1, 2. (a) Sulemani akatunga bujunanizibwa ki obukuru muno? (b) Habwaki Daudi yayeralikiriire habw’omulimo Sulemani yahairwe?

SULEMANI akahebwa omulimo ogw’embaganiza. Yahwe akamuha obujunanizibwa bw’okurolerra omulimo gw’okwombeka ekyombeko ky’ekitiinisa muno, egi niyo yekaru ya Yerusalemu! Yekaru enu ekaba n’egenda kuba “yekitinisa kingi” y’okuranganwa kwingi habw’oburungi bwayo. Ekirukukirayo obukuru, ekaba n’egenda kuba ‘enju ya Yahwe.”​—1 Ekyebyomubusinge 22:1, 5, 9-11.

² Omukama Daudi akaba nakigumiza kimu ngu Ruhanga akaba n’agenda kusagika Sulemani. Baitu Sulemani akaba akyali muto kandi atakakugukire. Sulemani akwikiriize omulimo gunu ogw’okwombeka yekaro atagutinire? Rundi obuto bwe n’okutakuguka kwe byakumulemeseze? Kurora Sulemani yakora omulimo gwe yahika ha businguzi, akaba aine kufooka mumanzi.

3. Obumanzi bwa Daudi bukakonyera buta Sulemani?

 ³ Sulemani n’asobora kuba yayegere kuba mumanzi kuruga hali ise, Daudi. Daudi obwakaba akyali muto muno, akarwanisa ebisoro ebikaba biizire kulya entaama za ise. (1 Samuiri 17:34, 35) Kandi akoleka obumanzi bwingi kurwanisa Goliasi, omuserikale nyamugundu kandi omukaali. Habw’obukonyezi bwa Yahwe, Daudi akasobora kukozesa ibale elyekulingiriire kurungi okwita Goliasi.​—1 Samuiri 17:45, 49, 50.

4. Habwaki Sulemani yali nayetagisa kuba mumanzi?

⁴ Kusigikirra ha bintu binu, Daudi nuwe yali muntu ahikire kutererra Sulemani kufooka mumanzi ayombeke yekaru. (Soma 1 Ekyebyomubusinge 28:20.) Kakuba Sulemani atayolekere obumanzi, obutiini bukaba nibugenda kumulemesa kukora omulimo gunu n’obukwakuba okugutandikaho. N’omuntu atandikire ha mulimo baitu yalemwa kugumalirra akubaire nakira uwe atakozereho ekintu kyona.

5. Habwaki tusemeriire kwoleka obumanzi?

⁵ Naitwe tuli nka Sulemani, nitwetagisa obukonyezi bwa Yahwe kusobora kuba bamanzi nukwo tukole omulimo ogwatuhaire. Hati katubazeho eby’okurorraho eby’abantu abayolekere obumanzi omu busumi bwa kara. Obu turaaba nitubibazaho, tutekereze omulingo naitwe tusobora kwoleka obumanzi nukwo tukahikiriza omulimo gwaitu.

6. Kiki ekirukukusemeza ha bumanzi Yusufu yayolekere?

⁶ Yusufu akoleka obumanzi mukazi wa Potifa obu yalengereho kumusonasona aterane nauwe. Nasobora kuba yakimanyire ngu obwomeezi bwe nibwija kuba omu kabi obwarayanga. Baitu ataikirize obutiini kumukozesa ekintu ekigwire, oihireho akoleka obumanzi yayangiraho aho n’aho kusihana n’omukazi onu.​—Okubanza 39:10, 12.

7. Rahabu akoleka ata obumanzi? (Rora ekisisani ekiri ha rupapura 27.)

⁷ Omuntu ondi ayayolekere obumanzi akaba Rahabu. Entasi za Isareri obu zagenzere omu Yeriko zahikira omu ka ye, akubaire atinire kandi ayangire kubakonyera. Baitu habw’okwesiga Yahwe, Rahabu atatiine kusereka abasaija banu ababiri n’okubakonyera kutoroka batahikirweho akabi. (Yosuha 2:4, 5, 9, 12-16) Rahabu akaikiririza omu Yahwe nka Ruhanga ow’amananu, kandi akaba n’akigumya ngu mpaka Yahwe nagenda kuha ensi ya Yeriko hali Abaisareri. Atatiine abantu abandi n’obwakuba omukama wa Yeriko rundi abasaija be kumulemesa kukora ekihikire. Baitu akoleka obumanzi yajuna obwomeezi bwe nʼobwʼabantu abʼeka ye.​—Yosuha 6:22, 23.

8. Obumanzi bwa Yesu bukakwataho buta abakwenda be?

⁸ Abakwenda ba Yesu abesigwa nabo bakoleka obwesigwa bw’amaani. Bakaba barozere omulingo Yesu yayolekere obumanzi kandi kinu bakakyegereho. (Matayo 8:28-32; Yohana 2:13-17; 18:3-5) Abasadukayo obu balengereho kubatanga kwegesa hali Yesu, abakwenda banu bakanga kulekaho.​—Engeso Ezabakwenda 5:17, 18, 27-29.

9. Ekitabu kya 2 Timoseo 1:7 nikitukonyera kita kumanya nambere tusobora kwiha obumanzi?

 ⁹ Yusufu, Rahabu, Yesu, hamu n’abakwenda bakacwamu kuruga ha mitima yabo kukora ekihikire. Batoleke obumanzi omu maani gabo habwabo, baitu bakoleka obumanzi habwokuba bakesiga Yahwe. Naitwe obwire bwona obuturaaba nitugonza kuba bamanzi, tusemeriire kwesiga Yahwe hatali obusobozi bwaitu habwaitu. (Soma 2 Timoseo 1:7.) Katubazeho ebintu bibiri omu bwomeezi bwaitu ebirukutwetagisa kwoleka obumanzi: omu maka gaitu n’omu kitebe.

10. Habwaki Abakristaayo abakyali nsingaanto nibetagisa kuba b’amanzi?

¹⁰ Haroho enyikara nyingi ezirukwetagisa Abakristaayo abakyali nsingaanto kuba bamanzi obu barukuba nibaheereza Yahwe. Nibasobora kwegera ha kyokurorraho kya Sulemani ayayolekere obumanzi obu yakozere encwamu y’amagezi ey’okwombeka yekaru kuhikya agimazire. Nobukiraaba ngu abato baine kwebemberwa abazaire babo, haroho encwamu ezimu ezinyakuli nkuru ezi basemeriire kwekorra. (Enfumo 27:11) Nibetagisa obumanzi omu kukora encwamu ez’amagezi obu kirukuhika ha banywani ababasemeriire kutunga, eby’okwesemeza ebi basemeriire kwikiriza, omulingo basobora kuguma baine engeso ezihikire, n’akasumi akabakugondeze kubatirizibwamu. Nibetaga kuba n’obumanzi habwokuba nibahakaniza Setani owaikara nasoisoimya Ruhanga.

11, 12. (a) Musa akoleka ata obumanzi? (b) Ekyokurorraho kya Musa nikyegesa ki abato?

¹¹ Emu ha ncwamu enkuru abato ezi basemeriire kwekorra nukwo kweteraho ebigendererwa. Omu mahanga agamu, abato bahambirizibwa kweyongerayo omu matendekero aga ha iguru n’okutunga omulingo ogurabatahiza sente nyingi muno. Omu mahanga agandi, ebyentahya bigumire ekiretera abato baingi kutekereza ngu basemeriire kukora muno basagike amaka gabo. Kakuba ekimu ha bintu binu kikuhikaho, tekereza ha kyokurorraho kya Musa. Akakuzibwa omuhara wa Faraho, nahabweki n’asobora kuba yayeterireho ekigendererwa ky’okufooka muguda rundi muntu ow’amaani. Tekerezaho omulingo Abamisiri abamukulize, abasomesa be, hamu n’abahi bamagezi be nk’oku basobora kuba bamusindikiriize! Baitu Musa akoleka obumanzi yacwamu kugaruka ha rubaju rw’abantu ba Ruhanga. Obu yasigireho Misiri n’eby’obuguda byayo, akesigira kimu Yahwe. (Abaheburaniya 11:24-26) Yahwe akamuha emigisa nyingi habw’encwamu enu kandi n’aija kumuha emigisa endi omu busumi obw’omu maiso.

¹² Abato obu barayeteraho ebigendererwa eby’omwoyo kandi bakebembeza Obukama bwa Yahwe omu bwomeezi bwabo, Yahwe abaha emigisa. N’aija kubakonyera eka zabo omu byetago byazo. Omu kyasa ky’okubanza, omusigazi Timoseo akahayo obwomeezi bwe bwona kuheereza Yahwe kandi naiwe nosobora kukora ekintu nikyo kimu. * (Rora obugambo obuli hansi.)​—Soma Abafiripi 2:19-22.

13. Obumanzi bukakonyera buta munyaanya itwe omu kuhikiriza ebigendererwa bye?

¹³ Munyaanya itwe omu kuruga omu Alabama ey’omu ihanga lya Amerika akaba nayetagisa obumanzi kurora yayeteraho ebigendererwa eby’omwoyo. Akahandika n’agamba ati: “Omu buto bwange nkaba muntu w’ensoni nyingi. Natiinaga kubaza n’abantu  tuli ha Kyombeko ky’Obukama kandi natiinaga kukonkona ha rwingi rw’omuntu ou ntamanyire tuli omu buheereza.” Abazaire be hamu n’Abakristaayo abandi omu kitebe bakamukonyera kuhikiriza ekigendererwa kye eky’okufooka payoniya ow’akasumi koona. Munyaanya itwe n’agamba: “Ebigendererwa ensi ya Setani eby’eyekambisa abantu kukorra nubwo obwegese obwa haiguru, ebitinisa, sente, hamu n’okutunga itungo lingi.” Kandi akarora ngu abantu abarukukira obwingi ebigendererwa binu bibalema kubihikiriza ekibarugiramu okwetuntura n’oburumi bwingi. Nagamba: “Hali nyowe, kuheereza Yahwe kundugiremu okusemererwa kwingi n’okuhurra mpikiriize ebigendererwa byange.”

14. Ni di obu abazaire Abakristaayo basemeriire kwoleka obumanzi?

¹⁴ Abazaire Abakristaayo nabo nibetagisa obumanzi. Ekyokurorraho, ha kiro ekyosemeriire kuba n’okuramya kwawe okw’eka, kugenda omu buheereza, rundi kugenda omu nso’rokano, mukama wawe n’asobora kukusaba okole kuhinguza ha bwire obw’okora buli kiro. Noyetagisa kuba mumanzi kusobora kumwangirra n’okuteraho abaana baawe ekyokurorraho ekirungi. Rundi nihasobora kuba haroho abazaire bamu omu kitebe kyanyu abarukuleka abaana babo kukora ebintu eby’otarukugonza abaana abawe kukora. Kakuba abazaire ba mulingo gunu bakukaguza habwaki otarukwikiriza abaana bawe, orayoleka obumanzi obasoborre ensonga?

15. Zabuli 37:25 hamu n’Abaheburaniya 13:5 nizisobora kukonyera zita abazaire?

¹⁵ Nikyetagisa obumanzi kurora wakonyera abaana baawe kweteraho n’okuhikiriza ebigendererwa eby’omwoyo. Ekyokurorraho, abazaire  abamu nibasobora kutiina kwekambisa abaana babo kufooka bapayoniya, kuheereza nambere hali obwetago bw’amaani, kuheereza ha Beseri, rundi kukonyera omu kwombeka Ebyombeko by’Obukama rundi Ebyombeko by’Enso’rokano Enkooto. Abazaire abamu nibasobora kutekereza ngu abaana babo obu barataaha obuheereza bwa mulingo gunu tibarukwija kusobora kurolerra abazaire babo obu barakura. Baitu abazaire abagezi boleka obumanzi kandi baikara nibamanya ngu Yahwe n’aija kuhikiriza emirago ye. (Soma Zabuli 37:25; Abaheburaniya 13:5.) Abazaire aboleka obumanzi bwa mulingo gunu kandi abesiga Yahwe bakonyera n’abaana babo kumwesiga.​—1 Samuiri 1:27, 28; 2 Timoseo 3:14, 15.

16. Abazaire abamu bakonyire bata abaana babo kweteraho ebigendererwa eby’omwoyo, kandi kinu kigasiire kita abaana babo?

¹⁶ Ow’oruganda onu na mukazi we omu Amerika bakakonyera abaana babo kuheereza Yahwe n’omutima gumu. Ise bo n’agamba: “Abaana baitu obu bakaba batakatandikire kurubata n’okubaza, twabagambiraga ebirungi ebiruga omu kukora nka payoniya n’okuheereza ekitebe. Kinu nikyo bayeteriireho nk’ekigendererwa.” Kandi nagamba ngu abaana babo kweteraho n’okuhikiriza ebigendererwa binu eby’omwoyo kibakonyire kurwanisa ebyohyo bya Setani n’emitima yabo yoona kugita ha kuheereza Yahwe. Ow’oruganda ondi anyakwine abaana babiri akahandiika n’agamba ati: “Abazaire abarukukira obwingi amaani gabo bagata omu kukonyera abaana babo kuhika ha businguzi omu by’emizano, eby’okwesemeza, n’eby’emisomo. Baitu eky’amagezi nukwo amaani ago kugata omu kukonyera abaana kuhikiriza ebigendererwa ebirabakonyera kuguma baine enkoragana enungi na Yahwe. Okusemererwa kwaitu tikurugire omu kurora abaana baitu nibahikiriza ebigendererwa byabo eby’omwoyo honka baitu naitwe kukorra hamu nabo kituletiire okusemererwa.” Okimanye ngu abazaire abakonyera abaana babo kweteraho n’okuhikiriza ebigendererwa eby’omwoyo basiimibwa omu maiso ga Yahwe.

17. Bazaho emiringo nambere obumanzi burukwetagibwa.

¹⁷ N’omu kitebe naho nitwetagisa kwoleka obumanzi. Ekyokurorraho, abagurusi b’ekitebe nibetagisa obumanzi obu barukuba nibahana omuntu akozere ekibi ky’amaani rundi obu barukuba nibakonyera omuntu ali omu kabi habw’eby’obujanjabi. Abagurusi abamu babungiraho enkomo nukwo begese abanyankomo Baibuli rundi kwebembera enso’rokano. Kandi abanyaanya itwe abatakatahire obuswere? Baine emigisa nyingi ey’okwoleka obumanzi n’okuheereza Yahwe. Nibasobora kukora nk’abapayoniya, kugenda nambere hali obwetago bw’amaani, kukonyera omu kwombeka ebyombeko by’Obukama, rundi kugenda omu Isomero ly’Abatebezi b’Obukama. Kandi n’abandi babeta kugenda omu Isomero lya Giliadi.

18. Banyaanya itwe abakuzire nibasobora kwoleka obumanzi omu mulingo ki?

¹⁸ Abanyaanya itwe abakuzire muno tubagonza muno kandi nitusiima muno kuba nabo omu kitebe! N’obukiraaba ngu abamu tibakyasobora kukora muno nk’oku bakoraga kara omu kuheereza Yahwe, haroho ebintu ebirukubetagisa kwoleka obumanzi. (Soma Tito 2:3-5.) Ekyokurorraho, nibetagisa obumanzi kakuba abagurusi babasaba kuhana abanyaanya itwe abato ha njwara yabo. Nikiba kitarukumanyisa ngu baine kucomera banyaanya itwe abato, baitu nikiba nikibetagisa  kubakonyera kurora omulingo encwamu yabo esobora kukwataho abandi. (1 Timoseo 2:9, 10) Banyaanya itwe abakuzire obu boleka okugonza omu miringo enu, kyongera kugumya ekitebe.

19. (a) Ab’oruganda ababatiziibwe nibasobora kwoleka obumanzi omu mulingo ki? (b) Abafiripi 2:13 hamu na 4:13 nizisobora kukonyera zita ab’oruganda ababtiziibwe kuba bamanzi?

¹⁹ Ab’oruganda ababatiziibwe nabo basemeriire kwoleka obumanzi. Obu behayo kukora nk’abaheereza n’abagurusi, ekitebe kigasirwa muno. (1 Timoseo 3:1) Baitu abamu nibasobora kutiina kwehayo. Rundi ow’oruganda n’asobora kuba yakozere ensobi obusumi bwa ira hati natekereza ngu tasemeriire kukora nk’omuheereza rundi omugurusi. Rundi ow’oruganda ondi n’asobora kutekereza ngu obukugu bw’okuheereza tabwine. Naiwe obworaaba noyehurra oti, ijuka ngu Yahwe n’asobora kukukonyera kuba mumanzi. (Soma Abafiripi 2:13; 4:13.) Ijuka ekyokurorraho kya Musa. Nauwe akatekereza ngu akaba atarukusobora kukora omulimo gwa Yahwe. (Okuruga 3:11) Baitu Yahwe akamukonyera kufooka mumanzi n’okukora omulimo ogwali nigwetagisibwa. Obumanzi bwa mulingo gunu ow’oruganda abatiziibwe n’asobora kubutunga ata? N’asobora kusaba Yahwe amukonyere kandi n’asoma Baibuli buli kiro. N’asobora n’okwecumitiriza ha byokurorraho eby’omu Baibuli eby’abantu abayolekere obumanzi. Kandi n’asobora kusaba abagurusi bamutendeke kandi nauwe nayehayo kukonyera omu kitebe omu mulingo gwona ogurukuba nigwetagisibwa. Nitutererra ab’oruganda boona ababtiziibwe kuba bamanzi n’okwekamba omu kitebe!

20, 21. (a) Daudi akaijukya Sulemani kintu ki? (b) Kintu ki eki tutasemeriire kugurukyagurukya?

²⁰ Omukama Daudi akagambira Sulemani ngu Yahwe akaba n’agenda kumusagika kuhikya yekaru ehoire kwombekwa. (1 Ekyebyomubusinge 28:20) Sulemani akecumitiriza ha bigambo binu kandi ataikirize obuto bwe n’okutamanya kwe kumulemesa kukora omulimo ogwamuhairwe. Baitu akoleka obumanzi bwingi, kandi Yahwe akamukonyera kumaliriiza yekaru enungi muno omu myaka musanju n’ekicweka.

²¹ Yahwe akakonyera Sulemani kandi naitwe n’asobora kutukonyera kuhikiriza omulimo gwaitu ogw’omu kitebe n’omu ka. (Isaya 41:10, 13) Obu turayoleka obumanzi omu kuheereza Yahwe, tukigumye ngu n’aija kutuha emigisa hati n’ebiro ebirukwija. Nahabweki, ‘fooka wamaani okole.’