1. Nitusobora tuta kutunga amagezi, kandi nigaija kutukonyera gata?

AMAGEZI garuga hali Yahwe kandi naitwe atuhaireho. Yakobo 1:5 nihagamba ngu: “Baitu omuntu wena omulinywe obwaburwa amagezi, asabe Ruhanga, arukuha bona okutaima kunu tarukuhana, kandi alihebwa.” Omulingo gumu ogututungamu amagezi nukwo kwikiriza okuhanwa okuruga hali Ruhanga. Obutukora ekintu kinu, kitulinda kutakora ebintu ebitahikire kandi kitukonyera kwikara haihi na Yahwe. (Enfumo 2:10-12) Kandi nitwija kuba n’okunihira okw’okutunga obwomeezi obutahwaho.​—Yuda 21.

2. Nitusobora tuta kwega kugonza okuhana kwa Yahwe?

² Habw’okutahikirra, rundi habw’omulingo twakuziibwe, nikisobora kutugumira kwikiriza okuhanwa rundi kukurora nk’ekintu ekirungi. Baitu obuturora omulingo okuhanwa okuruga hali Ruhanga kugasiire obwomeezi bwaitu, twetegereza omulingo atugonza. Enfumo 3:11, 12 nihagamba ngu: “Mwana wange, otagaya [okuhana] kwa Mukama.” Kandi ngu: “Baitu Mukama owagonza nuwe [ahana].” Nitukigumya ngu Yahwe natugondeza ebirungi. (Soma Abaheburaniya 12:5-11.) Habwokuba Ruhanga  natumanya kurungi, okuhana kuruga hali uwe kuhikire kandi tukwetaaga. Omu kicweka kinu, nitwiija kurora okuhana okw’emiringo ena: (1) okwehana, (2) omulingo abazaire basemeriire kuhana abaana babo, (3) okuhana okututunga omu kitebe, hamu (4) ekintu ekirukusaliza kukira okuhanwa kwona okututunga.

3. Omwana ayega ata okwehana? Ha ekyokurorraho.

³ Obu turaba n’okwehana, nikimanyisa ngu nitusobora kulema omulingo twetwazaamu n’omulingo tutekereza. Tituzarwa n’okwehana baitu twine kukwega. Ekyokurorraho, omwana obwaba nayega kuvuga egaali, omuzaire amukwatirra nukwo atagwa. Baitu, hanyuma y’obwire, omwana atandika kwega, kandi omuzaire aba nasobora kumulekera kugenda wenka habw’akaire kataito nukwo ayongera amukwatirra. Omuzaire obwarora ngu omwana nasobora kuvuga egaali wenka, amulekera tayongera kumukwatirra. Nikyo kimu n’abazaire, obubamara kutendeka omwana wabo “omu kuhanwa nomukugambirirwa kwa Mukama waitu,” baba nibakonyera omwana wabo kwega kwehana n’okuba w’amagezi.​—Abefeso 6:4.

4, 5. (a) Habwaki okwehana kiri kicweka kikuru eky’omuntu omuhyaka? (b) Habwaki ensobi ezitukora zitasemeriire kutuletera kuhwamu amaani?

⁴ Kinu nikikwataho n’abantu abeega hali Yahwe bamazire kukura omu myaka. Nibasobora kuba nibamanya kwehana, baitu baba batakafokere Abakristaayo abakuzire omu by’omwoyo. Obu batandika kujwara “omuntu omuhyaka” n’okulengaho kuba nka Kristo, beyongera kukura omu by’omwoyo. (Abefeso 4:23, 24) Okwehana kutukonyera kwega “okwanga obutatina Ruhanga nokwegomba okwomunsi, nukwo tube abomezi omu businge bwa hati bunu omu kwerinda nokuhikirra nokutina Ruhanga.”​—Tito 2:12.

⁵ Baitu itwena tusiisa. (Omugambizi 7:20) Nahabweki obutukora ensobi, kiba nikimanyisa ngu titwine kwehana kwona rundi ngu okwehana kwaitu kuceke? Nangwa. Enfumo 24:16 rugamba ngu: “Baitu omuntu ahikirire agwa emirungi musanju, kandi agaruka okuimuka.” Kiki ekisobora kutukonyera kwongera kwimuka? Tigali maani gaitu baitu omwoyo gwa Ruhanga. (Soma Abafiripi 4:13.) Omulingo gumu ogw’ekyana eky’omwoyo ogurukusisanaho n’okwehana nukwo okwetanga.

6. Nitusobora tuta kufooka basomi barungi ab’Ekigambo kya Ruhanga? (Rora ekisisani ekiri ha rupapura 27.)

⁶ Okusaba, kwesomesa Baibuli, hamu n’okwecumitiriza ha bitusomere nibiija kutukonyera kuba n’okwehana. Baitu kakuba kiba kitarukukwanguhira kwesomesa Baibuli rundi oli muntu atagonza kusoma? Otahwamu amaani. Yahwe naija kukukonyera kuba ‘n’okwegomba’ okw’Ekigambo kye kakuba oikiriza obukonyezi bwe. (1 Petero 2:2) Saba Yahwe kukukonyera kuba n’okwehana nukwo tunge obwire obw’okwesomesa Baibuli. Nosobora kutandika noyesomesaga habw’edakiika ntaito. Mpora mpora noija kutandika kwanguhirwa kandi otandike n’okwegondeza omu kwesomesa. Noija kugonza obwire obw’oramara noyecumitiriza habintu ebyoyegere hali Yahwe.​—1 Timoseo 4:15.

7. Okwehana nikusobora kuta kutukonyera kuhika ha bigendererwa byaitu omu kuheereza Yahwe?

⁷ Okwehana kutukonyera kuhika ha bigendererwa byaitu omu kuheereza Yahwe.  Ekyokurorraho, omuzaire omu akehurra atandikire kugarukirra, nahabweki aketeraho ekigendererwa eky’okuheereza nka payoniya ow’akasumi koona. Okwehana kukamukonyera kuta? Akasoma ebicweka ebirukubaza ha kuheereza nka payoniya ebizira omu magaziini zaitu kandi yasaba Yahwe. Kinu kikamukonyera kugumya enkoragana ye na Yahwe. Kandi haroho n’obuyaherezaga nka payoniya omusagiki. Ataikirize ekintu kyona kumulemesa, oihireho akaikaza omutima gwe ha kigendererwa kye. Hanyuma y’obwire, akatandika kuheereza nka payoniya ow’akasumi kona.

8-10. Kiki ekisobora kukonyera abazaire kukuza abaana babo bakaheereza Yahwe? Ha ekyokurorraho.

⁸ Yahwe ahaire abazaire obujunanizibwa bw’okukuliza abaana babo “omu kuhanwa n’omu kugambirirwa kwa Mukama waitu.” (Abefeso 6:4) Omu nsi ey’akasumi kanu, ekintu kinu tikyanguhire. (2 Timoseo 3:1-5) Abaana obu bazarwa, baba batamanyire kwahukaniza ekirungi n’ekibi, kandi omuntu wabo ow’omunda aba atatendekerwe. Nahabweki nikyetagisa kubahana nukwo omuntu wabo ow’omunda atendekwe. (Abarumi 2:14, 15) Omuhandiiki omu  ha bya Baibuli akasoborra ngu ekigambo eky’Oruyonani ekirukuhindurwa “okuhana” nikisobora kumanyisa “kukuza omwana” nukwo afooke muntu ow’obujunanizibwa.

⁹ Abazaire obubahana abaana babo n’okugonza, abaana bahurra baine obulinzi. Beega ngu obugabe bugira nambere bugarukira kandi ngu haroho ebiruga omu buli kimu ekibaracwamu kukora omu bwomeezi. Nahabweki kikuru abazaire Abakristaayo kwesiga amagezi agaruga hali Yahwe kubakonyera kukuza abaana babo. Emiringo ey’okukuzaamu abaana eyahukana kusigikirra nambere omuntu arukwikara, kandi emiringo enu ikara nehinduka. Baitu abazaire abahuliriza Yahwe tibateebereza ha kibasemeriire kukora kandi tibesiga amagezi gabo bonka rundi entekereza z’abantu.

¹⁰ Nitusobora kwegera ha kyokurorraho kya Nuha. Yahwe obuyamugambiire kwombeka elyato, Nuha akaba atamanyire omulingo gw’okulyombekamu. Akaba aine kwesiga Yahwe, kandi Baibuli egamba ngu Nuha “nukwo yakozire ati” ekirukumanyisa ngu akakora nkoku Yahwe yamugambiire. (Okubanza 6:22) Kiki ekyarugiremu? Elyato likajuna obwomeezi bwa Nuha n’obweka ye. Nuha akaba muzaire omusinguzi. Habwaki? Habwokuba akesiga amagezi ga Ruhanga. Nuha akegesa kurungi abaana be kandi akabateraho ekyokurorraho ekirungi, ekintu ekikaba kitanguhire omu bwire obubi Okusandaara kw’Amaizi kutakaizire.​—Okubanza 6:5.

11. Habwaki abazaire basemeriire kukora kyona ekirukusoboka kutendeka abaana babo?

¹¹ Obworaba oli muzaire, nosobora ota kukora nkoku Yahwe arukukuragira? Huliriza Yahwe. Leka akukonyere kukuza abaana bawe. Hondera obuhabuzi kuruga omu Kigambo kye n’ekitebe kye. Hanyuma y’obwire, abaana bawe nibaija kukusiima habw’okukora ebintu binu. Ow’oruganda omu akagamba ngu: “Ninsiima muno habw’omulingo abazaire bange bankulizemu. Bakakora kyona ekirukusoboka kurora bampika ha mutima.” Kandi nagamba ngu abazaire be nubo bamukonyiire kwirra haihi na Yahwe. Baitu nabwo, n’obu abazaire bakora kyona ekirukusoboka kwegesa omwana wabo, omwana nasobora kuruga hali Yahwe. Baitu omuzaire anyakulengereho kukonyera omwana we nasobora kuba n’omuntu w’omunda omurungi kandi nokwikara nanihira ngu kiro kimu omwana we aligarukira Yahwe.

12, 13. (a) Omwana kakuba abingwa omu kitebe, abazaire nibasobora bata kwoleka ngu niborobera Ruhanga? (b) Eka emu ekagasirwa eta habw’abazaire kworobera Yahwe?

¹² Habw’abazaire abamu, okumu ha kulengwa okugumire muno kwija omwana obw’abingwa omu kitebe. Omuzaire omu ou muhara we yabingirwe omu kitebe nagamba: “Nkalengaho kuseruliriza omu bitabu by’omwiru omwesigwa nukwo ntunge ensonga ey’okwekwasa kusobora kumara obwire na muhara wange hamu n’omwijukuru wange.” Baitu iba akamukonyera kukirora ngu bakaba batarukujunanizibwa ha bwa muhara wabo kandi ngu bakaba basemeriire kwikara bali besigwa hali Yahwe.

¹³ Hanyuma y’emyaka nke, muhara we akagarurwa omu kitebe. Nyina nagamba: “Hati nasobora kunsindikira obutumwa rundi kunterra esimu haihi buli kiro! Hati nyowe na iba nyowe natutekamu ekitinisa habwokuba namanya ngu tukorobera Yahwe. Kandi twine enkoragana enungi muno.” Mutabani rundi muhara wawe obwaraba yabingirwe omu kitebe, orayesiga “[Yahwe] nomutima gwawe gwona”? Oramwoleka ngu torukwigamira “ha  kwetegereza kwawe wenka”? (Enfumo 3:5, 6) Ijuka ngu, okuhanwa okuruga hali Yahwe kutwoleka amagezi ge n’engonzi ez’atwinire. Otebwa ngu Yahwe akahayo Omwana we ha bw’abantu boona, otwaliiremu na mutabana wawe rundi muhara wawe. Ruhanga nagonza buli omu kutunga obwomeezi obutahwaho. (Soma 2 Petero 3:9.) Nahabweki, abazaire mweyongere kwesiga okuhana n’obuhabuzi bwa Yahwe, n’obu kiraba ngu haroho obukiba kitanguhire kubworobera. Huliiriza okuhanwa okuruga hali Ruhanga kandi otakuhakaniza.

14. Obuhabuzi Yahwe obwatuha kurabira omu mwiru omwesigwa butugasira buta?

¹⁴ Yahwe akaranganiza kurolerra, kulinda, n’okwegesa ekitebe Ekikristaayo. Kinu akikora omu miringo nyingi. Ekyokurorraho, akataho Omwana we kurolerra ekitebe, kandi Yesu ataireho “omwiru omwesigwa” kutuha ebyokulya eby’omwoyo kutukonyera kwikara tuli besigwa. (Luka 12:42, NW) Omwiru omwesigwa atuha oburagirizi obukuru muno rundi okuhana. Nosobora kuba noijuka orubazo oruwahuliire rundi ekicweka ekiwasomere kuruga omu magazini zaitu kandi kyahindura omulingo otekerezamu rundi oyetwazaamu. Kiine kuba kyakusemeiize kukora empindukahinduka habwokuba nikyoleka ngu okaikiriza Yahwe kukuhana.​—Enfumo 2:1-5.

15, 16. (a) Emirimo abagurusi bakora etugasira eta? (b) Nitusobora tuta kuletera abagurusi kuba n’okusemererwa obubarukuba nibakora omulimo gwabo?

¹⁵ Kristo atuterireho n’abagurusi abarolerra ekitebe omu mulingo ogw’okugonza. Baibuli eyeta ab’oruganda banu ‘ebisembo omu bantu.’ (Abefeso 4:8, 11-13) Emirimo abagurusi bakora nesobora kutugasira eta? Nitusobora kwegera ha kwikiriza kwabo n’ekyokurorraho kyabo, kandi nitusobora kuhondera obuhabuzi batuha kuruga omu Baibuli. (Soma Abaheburaniya 13:7, 17.) Abagurusi nibatugonza kandi bagonza twirre haihi na Yahwe. Kakuba barora ngu nitwosa kwija omu nso’rokana rundi tutandikire kugarukirra, nibaija kwanguha kutukonyera. Nibaija kutuhuliriza, batugarremu amaani kandi batuhe amagezi kuruga omu Baibuli. Obubakuha obukonyezi, oburora nk’obwakaiso oburukwoleka ngu Yahwe nakugonza?

¹⁶ Ijuka ngu obwire obumu tikyanguhira abagurusi kutuha obuhabuzi. Notekereza nabbi Nasani akehurra ata obuyagenzere kuhabura Omukama Daudi hanyuma y’okulengaho kusereka ekibi ekyakaba akozere? (2 Samuiri 12:1-14) Kandi n’otekereza omukwenda Paulo akehurra ata obwakaba nagenda kuhabura Petero, omu ha bakwenda 12, habw’okutwaza kurungi Abakristaayo Abayudaaya kukira abatali Bayudaaya? Paulo akaba nayetaaga kuba n’obumanzi kurora yakora ekintu eki. (Abagaratiya 2:11-14) Hati iwe osobora ota kuletera abagurusi kwanguhirwa kukuha obuhabuzi? Ba muntu arukwebundaaza, arukusiima kandi anyakwanguhire kuhikirra. Rora obukonyezi obubakuha nk’obwakaiso oburukwoleka okugonza kwa Yahwe. Noija kugasirwa, kandi n’abagurusi nibaija kwegondeza omu mulimo gwabo.

17. Abagurusi bakakonyera bata munyaanya itwe?

¹⁷ Munyaanya itwe omu nagamba ngu, ebintu ebyamubaireho omu busumi bwenyuma bikamuletera okutanguhirwa kugonza Yahwe, kandi kinu kikamuletera kwenuuba. Nagamba ngu: “Nkaba nkimanyire ngu nsemeriire kubaza n’abagurusi. Batambalize n’ekiniga rundi kuncwera omusango, baitu  bakangarramu amaani kandi bangumya. Hanyuma ya buli ruso’rokano, omu halubo y’ankaguzaga nkoku ndukwehurra n’obukiraba ngu babaga n’ebintu bingi ebyokukora. Habw’ebintu ebyambaireho, kikangumira kwikiriza ngu Ruhanga nasobora kungonza. Emirundi nyingi, Yahwe akozeseze ekitebe hamu n’abagurusi kugumya ngu mali nangonza. Hati tindukugonza Yahwe andekaho.”

18, 19. Kiki ekirukusaliza muno kukira obusalizi obutunga obu tuhanwa? Ha ekyokurorraho.

¹⁸ Okuhanwa nikusobora kutusaliiza baitu ebirugamu obutwanga okuhanwa Ruhanga nibisaliiza kukiraho. (Abaheburaniya 12:11) Nitusobora kwega isomo kuruga ha kyokurorraho ekibi ekya Kaini n’Omukama Zedekiya. Yahwe obuyarozere ngu Kaini anobere mugenzi we kandi nagonza kumwita, akamuhabura ngu: “Kiki ekikubihiize? Kandi ekikusisikaize amaiso? Obworakoraga kurungi toikirizibwe, kandi obwotalikora kurungi, ekibi nikibundara ha ruigi: nokwegomba kwakyo kurabaga haliwe, baitu iwe wakukiremere” (Okubanza 4:6, 7) Kaini akanga okuhanwa oku Yahwe yamuhaire, kandi yagenda omu maiso yaita mugenzi we, ebyarugiremu bikamuletera kubonabona obwomeezi bwe bwona. (Okubanza 4:11, 12) Kakuba Kaini yahuliriize Ruhanga, yakubaire atahikirweho obusaasi obu bwona.

¹⁹ Zedekiya akaba mukama muceke kandi mubi. Obw’akaba nalema, abantu ba Yerusalemu bakaba bali omu nyikara embi muno. Nabbi Yeremiya akahabura Zedekiya emirundi nyingi ngu akaba asemeriire kuhinduramu. Baitu omukama akanga okuhanwa okwarugire hali Yahwe, kandi ebyarugiremu bikaba bibi muno. (Yeremiya 52:8-11) Yahwe tarukugonza tuhikweho obusaasi obutarukwetagisa!​—Soma Isaya 48:17, 18.

20. Kiki ekirihika hali abo abarukwikiriza okuhanwa okuruga hali Ruhanga hamu n’abo abarukukwanga?

²⁰ Omu kasumi kanu, baingi omu nsi basekereza okuhanwa okuruga hali Ruhanga kandi tibakuhondera. Baitu hasigaireyo akacu kake, omuntu wena arukwanga okuhanwa okuruga hali Ruhanga naija kuhikwaho obusaasi obw’amaani. (Enfumo 1:24-31) Nahabweki leka ‘tuhu’re okwegesebwa, kandi tube abamagezi.’ Enfumo 4:13 nirugamba ngu, “Kwatira kimu ha kwegesebwa; otakulekera. Kulindire kimu; baitu nubwo bwomezi bwawe.”