaiso oburukwoleka ngu “ekigambo kya Ruhanga waitu kirigumaho ebiro nebiro.”—Isaya 40:8.

Ekintu ekindi Ruhanga ekiyakozere eky’embaganiza nukwo kugumya nk’oku naija kuhikiriza ekigendererwa kye. Nk’oku tusangirwe turozere, Ruhanga akaba n’agonza abantu bomeere omu nsi habw’ebiro n’ebiro. Baitu, Adamu obu yacwiremu kujemeera Ruhanga kandi akasiisa, akaferwa omugisa ogw’okutunga obwomeezi obutahwaho kandi yabufereza n’abaijukuru be boona. “Nukwo nkekibi okukyatahire omu nsi obwomuntu omu, kandi nokufa obwekibi; nukwo nokufa kwahikire kuti ha bantu bona, baitu bona bakasisa.” (Abarumi 5:12) Ekigendererwa kya Ruhanga kikazooka nk’ekitarukugenda kuhikirra Adamu obuyajemiire Ruhanga. Baitu kiki Yahwe ekiyakozere?

Yahwe ekiyacwiremu kukora kyali nikiikiraniza n’emiringo ye. Habwokuba acwa emisango ey’obulyo, akafubira Adamu na Hawa habw’ekibi kyabo, baitu habw’engonzi ze akataho omuhanda ogw’okujuna abaijukuru ba Adamu omu kasumi ak’omu maiso.  Habw’amagezi ge amaingi Yahwe akakora encwamu ey’okugonjoora ensonga enu kandi aho n’aho yaranga eky’akaba nagenda kukora. (Okubanza 3:15) Akatekaho omuhanda ogw’okwiha abantu omu kibi n’okufa kuraba omu Mwana we, Yesu Kristo. Eki kyali nikitwarramu ki?

Kusobora kujuna abantu ebizibu ebyaleserwe obujeemu bwa Adamu, Yahwe akatuma Yesu omu nsi kwegesa abantu omulingo basemeriire kwetwazaamu kandi “nokuhayo obwomezibwe okucungura baingi.” a (Matayo 20:28; Yohana 14:6) Yesu akaba nasobora kuhayo ekicunguro habwokuba akaba muntu ow’ahikiriire nka Adamu. Baitu Yesu uwe, akaikara ali muhulizi hali Yahwe kuhikira kimu ha kufa. Nk’oku Yesu akaba atasemeriire kufa, Yahwe akamuhumbuura y’agaruka omu iguru. Obu nubwo Yesu y’akozere ekintu Adamu yalemerwe kukora—kuha abantu abahulizi omugisa ogw’okutunga obwomeezi obutahwaho. “Baitu nkabaingi okubafokere abasisi obwokutahurra okwomuntu omu, nukwo obwokuhurra okwomu abaingi balifoka bati abahikiriire.” (Abarumi 5:19) Kurabira omu kicunguro kya Yesu, Ruhanga naija kuhikiriza omurago gwe ogw’okusobozesa abantu kwomeera omu nsi habw’ebiro n’ebiro.

Omulingo Yahwe yagonjoiremu ebizibu eby’aleserwe obujeemu bwa Adamu nigutwegesa bingi ebirukukwata hali Yahwe. Nitwega ngu busaho kintu kyona ekisobora kulemesa Yahwe kuhikiriza omulimo oguyatandikire, ekigambo kye “kiribona omugisa.” (Isaya 55:11) Kandi nigutwegesa okugonza okwingi Yahwe okw’atwiniire. “Numwo hamanyisiibwemu okugonza kwa Ruhanga namberetuli, ngu Ruhanga akatuma omwanawe ayazairwe omu wenka omu nsi, tube abomezi habwe. Numwo harumu okugonza, tikuli itwe okugonza Ruhanga, baitu uwe okugonza itwe, nokutuma Omwanawe okuba ekicunguro obwebibi byaitu.”—1 Yohana 4:9, 10.

Ruhanga ‘atatwime Omwana we wenka, baitu akamuhayo habwaitu itwena,’ nahabweki nitukigumya ngu Ruhanga naija ‘kutuha ebintu byona’ ebyaturaganiize. (Abarumi 8:32) Bintu ki Yahwe eby’araganiize kutukorra? Soma ekicweka ekirukuhonderaho.