1, 2. (a) Ensi enu eya Setani n’esisana eta n’omucwi w’ebiragiro owali haihi kwitwa? (Rora ekisisani ekiri ha kutandika kw’isomo linu.) (b) Abanyakuli omu nsi n’abanyakuli omu iguru balyehurra bata hanyuma y’okuhwerekerra kw’ensi enu embi?

TERAMU akasisani. Abalinzi b’enkomo nibatwara omucwi w’ebiragiro omubi muno anyakucweriirwe ogw’okufa. Omusaija onu n’obwaraaba ali mwomeezi kandi atarwaire, nabarwa nk’owafiire.

² Ensi enu nayo n’esisana nk’omucwi w’ebiragiro onu anyakucweriirwe ogw’okufa. Baibuli egamba ngu ‘ensi n’ehwaho.’ (1 Yohana 2:17) Yahwe acwiremu ngu ensi enu ehwerekerezebwe, nahabweki tiharoho kugurukyagurukya ngu niija kuhwaho. Baitu haroho embaganiza hagati y’okuhwerekerra kw’ensi enu n’okwitwa kw’omucwi w’ebiragiro ou tubalizeho. Abantu abamu nibasobora kutekereza ngu omusango ogu bamucweriire tigubaire gw’obwinganiza kandi nibasobora n’okuhakaniza okwitwa kwe. Baitu, Yahwe mucwi w’emisango anyakuhikiriire, kandi encwamu ye ey’okuhwerekereza ensi enu ehikiire kimu. (Ekyebiragiro 32:4)  Okuhwerekerra kwayo tikurukwija kukerererwa. Ensi enu obweramara kuhwerekerezebwa, buli muntu omu iguru n’omu nsi n’aija kurora ngu mali Yahwe acwire omusango omu mulingo guhikire kandi ogw’obwinganiza. Nihaija kubaho okuhumura kwingi!

3. Bizibu ki bbina ebirukwija kuhwaho Obukama bwa Ruhanga obu buraija?

³ “Ensi” ei Yahwe arukuraganiza kuhwerekereza n’etwarramu ki? N’etwarramu ebintu byona ebibi ebirukubaho omu kasumi kanu. Ebintu ebi byona ebibi biri haihi kuhwaho. Kandi enu nayo ‘njiri y’Obukama’ bwa Ruhanga. (Matayo 24:14) Omu kicweka kinu, nitugenda kubazaaho ebizibu bbina ebirukwija kuhwaho Obukama bwa Ruhanga obu buraija: abantu ababi, ebitebe ebibi, ebikorwa ebibi, hamu n’enyikara embi. Kandi buli kimu nitwija kurora (1)  omulingo kirukutukwataho, (2) Yahwe eky’arukwija kukikorra, kandi (3) kiki ekirukwija kugaruka omu kikaro kyakyo.

4. Tukwatwaho tuta abantu ababi?

⁴ Tukwatwaho tuta abantu ababi omu kasumi kanu? Omukwenda Paulo akagamba ngu omu busumi bwa hanyuma, “ebiro ebyakabi kaingi biriija.” Akongera yagamba: “abantu ababi nabetulikirra balihingurana omu bubi, nibabiha kandi nibabihibwa.” (2 Timoseo 3:1-5, 13) Orozere ebintu binu nibihikirra? Abarukukira obwingi tutungire ebizibu nk’okwenderezebwa, okunobwa habw’erangi yaitu, kandi tukozerwe kubi abacwi b’ebiragiro. Abamu tibatiina kukora ebintu binu ebibi omu rwijwire. Abandi befora kuba nibakonyera baitu kandi baine ebigendererwa ebibi. Ebintu binu biine omulingo bitukwataho n’obubiba bitatuhikireho. Twehurra kubi obu tuhurra omulingo abantu abamu barukutwazibwa, nk’ekyokurorraho, abaana, abakuzire omu myaka, hamu n’abandi abatasobora kwerwanaho. Abantu ababi betwaza nk’ebisoro rundi nk’abadaimoni. (Yakobo 3:15) Ekirungi, Ekigambo kya Yahwe kituha okunihira.

5. (a) Abantu ababi bakyaine mugisa ki? (b) Kiki ekirahika ha bantu abarayanga kuhinduraho?

⁵ Yahwe n’aija kukora ki? Omu kasumi kanu Yahwe naha abantu ababi omugisa gw’okwegarukamu. (Isaya 55:7) N’obu kiraaba ngu ensi enu negenda kuhwerekerezebwa, abantu ababi tibakacweriirwe omusango. Baitu, kiki ekirahika hali abo abarayanga kuhinduka baitu bakeyongera kusagika ensi enu kuhikira kimu omu muhito omwingi? Yahwe araganiize kumaraho abantu ababi boona omu nsi enu. (Soma Zabuli 37:10.) Biro binu, abantu baingi basereka ebibi byabo nibamalirra batafubiirwe. (Yobu 21:7, 9) Baitu Baibuli negamba: “Baitu amaisoge gali ha ngeso ezomuntu, kandi arora okugendakwe kwona. Tiharoho omuirima nobukyakuba ekiituro kyokufa. Nambere abakozi bobubi basobora okwesereka.” (Yobu 34:21, 22) Nahabweki titusobora kwesereka hali Yahwe. Nasobora kurora buli kintu kyona eky’ababi bakora. Hanyuma ya Hara-magedoni, tulirora nambere baikaraga baitu titulibarora. Tibalyongera kurorwa!—Zabuli 37:12-15.

6. Abantu ababi obu barahwerekerezebwa, nibaha abarakiraho, kandi habwaki ago gali makuru marungi?

 ⁶ Abantu ababi obu barahwerekerezebwa, nibaha abarakiraho? Yahwe n’aturaganiza ngu: “Baitu abaculezi baligwetwa ensi; balikyanganuka obwobusinge obwingi.” Omu Zabuli niyo emu, akongera yagamba: “Abahikiriire baligwetwa nsi, baragiikaramuga ebiro nebiro.” (Zabuli 37:11, 29) “Abaculezi” hamu ‘n’abahikiriire’ nubo baha? Abaculezi nubo abantu aborobera Yahwe kandi abamwegeraho. Abahikiriire nubo abantu abagonza kukora ebintu ebihikire omu maiso ga Ruhanga. Biro binu, abantu ababi nubo barukukira obwingi. Baitu omu nsi empyaka, halibayo abantu abaculezi hamu n’abahikiriire bonka, kandi ensi baligifoora orugonjo!

7. Tukwatwaho tuta ebitebe ebibi omu kasumi kanu?

⁷ Tukwatwaho tuta ebitebe ebibi omu kasumi kanu? Ebikorwa ebibi ebirukukira kukorwa tibireserwe abantu kwonka baitu bireserwe ebitebe. Obukaikuru n’obukaikuru bw‘abantu nibahabisibwa ebitebe by’amadini. Ekyokurorraho, babaza ebisuba hali Ruhanga, bagamba ngu Baibuli tesobora kwesigwa, kandi babiiha abantu obu baba nibasoborra ha birukugenda kuhika ha bantu n’ensi enu. Gavumenti embi zisagika obulemu n’okusoroora omu mahanga, kandi zimigiriza abanaku n’abatasobora kwerwanirra. Gavumenti za mulingo gunu zimalirra zigudahaire habw’okusoroora n’okulya enguzi. Ebitebe eby’omururu bisiisa eby’obuhangwa, kandi bimigiriza abakozi n’abaguzi nukwo bigoborre kukira abandi. Amananu gali ngu, ebitebe ebibi nibyo ebiretiire abantu baingi okubonabona omu kasumi kanu.

8. Baibuli neyoleka ngu kiki ekirihika ha ebitebe byona ebirukusisana nk’ebiine amaani?

⁸ Kiki eki Yahwe arakora? Gavumenti obu ziryehindukirra Baburoni orukuru aganyakuli madiini goona ag’ebisuba, omuhito omwingi guliba gutandikire. (Okusuku’rwa 17:1, 2, 16; 18:1-4) Amadiini ag’ebisuba goona galihwerekerezebwa. Baitu kiki ekirihika ha bitebe ebindi ebibi? Baibuli n’ebirengesaniza n’ensozi rundi ebizinga habwokuba abantu nibasobora kubirora nk’ebiine amaani maingi. (Soma Okusuku’rwa 6:14.) Baitu n’eyoleka ngu gavumenti hamu n’ebitebe byona ebitarukusagika Obukama bwa Ruhanga nibiija kuhwerekerezebwa. Kunu nukwo okurukwija kuba okumalirra okw’omuhito omwingi. (Yeremiya 25:31-33) Hanyuma y’eki, Tihalyongera kubaho ebitebe ebibi!

9. Habwaki nitukigumya ngu ensi empyaka niija kuba etekanizibwe kurungi?

⁹ Kiki ekiragaruka omu kiikaro ky’ebitebe ebibi? Halibaho ekitebe kyona omu nsi hanyuma ya Hara-magedoni? Baibuli n’egamba ngu: “Ntutegereza iguru erihyaka nensi empyaka, nambere haikara okuhiki’ra.” (2 Petero 3:13) Iguru erya ira nizo gavumenti embi kandi ensi eya ira nubo bantu abarukulemwa gavumenti ezi. Obu birahwerekerezebwa, kiki ekiragaruka omu kiikaro kyabyo? “Iguru erihyaka nensi empyaka.” Iguru erihyaka niyo Gavumenti empyaka, enyakurumu  Yesu Kristo hamu na 144,000. Ensi empyaka nubo abantu abarukulemwa Obukama bwa Ruhanga. Yesu n’abalemi bagenzi be balihondera ekyokurorraho kya Yahwe eky’okutekaniza kurungi ebintu. (1 Abakolinso 14:33) Nahabweki, ‘ensi empyaka’ niija kuba etekaniziibwe kurungi. Nihaija kubaho abasaija abarungi abararolerra ebintu. (Zabuli 45:16) Abasaija abo baliba nibebemberwa Kristo hamu na 144,000. Teramu akasisani orole omulingo ensi erisisana hanyuma y’Obukama bwa Ruhanga kugaruka omu kiikaro ky’ebitebe ebibi ebiriba bihwerekereziibwe!

10. Bikorwa ki ebibi ebirukusangwa omu kiikaro orukwikaramu, kandi iwe n’eka yawe mukwasirweho muta?

¹⁰ Tukwatwaho tuta ebikorwa ebibi omu kasumi kanu? Tuli omu nsi enyakwijwiremu obusihani, obutali bwesigwa hamu n’obutabanguko. Eby’okwesemeza byoleka ngu ebintu binu birungi kandi ha kaire nuko kamu bidibya emisingi ya Yahwe erukukwata ha kibi n’ekirungi. (Isaya 5:20) Abazaire basemeriire kwegendereza muno kurora balinda abaana babo batakwatwa omutego gunu. Amananu gali ngu, kusigikirra nk’oku tuli omu nsi etarukuhondera emisingi ya Yahwe, itwena tusemeriire kukora kyona ekirukusoboka kulinda enkoragana yaitu na Yahwe.

11. Omulingo Yahwe yacweriire Sodomu na Gomora omusango nigutwegesa ki?

¹¹ Yahwe n’aija kukora ki? Tekereza hali eki Yahwe yakozere habw’ebikorwa ebibi ebikaba nibikorwa omu Sodomu na Gomora. (Soma 2 Petero 2:6-8.) Omuheereza wa Yahwe Luta hamu n’eka ye bakabonabona muno habw’ebintu ebibi ebikaba nibikorwa omu mbuga ezi. Yahwe akacwamu kuhwerekereza ekiikaro eki kyona nukwo amaleho ebibi ebikaba nibikorwa. Baitu akakikora “kuba eky’okurorraho” hali abantu ababi ab’akasumi kanu. Yahwe n’agenda kuhwerekereza ebikorwa ebibi byona omu kasumi kanu nk’oku yakozere omu busumi bwa Luta.

12. Bintu ki eby’olindiriire omu nsi empyaka?

¹² Nibiha ebiragaruka omu kiikaro ky’ebikorwa ebibi? Omu nsi empyaka, nitwija kuba nitukora emirimo eratuletera okusemererwa. Ekyokurorraho, nitwiija kufoora ensi yona orugonjo kandi twombeke amaju agaturaikaramu n’agabagonzebwa baitu. Nitwiija kutangirra obukaikuru n’obukaikuru bw’abantu abarahumbuka kandi tubegese hali Yahwe n’ebyakoliire abantu. (Isaya 65:21, 22; Engeso Ezabakwenda 24:15) Omu kasumi ako, nitwiija kuba nitukora ebintu ebirukutusemeza kandi ebirihaisa Yahwe ekitiinisa.

13. Biki ebyarugire omu bujemu obwabaire omu Adeni?

¹³ Tukwatwaho tuta enyikara embi omu kasumi kanu? Abantu ababi, ebitebe ebibi, hamu n’ebikorwa ebibi biresereho enyikara embi omu nsi. Itwena tukwatwaho ebintu nk’obulemu, obunaku okusorora omu rangi n’omu mahanga, oburwaire hamu n’okufa. Enyikara enu embi ekatandika hanyuma ya Setani, Adamu, hamu na Hawa kujemera Yahwe. Kandi itwena tukwasirweho obujemu obu.

14. Yahwe nagenda kukora ki kumaraho enyikara embi yoona?

 ¹⁴ Yahwe n’aija kukora ki? Tekereza ha byokurorraho binu. Yahwe araganize kumaraho obulemu. (Soma Zabuli 46:8, 9.) N’aija kumaraho oburwaire. (Isaya 33:24) N’aija kumaraho okufa. (Isaya 25:8) N’aija kumaraho obunaku. (Zabuli 72:12-16) Kandi Yahwe n’aija kumaraho ebintu byona ebirukutuletera obujune. Kandi n’aija n’okuhwerekereza Setani n’abadaimoni be boona!—Abefeso 2:2.

15. Hanyuma ya Hara-magedoni, bintu ki ebiriba bihoireho?

¹⁵ Tekerezaho omulingo ensi erisisana hanyuma y’ebintu ebibi nk’obulemu, oburwaire, hamu n’okufa obu biriba bihoireho! Tihalibaho amahe, eby’okurwanisa rundi kwijuka obulemu. Abadakitali, abanaansi, amarwarro, obuju bw’abafu, rundi amalimbo byona biriba bitakyayetagisa. Kusigikirra nk’oku haliba hataroho obucwi bw’ebiragiro, tuliba tutarukwetagisa poliisi, obude bw’okutumanyisa akabi rundi kofuro n’ebisumuruzo! Enyikara yona embi erukutuletera kweralikirra eriba ehoireho.

16, 17. (a) Abantu abalikira Hara-magedoni balyehurra bata? Soborra. (b) Obuturaaba nitugonza kukiraho okuhwerekerra kw’obusinge bunu, tusemeriire kukora ki?

¹⁶ Obwomeezi bulisisana buta enyikara embi obw’erihwaho? Tikyanguhire kukitekerezaaho. Habw’okwikara muno omu nyikara enu embi, nitusobora kuba tutakyamanya n’omulingo erukutubonabonesa. Ekyokurorraho, omuntu obwaikara muno haihi n’ebyoma ebirukusa obuhunga, akaire kahika n’amanyiira etoko. Kandi omuntu arukwikara haihi na kasasiro ahika obwire n’amanyiira ekinunko. Baitu Yahwe obwaraihaho enyikara embi yona, nitwija kutunga okuhumura kw’amaani!

¹⁷ Kiki ekirigaruka omu kiikaro ky’okwetuntura? Zabuli 37:11 n’egamba: “Balikyanganuka obwobusinge obwingi.” Kanikihumuza kumanya ngu Yahwe n’atugondeza obusinge! Omu biro binu eby’obujune bwingi, kora kyona ekirukusoboka kwikara oli haihi na Yahwe hamu n’ekitebe kye. Okunihira kwawe okw’ebiro eby’omu maiso kw’omuhendo mwingi muno, nahabweki kutekerezeho muno, ogumye ngu mali naiwe n’okwikiririzaamu, kandi okugambireho n’abandi. (1 Timoseo 4:15, 16; 1 Petero 3:15) Obw’orakora eki, torukwija kuhwerekerra n’obusinge bunu baitu noija kukiraho nukwo otunge obwomeezi obutahwaho kandi oburumu okusemererwa.