Abantu baingi omu nsi baine obwetaago obw’eby’okulya hamu n’oburaaro. Abamu nibetaaga kutunga okunihira habw’akasumi ak’omu maiso. Kukonyera abantu nk’abo nikiija kutukonyera kita kusemeza Ruhanga kandi n’okutunga omugisa gwe?

“Aganyira owamasege buli ayohora Mukama, kandi ekirungi ekiyakozire alikimusasura.”​—ENFUMO 19:17.

Yesu akabazaaho oruganikyo orw’omusaija ayatiirwe abasuma bamusiga ali haihi kufa. (Luka 10:29-37) Omuntu ow’akaba atamanyire omusaija onu akemerra kandi yakonyera omusaija onu ow’akaba ahutaire muno. Kinu akakikora n’obukiraaba ngu akaba ali w’oruganda rundi.

Omusaija onu ow’embabazi atagarukire ha kuha omusaija ow’akaba ahutaire obujanjabi obw’aho naaho hamu n’okukozesa sente kumukonyera, baitu akamuhumuza n’omu muhito gwe gwona.

Kiki ekiturukwega omu ruganikyo runu? Yesu akaba natwoleka ngu tusemeriire kukonyera abali omu bwetaago omu mulingo gwona oguturukusobora. (Enfumo 3:27) Ebyahandiikirwe Ebirukwera nibyegesa ngu omu kasumi akatali kahara Ruhanga naija kumaraho obunaku n’okubonabona. Baitu nitusobora kwekaguza, kinu alikikora omu mulingo ki kandi alikikora di? Ekicweka ekirukwongeraho nikiija kubazaaho emigisa omuhangi wawe ow’okugonza ey’akutekaniriize.