Omu kicweka ekihoire tubalizeeho akokurorraho Yesu akayahaire. Akokurorraho kanu buli bwakaiso oburukwoleka ngu Obukama bwa Ruhanga bukatekwaho omu iguru, kandi Yesu Kristo nuwe arukulema nk’Omukama.

Baibuli n’egamba ngu hanyuma ya Yesu kufooka Omukama, yakubingire Sitaani hamu n’abadaimoni be omu iguru. Hati emirimo yabo yoona nibagikorra omu nsi honka, kandi egi niyo ensonga habwaki ebintu byeyongiire kusiisikara kurugira kimu omu mwaka 1914.​—Okusuku’rwa 12:7, 9.

N’obukiraaba ngu enyikara omu nsi nizeyongera kusiisikara, Yesu, Omukama w’Obukama bwa Ruhanga, haroho ebintu eby’akozere kusobora kukonyera abantu omu nsi yoona. Habw’omulimo ogw’okwegesa abantu Baibuli ogurukukorwa omu nsi yoona Yesu oguyarangire, abantu baingi nibeega kandi nibateeka omu nkora emisingi ya Baibuli. (Isaya 2:2-4) Abantu baingi beegere omulingo basobora kuba n’okusemererwa omu maka, n’okutaikiriza emirimo rundi itungo kufooka ekintu  ekirukukirrayo kimu obukuru omu bwomeezi bwabo. Ebintu ebibarukwega nibibagasira kasumi kanu kandi nibibakonyera kuba bantu Ruhanga abaarukugonza babe bataka hansi y’Obukama bwe.

N’obukiraaba ngu Yesu nalema omu iguru, gavumenti z’abantu nizikyalema omu nsi. Baitu, Ruhanga aragiire Yesu ati: “Iwe lemera hagati omu banyanzigwa baawe.” (Zabuli 110:2) Omu kasumi akatali kahara, Yesu naija kuhwerekereza abo boona abarukumuhakaniza kandi hanyuma amaleho ebizibu byona ebirukutalibaniza abo boona abetegekere kworobera Ruhanga.

Omu kasumi ako, Obukama bwa Ruhanga bulikora ebintu binu

• Bulihwerekereza amadiini g’ebisuba. Amadini agegeseze ebisuba ebirukukwata hali Ruhanga kandi gababonabonesa nigaija kuba gatakyaroho. Baibuli erengesaniza amadiini ganu nk’omukazi omusiihani. Baingi nibaija kuhunirra amadiini ganu obugarahwerekerezebwa.​—Okusuku’rwa 17:15, 16.

• Bulimaraho obulemi bw’abantu. Obukama bwa Ruhanga bulimaraho obulemi obw’abantu.​—Okusuku’rwa 19:15, 17, 18.

• Buliihaho abantu ababi. Kiki ekirihika hali abo abacweriiremu kimu kukora ebibi kandi abangire kworobera Ruhanga? “Baitu ababi balimarwa omu nsi.”​—Enfumo 2:22.

• Buliihaho Sitaani hamu na badaimoni be. Sitaani na badaimoni be nibaija kuba batakyasobora “okubihabiha amahanga.”​—Okusuku’rwa 20:3, 10.

 Binu byona nibiija kukwataho bita abo boona abaikiriza Obukama bwa Ruhanga?

Yesu arukulemera omu iguru, alikora ebintu omulemi wena omu nsi eby’atasobora kukora. Naija kukonyerwa abalemi abandi abarukwingana 144,000, abakomerwe kuruga omu bantu. (Okusuku’rwa 5:9, 10; 14:1, 3) Yesu alikora kyona ekirukusoboka kurora ngu Ruhanga ebyarukugonza byakorwa hanu omu nsi. Obukama bwa Ruhanga bulikorra ki abantu abaliikara omu nsi?

• Bulimarraho kimu oburwaire hamu n’okufa. “Anyakuikarayo taligamba ati Ndi murwaire” kandi “tihakiroho okufa.”​—Isaya 33:24; Okusuku’rwa 21:4.

• Bulireeta obusinge bwonyini hamu n’obuliinzi. “Nobusinge bwabana bawe buliba bwingi,” kandi “baliikarra omuntu wena hansi yomuzabibugwe, nomuntu wena hansi yomutinigwe; kunu tihalibaho alibatinisa.”​—Isaya 54:13; Mika 4:4.

• Buliheereza abantu emirimo emirungi. “Nabakome bange balisemererwa omwanya omukoto omulimo ogwengaro zabu. Tibalitabanira busa.”​—Isaya 65:22, 23.

• Bulisemeza ebintu ebitwetoroire. “Irungu nensi eyomere birisemererwa; ibuga lirikyanganuka, liryakya ebyakyo.”​—Isaya 35:1.

• Bulyegesa abantu ekibasemeriire kukora kusobora kwomeera ebiro n’ebiro. “Bunu nubwo obwomezi obutahwaho, okumanya iwe Ruhanga omu owamananu, nogu ouwatumire, Yesu Kristo.”​—Yohana 17:3.

Ruhana nagonza oyegondeze omu migisa egi. (Isaya 48:18) Ekicweka ekirukuhonderaho nikiija kusoborra eky’osemeriire kukora kasumi kanu, kusobora kuba omu ha bantu abarayegondeza omu migisa enu.