1. Baibuli ekira kubazaaho eta okuhanwa?

KIKI eky’otekerezaaho obw’ohurra ekigambo “okuhana”? Abantu baingi obubahurra ekigambo kinu batekerezaho kufubirwa, baitu kandi okuhanwa nikukiraho. Baibuli egamba ngu okuhanwa kurungi hali itwe kandi ekira kukubazaaho obweba n’ebazaaho ebintu nka okumanya, amagezi, okugonza hamu n’obwomeezi. (Enfumo 1:2-7; 4:11-13) Eki kiri kiti habwokuba Ruhanga obwatuhana, kyoleka ngu natugonza kandi nagonza twomeere ebiro n’ebiro. (Abaheburaniya 12:6) N’obu kiraba ngu obwire obumu okuhana okuruga hali Ruhanga kubamu kufubirwa, tikubonabonesa kandi tikutuhikyaho kabi. Amananu gali ngu, amakuru agarukukirayo ag’ekigambo kuhana nigatwarramu kwegesebwa, nkoku omuzaire ow’okugonza ayegesa omwana we.

2, 3. Kiki ekirukwoleka ngu okuhana nikutwarramu okwegesa hamu n’okufubira? (Rora ekisisani ekiri ha rupapura 23.)

² Tekerezaaho ekyokurorraho kinu. Omwojo arukwetwa Johnny akaba nazanira omupiira omu nju. Nyina akamugambira ngu: “Johnny, okimanyire ngu tosemeriire kuzanira omupiira omu nju! Nosobora kwata ebintu.” Baitu akanga kuhuliiriza  nyina, yagumizaamu nazanira omu nju. Omupiira gukateera ekibindi eky’ebyakyo kandi kyayatika! Nyina akakora ki kumuhana? Akabanza yamusoborra habwaki ekyakozere kitahikire. Akaba nagonza Johnny akimanye ngu kirungi kuhuliiriza abazaire be kandi ngu ebiragiro ebibamuteraho nibyetagwa kandi tibigumire. Kusobora kumukonyera kwega isomo, nyina akacwamu kumufubira obu namwihaho omupiira kumara akasumi. Eki kitasemeze Johnny, baitu kikamukonyera kwijuka ngu obwayanga kworobera abazaire be, ebirugamu tibiba birungi.

³ Nk’Abakristaayo, tuli kicweka eky’eka ya Ruhanga. (1 Timoseo 3:15) Isiitwe Yahwe aine obusobozi bwokutugambira ekihikire n’ekitahikire n’okutufubira obuturukuba tumujemiire. N’ekindi, kakuba tukora ensobi hanyuma tukatunga ebizibu, okuhana Yahwe okwatuha nikusobora kutukonyera kwijuka ngu kikuru muno kumwobera. (Abagaratiya 6:7) Ruhanga natugonza muno nahabweki tarukugonza kuturora nitubonabona.​—1 Petero 5:6, 7.

4. (a) Yahwe nagonza tutendeke abandi omu mulingo ki? (b) Mu kicweka kinu nitwija kubazaho ki?

⁴ Okuhana obu kusigikirra ha misingi ya Baibuli kikonyera omwana rundi omwegi wa Baibuli kufooka muhondezi wa Kristo. Obutuba nitwegesa abeegi baitu, tukozesa Baibuli kuboleka ekihikire n’ekitahikire kandi tubakonyera kwetegereza ‘n’okukwata byona ebi Yesu yaturagiire.’ (Matayo 28:19, 20; 2 Timoseo 3:16) Gunu nugwo mulingo Yahwe arukugonza batendekwemu nukwo nabo basobole kukonyera abandi kufooka bahondezi ba Kristo. (Soma Tito 2:11-14. *) (Rora obugambo obuli hansi.) Hati leka tubazeho ebikaguzo bisatu ebikuru: (1) Okuhana kwoleka kuta ngu Ruhanga natugonza? (2) Kiki eki tusobora kwegera ha byokurorraha eby’abantu abahanirwe Yahwe? (3) Nitusobora tuta kwegera ha mulingo Yahwe na Yesu baha okuhana?

5. Okuhana okututunga kuruga hali Yahwe kwoleka kuta ngu natugonza?

⁵ Yahwe atuhabura, atwegesa kandi atutendeka habwokuba natugonza. N’agonza twikale haihi nauwe nukwo twomeere ebiro n’ebiro. (1 Yohana 4:16) Tatusaliza kandi tatuletera kwehurra nk’abataine mugaso. (Enfumo 12:18) Baitu, Yahwe aikaza amaiso ge ha miringo emirungi eyitwine kandi atwikiriza kwekorra encwamu. Hati nosobora kukirora ngu obuhabuzi Yahwe atuha kurabira omu Baibuli, ebitabu byaitu, abazaire rundi abagurusi nibwoleka ngu mali natugonza?  Amananu gali ngu, abagurusi obu balengaho kutuhabura omu mulingo ogw’engonzi nobuculeezi n’obutuba tutakamanyire ngu tuliyo nituhaba, baba nibegera ha kyokurorraho kya Yahwe eky’okugonza.​—Abagaratiya 6:1.

6. Okuhana kwoleka kuta engonzi za Ruhanga omuntu n’obwaihibwaho obujunanizibwa obwaba aine?

⁶ Obwire obumu okuhana tikugarukira hakuha obuhabuzi kwonka. Omuntu obw’akora ekibi ky’amaani, aba atakyaikirizibwa kuhebwa obujunanizibwa omu kitebe. Kinu n’obu kibaho, nabwo kiba nikyoleka engonzi za Yahwe ha muntu onu. Ekyokurorraho, nikisobora kumukonyera kukirora ngu kikuru kumara obwire bwingi nayesomesa Baibuli, nayecumitiriza ha byarukuba asomere kandi nayekamba kusaba. Kukora ebintu binu nikisobora kumukonyera kugumya enkoragana ye na Yahwe. (Zabuli 19:7) Hanyuma y’akasumi, nasobora kwongera kutunga obujunanizibwa obwakaba aine. Omuntu n’obwabingwa omu kitebe, kyoleka engonzi za Yahwe habwokuba kinu kirinda ekitebe kiri kyecumi. (1 Abakolinso 5:6, 7, 11) Kandi habwokuba okuhana kwa Yahwe kuba kw’obwinganiza, kinu kikonyera omuntu ow’abingirwe kwetegereza omulingo ekibi ekiyakozere kiri ky’amaani. Kinu nikisobora kumuletera kwegarukamu.​—Engeso Ezabakwenda 3:19.

7. Sebuna akaba nuwe oha, kandi akaijwamu mulingo ki omubi?

⁷ Kusobora kwetegereza obukuru bw’okuhanwa, nitwija kubazaho abantu babiri aba Yahwe yahanire. Ow’okubanza nuwe Sebuna, Omwisareri ayabaireho omu bwire bw’Omukama Hezekiya, kandi ondi nuwe ow’oruganda arukwetwa Graham, ow’omu kasumi kanu. Sebuna akaba ‘mulemi wenju,’ y’Omukama Hezekiya, kandi akaba aine obusozi bwingi. (Isaya 22:15) Baitu akatunga emyehembo kandi akagonza abantu abandi bamanye ngu w’amaani muno. Ekiyakozere, akeyombekera ekituuro ekya sente nyingi kandi yavuga ‘egali ezekitinisa.’​—Isaya 22:16-18.

8. Yahwe akahana ata Sebuna, kandi kiki ekyarugiremu?

 ⁸ Habwokuba Sebuna akalengaho kweserurra ebitinisa, Yahwe akamwihaho omulimo gwe yaguha omusaija ondi arukwetwa Eryakimu. (Isaya 22:19-21) Kinu kikabaho Omukama w’Asura obuyatekaniize kugenda kurwanisa Yerusalemu. Hanyuma, Senakeribu akasindika ekitebe ky’abakuru hamu n’amahe kugenda kutinisiriza Abayudaaya n’okuletera Omukama Hezekiya kuhanika. (2 Ekyabakama 18:17-25) Hezekiya akatuma Eryakimu hamu n’abasaija abandi babiri kutangatangana abakuru abo. Omu ha basaija banu akaba nuwe Sebuna, hati ow’akaba nakora nk’omuhandiki. Kinu nikitwoleka ngu Sebuna nasobora kuba yayegere kuba muculeezi tiyabihirwa, kandi tiyayejunaana. Akaikiriza kukora omulimo ogutali gw’amaani. Haroho amasomo asatu agatusobora kwegera hali ebi ebyahikire hali Sebuna.

9-11. (a) Kiki ekitusobora kwegera hali Sebuna? (b) Noyehurra ota ha mulingo Yahwe yatwaizemu Sebuna?

⁹ Eky’okubanza, habwokuba Sebuna akaferwa omulimo gwe nikitwijukya ngu “emyehembo erugirramu omuntu kugwa.” (Enfumo 16:18, NW) Nitusobora kuba twine obujunanizibwa omu kitebe, kandi abandi nibasobora kututamu ekitinisa. Eki kakuba kibaho, turaikara tuli bebundaazi? Turaijuka ngu Yahwe nuwe atuhaire obusobozi bwona obu twine n’ebirungi byona ebi tukozere nuwe atusobozeseze? (1 Abakolinso 4:7) Omukwenda Paulo akatutererra ati: Omuntu wena “omulinywe, aleke okwetekereza wenka okukira okukimusemeriire okutekereza: baitu atekereze nayekenga.”​—Abarumi 12:3.

¹⁰ Ekyakabiri, obuhabuzi obu Yahwe yahaire Sebuna nibwoleka ngu akaba namanya Sebuna nasobora kuhinduramu. (Enfumo 3:11, 12) Linu liri isomo hali abo abaihirweho obujunanizibwa. Omu kiikaro kyokukwatwa ekiniga n’okubiihirwa, basemeriire kugumizaamu nibaheereza Yahwe ekirukukirayo oburungi. Nibasobora kucwamu kurora okuhanwa nk’obwakaiso oburukwoleka okugonza kwa Yahwe. Ijuka ngu Isitwe ow’omu iguru naija kuha empeera abo abasigara bali bebundaazi. (Soma 1 Petero 5:6, 7.) Okuhanwa okuruga hali Yahwe nikusobora kutubumba obuturukuba tuli bebundazi kandi tuli nk’ibumba eryorobere.

¹¹ Ekyakasatu, nitwega isomo ly’amaani ha mulingo Yahwe yatwaizemu Sebuna. N’obu kiraba ngu omulingo Yahwe ahanamu gwoleka ngu anoba ekibi, gwoleka ngu agonza omuntu anyakusisire. Yahwe arora ebirungi ebinyakuli omu bantu. Obworaba oli muzaire rundi mugurusi omu kitebe, orahondera ekyokurorraho kya Yahwe eky’okuhana?​—Yuda 22, 23.

12-14. (a) Abamu betwaza bata obu batunga okuhanwa okuruga hali Yahwe? (b) Ekigambo kya Ruhanga kikakonyera kita ow’oruganda omu kuhindura ha ntekereza ye, kandi kiki ekyarugiremu?

¹² Ekyobusaasi, abamu kibasaliza muno obu bahanwa, kandi bacwamu kuruga hali Yahwe n’ekitebe kye. (Abaheburaniya 3:12, 13) Eki nikimanyisa ngu busaho muntu asobora kubakonyera? Nangwa! Tekerezaaho ekyokurorraho eky’oworuganda arukwetwa Graham, ayabingirwe omu kitebe baitu yamara yagaruka. Hanyuma y’okugaruka, akalekeraho kutebeza n’okugenda omu nso’rokano. Omugurusi omu akalengaho kufooka munywani we, kandi hanyuma Graham akasaba omugurusi onu kwega nauwe Baibuli.

¹³ Omugurusi onu nagamba ngu: “Graham akaba aine ekizibu ky’emyehembo. Yaikaraga  najumirra abagurusi abakozere encwamu ey’okumubinga omu kitebe. Graham akatandika kwerora omu ndolerwamu ey’Ekigambo kya Ruhanga, kandi eki yarozere atakigonze! Akakwatwaho omu mulingo ogurukuhuniriza! Hanyuma y’okukirora ngu enyomyo ey’emyehembo ekaba emuswekere amaiso kandi ngu ekizibu kye kikaba kujumirra abandi, akatandikiraho kukora empindukahinduka. Akatandika kuba omu nso’rokano zoona, kusoma ekigambo kya Ruhanga n’obwekambi, kandi n’okusaba buli kiro. Akatandika kuhikiriza obujunanizibwa bwe nk’omutwe gw’eka, kandi eki kikasemeza mukazi we n’abaana.”​—Luka 6:41, 42; Yakobo 1:23-25.

¹⁴ Omugurusi akongera yagamba ati: “Kiro kimu Graham akangambira ekintu ekyankwasireho muno. Akangambira ngu, ‘mbaire omu mananu kumara obwire bwingi, kandi nkaheerezaho nka Payoniya. Baitu hati nubwo nsobora kugamba ngu ningonza Yahwe kuruga ha mutima.’” Hanyuma y’obwire buke, Graham akaikirizibwa kurabyamuga omuzindaaro omu nso’rokano, kandi eki kikamusemeza muno. Omugurusi akagamba ngu: “Ekyokurorraho kye kikanyegesa ngu omuntu obwayebundaaza omu maiso ga Ruhanga akaikiriza kuhanwa, atunga emigisa nyingi”

15. Kiki ekitusemeriire kukora kurora twahana kurungi abandi?

¹⁵ Obuturaba nitugonza kuba abegesa abarungi, tusemeriire kubanza kuba abeegi abarungi. (1 Timoseo 4:15, 16) Omu mulingo nugwo gumu, Yahwe obwaraba nakukozesa kuhana abandi, osemeriire kuba mwebundazi kandi oleke Yahwe akwebembere. Abandi obu bararora ngu oli mwebundazi, nibaija kukutamu ekitinisa kandi nikiija kubanguhira kwikiriza obuhabuzi rundi amagezi ag’orabaha. Nitusobora kwegera ha kyokurorraho kya Yesu.

16. Omulingo Yesu yahanaga hamu n’omulingo yayegesaga nibitwegesa ki??

¹⁶ Yesu yayoroberaga Ise, nobu kiraba ngu obumu tikyamwanguhiraga. (Matayo 26:39) Yaikaraga nakyoleka ngu ebiyayegesaga n’amagezi agakaba aine bikaba nibiruga hali Yahwe. (Yohana 5:19, 30) Yesu akaba muhulizi kandi mwebundazi, kinu kikamukonyera kuba mwegesa w’embabazi. Abantu ab’emitima emirungi bagonzaga kuba haihi nauwe. (Soma Luka 4:22.) Ebigambo bya Yesu eby’embabazi bikagarramu amaani abo abakaba bahwairemu amaani hamu n’abaceke. (Matayo 12:20) Yahaburaga abakwenda be omu mulingo ogw’okugonza kandi ogw’ebabazi n’obu kiraba ngu akaba nasobora kubabihirirwa ha bw’okukunganira obukuru.​—Marako 9:33-37; Luka 22:24-27.

17. Miringo ki emirungi erakonyera abagurusi kurolerra kurungi ekitebe?

¹⁷ Abagurusi obu baba nibahana abandi nibasigikirra ha misingi ya Baibuli, basemeriire kuhondera ekyokurorraho kya Kristo.  Obubakora bati, kyoleka ngu nibagonza kwebemberwa Ruhanga hamu n’Omwana we. Omukwenda Petero akagamba ngu: “Mulisege igana lya Ruhanga eriri omulinywe, nimulirolerra, tibuli obwamani baitu obwokugonza, nka hali Ruhanga; nobukwakuba okwegomba ensagi eyobugobya, baitu obwomutima ogutekaniize; kunu tibuli obwokwefora abanyoro omwebi ebimwayahuziibwe, baitu muikalege abokurorraho hali igana.” (1 Petero 5:2-4) Abagurusi aborobera Ruhanga hamu na Kristo nibaija kugasirwa kandi bagasire n’abantu abandi omu kitebe.​—Isaya 32:1, 2, 17, 18.

18. (a) Kiki Yahwe ekyarukugonza abazaire bakole? (b) Yahwe akonyera ata abazaire?

¹⁸ Kandi obukirukuhika ha kuhana n’okwegesa omu ka? Yahwe naragira banyineka ngu: “Nainywe baisebo mutabihiza baana banyu: baitu mubalerege omu kuhanwa nomu kugambirirwa kwa Mukama waitu.” (Abefeso 6:4) Habwaki nikyetagisa kwegesa n’okuhana abaana? Baibuli egamba ngu: “Hana omwana wawe obuhakyaroho okunihira; nukwo otajunanizibwa habw’okuhwerekerra kwe.” (Enfumo 19:18, NW) Yahwe ahaire abazaire obujunanizibwa bw’okuhana abaana babo. Kakuba batakikora, nibaija kujunanizibwa hali Yahwe (1 Samuiri 3:12-14) Abazaire obubasaba Yahwe, bakahondera Ekigambo kye n’oburagirizi bw’omwoyo ogurukwera batunga amagezi hamu n’amaani agabarukwetaga kwegesa abaana babo.​—Soma Yakobo 1:5.

19, 20. (a) Migisa ki eyitutunga obutwikiriza kuhanwa Ruhanga? (b) Kiki eki turabazaaho omu kicweka ekirahonderaho?

¹⁹ Obuturaikiriza kuhanwa Ruhanga kandi tukahondera ekyokurorraho kya Yahwe na Yesu obuturukuba nituhana abandi, nitwija kutunga emigisa nyingi muno, muno! Amaka gaitu n’ebitebe nibiija kubamu obusinge, kandi buli omu naija kuhurra nagonzebwa, w’omugaso kandi aine obulinzi. Enu niyo endoza ey’obusinge n’okusemererwa ebitulitunga omu nsi empyaka. (Zabuli 72:7) Okuhanwa okuruga hali Yahwe nikututekaniza kwikara hamu omu nsi empyaka ebiro n’ebiro tuli omu businge n’obumu hamu na Yahwe nka Isitwe. (Soma Isaya 11:9.) Obuturaijuka kinu, nitwija kurora ngu okuhana mali guli: omulingo ogu Yahwe atwolekamu ngu natugonza.

²⁰ Omu kicweka ekirahonderaho, nitwija kwega ebirukukiraho ebirukukwata ha kuhana omu ka n’omu kitebe. Nitwija kurora omulingo tusobora kwehana itwenka. Kandi nitwija kwega omulingo tusobora kwetantara ekintu ekirukusaliza kukira okuhana kwona okutusobora kutunga.