Obw’oba n’ogonza kumanya omuntu, okira kubanza kumukaguza, “Ibara lyawe niiwe oha?” Kakuba okaguza Ruhanga ekikaguzo eki, nakugarukamu ata?

“Ninyowe Yahwe; niryo ibara lyange.”—Isaya 42:8.

Ibara eri lihyaka hali iwe? Nirisobora kuba lihyaka habw’okuba abantu abamu abahindura Baibuli kugita omu ndimi ezindi, baliteeka omu nkarra ezimu kandi abandi balihiramu kimu. Omu kiikaro kyalyo bakira kutekamu ekitiinisa “MUKAMA.” Baitu omu Byahandiikirwe eby’okubanza lirumu emirundi nka 7,000. Ibara linu Omuruheburaniya lihandiikwa YHWH rundi JHVH, kandi omu Runyoro/Rutooro niryo “Yahwe.”

Ibara lya Ruhanga likuru haluwe. Ruhanga nuwe yayehaire ibara eri, busaho n’omu ayalimurukire. Yahwe akagamba ati: “Eri niryo ibara lyange ebiro byona, kandi eki nikyo kiijukyo kyange obusinge bwona.” (Okuruga 3:15) Ibara lya Ruhanga nirisangwa omu Baibuli emirundi nyingi okukira ebitiinisa bye nk’Owobusobozi bwona, Isiitwe, Mukama, rundi Ruhanga, kandi n’okukira amabara agandi agarumu nka Iburahimu, Musa, Daudi, rundi Yesu. Kandi Yahwe n’agonza abantu boona bamanye ibara lye. Baibuli negamba eti: “Nukwo bamanye ngu niwe wenka, ibara lyawe Yahwe, oli haiguru muno nolema ensi zona.”—Zabuli 83:18.

Ibara linu likuru hali Yesu. Omu saara ey’ekira kwetwa eya Isitwe rundi eya Mukama waitu, Yesu akegesa abahondezi be kwesengereza Ruhanga nibakozesa ebigambo binu: ‘Ibara lyawe lyezebwe.’ (Matayo 6:9) Na Yesu wenka akasaba Ruhanga nagamba ati: “Isenyowe nyumiza ibara lyawe.” (Yohana 12:28) Yesu akebembeza kuhaisa ibara lya Ruhanga ekitiinisa omu bwomeezi bwe, kandi enu niyo ensonga habwaki y’asabire nagamba ati: “Nkabamanyisa ibara lyawe, kandi ndirimanyisa.”—Yohana 17:26.

Ibara linu likuru hali abo abamanyire Ruhanga. Abaheereza ba Ruhanga abakara bakakyetegereza ngu ibara linu ery’embaganiza, lyali line akakwate n’okujunwa kwabo hamu n’okutunga obulinzi. “Ibara lya  Mukama rukomero rwamani: anyakuhikiriire arwebingamu kandi ajunwa.” (Enfumo 18:10) “Kandi kirihika wena alikunga ibara lya Mukama alijunwa.” (Yoweri 2:32) Baibuli n’eyoleka ngu kukozesa ibara lya Ruhanga kyakwolekere abaheereza ba Ruhanga abamananu. ‘Baitu amahanga goona galigendera omuntu wena omu ibara ery’omucweziwe, naitwe turagenderaga omu ibara lya [Yahwe] Ruhanga waitu ebiro n’ebiro.’—Mika 4:5; Engeso Ezabakwenda 15:14.

Ibara lye lyoleka nk’oku ali w’embaganiza. Abakugu baingi nibakigumya ngu ibara Yahwe nirimanyisa “N’asobora Kuhikiriza Buli Kintu Kyona.” Yahwe Ruhanga akatukonyera kumanya amakuru g’ibara lye obuyagambiire Musa ati: “Ninyija kufooka ekindagonza.” (Kuruga 3:14, NW) Nahabweki ibara linu tiritukonyera kumanya kwonka ngu Ruhanga nuwe Muhangi w’ebintu byona, baitu liine n’amakuru agandi maingi. Ibara lye niryoleka nk’oku aine obusobozi obw’okufooka kyona eky’arukuba agondeze rundi kufoora ebihangwa bye kyona eky’arukugonza kusobora kuhikiriza ekigendererwa kye. N’obukiraaba ngu ebitiinisa bya Ruhanga byoleka ekiikaro eky’aine, obusobozi bwe, rundi amaani ge, ibara lye lyonka niryo lyoleka eki kyonyini eky’ali kandi n’eky’asobora kuba.

Ibara lya Ruhanga niryoleka nk’oku n’atugonza. Ibara lya Ruhanga niryoleka nk’oku nagonza ebihangirwe bye byona otwaliiremu naitwe. Ruhanga kutugambira ibara lye nikyoleka ngu nagonza tumumanye habwokuba nuwe yabandize kulitugambira. Hataroho kugurukyagurukya, Ruhanga nagonza tumwirre haihi kandi tumanye ngu aroho kwo.—Zabuli 73:28.

Kukozesa ibara lya Ruhanga kyoleka ngu nitumugonza. Nk’ekyokurorraho, nosobora kugambira omuntu ow’orukugonza afooke munywani wawe akozesege ibara lyawe. Wakwehuliire ota kakuba omuntu ogu ayanga kukozesa ibara lyawe? Hanyuma y’obwire otandika kwekaguza omuntu ogu obwaraaba mali nagonza kufooka munywani wawe. Kinu nikyo kimu na Yahwe, atugambiire ibara lye, kandi natutererra kulikozesa. Obutulikozesa, twoleka Yahwe ngu nitugonza kumwirra haihi. Kandi kinu kikuru muno, habwokuba abo ‘abatekereza ibara lye’ abarora kandi abasiima—Maraki 3:16.

Kwega ibara lya Ruhanga niryo idaara ery’okubanza erikwoleka ngu nogonza kumumanya. Baitu titusemeriire kugarukira aho, tusemeriire n’okwongera kumanya ebirukukiraho ha mukama w’ibara eryo. Kandi tusemeriire n’okumanya emiringo ye.