1, 2. (a) Obwomeezi bwakubaire buta obu twakubaire tutaine Baibuli? (b) Ni dihi obuturukusobora kugasirwa muno omu Baibuli?

OBWOMEEZI bwawe bwakubaire buta obu wakubaire otaine Baibuli? Wakubaire otaine buragirizi oburungi obw’okuhondera buli kiro. Wakubaire otamanyire amananu agarukukwata hali Ruhanga, obwomeezi, rundi ebiro eby’omu maiso. Kandi wakubaire otamanyire ekintu kyona Yahwe eki yakoliire abantu omu busumi bwa kara.

² Eky’omugisa tituli omu kiirima ekya mulingo gunu. Yahwe atuhaire Ekigambo kye, Baibuli. Aturaganize ngu Baibuli niija kugumaho ebiro n’ebiro. Omukwenda Petero akajuliza ebigambo bya Isaya 40:8. N’obukiraba ngu orukarra runu tirukubaza ha Baibuli yonyini, ebigambo binu nibikwataho obutumwa oburukusangwa omu Baibuli. (Soma 1 Petero 1:24, 25.) Nitusobora kugasirwa muno kakuba tusoma Baibuli omu rulimi rwaitu. Baingi barozere ekintu kinu kiri ky’omugaso. Habw’ebyasa bingi, haroho abantu abatairemu amaani kuhindura Baibuli omu ndimi ezindi ez’abantu barukusobora kwetegereza n’obu  kiraba ngu bahiganizibwe muno kandi obwire obundi kibaire kitanguhire. Yahwe n’agonza “abantu bona okujunwa nokuhika omu kumanyira kimu amazima.”​—1 Timoseo 2:3, 4.

3. Kiki ekiturukugenda kubazaaho omu kicweka kinu? (Rora ekisisani ekiri ha rupapura 15.)

³ Omu kicweka kinu nitugenda kubazaaho omulingo Baibuli egumisirize (1) empindukahinduka omu rulimi, (2) abantu abafokere balemi bahindura orulimi rw’abantu, hamu (3) n’abarukugihakaniza etahindurwa. Kinu kiratukonyera kita? Nikiija kwongera ha kugonza kwaitu okwa Baibuli n’okugonza ogu ayagihandikisize.​—Mika 4:2; Abarumi 15:4.

4. (a) Endimi zihinduka zita hanyuma y’akasumi? (b) Kiki ekirukwoleka ngu Ruhanga tatwara orulimi rumu kuba nirukira ezindi? Eki nikikuletera kwehurra ota?

⁴ Endimi zikira kuhinduka hanyuma y’akasumi. Biro binu ebigambo nibisobora kuba nibikozesebwa omu mulingo ogurukwahukana nk’oku byakozesebwaga kara. Naiwe omu orulimi rwawe nihasobora kuba hurumu ebigambo ebihindukire. Nikyo kimu n’endimi eza kara. Oruheburaniya n’Oruyonani orukubazibwa omu kasumi kanu nirwahukanaho n’oru orwakozesiibwe kuhandika Baibuli. Haroho obwetago bw’okutunga Baibuli eziri omu ndimi ezirukwetegerezebwa bwangu habwokuba abantu tibakyayetegereza endimi eza kara ezakozesibwe kuhandika Baibuli. Abamu nibatekereza ngu kakuba beega Oruheburaniya n’Oruyonani orwa kara nikisobora kubanguhira kwetegereza kurungi Baibuli. Baitu eki nikisobora kutabakonyera. * (Rora obugambo obuli hansi.) Nikitusemeza muno kurora ngu Baibuli rundi ebimu ha bitabu byayo bihindwirwe omu ndimi nka 3,000. Yahwe nuwe arukugonza abantu kuruga omu ‘mahanga gona, n’enganda, n’endimi’ kwetegereza Baibuli. (Soma Okusuku’rwa 14:6.) Mali kinu nikyongera kutwiriza haihi na Ruhanga ow’okugonza kandi atarukusorora.—Engeso Ezabakwenda 10:34.

5. Habwaki Baibuli ya King James Version yafokere nkuru muno?

⁵ Endimi kwikara nizihinduka kiine omulingo kikwasireho okuhindurwa kwa Baibuli. Baibuli ey’ekaba neyetegerezebwa kara obwire nibusobora kuhika abantu nibalemwa kugyetegereza kurungi. Ekyokurorraho, Baibuli eya King James Version ey’okubanza ekaturukibwa omu mwaka 1611. Omu kasumi ako niyo Baibuli y’Orungereza ekaba emanyirwe muno. Abantu bakatandika kukozesa Orungereza orukaba ruli omu Baibuli enu. * (Rora obugambo obuli hansi.) Baitu Baibuli enu ekakozesa ibara lya Yahwe emirundi ntaito muno. Ebyahandikirwe ebirukukira obwingi eby’Oruheburaniya nambere ibara lya Ruhanga lyasangwaga, bakagarramu  “MUKAMA” omu nyuguta enkooto. Baibuli ezindi ezibayongiire kuteera nazo zikakozesa ekigambo “MUKAMA” omu nyuguta enkooto omu Byahandikiirwe byazo eby’Oruyonani. Baibuli enu kukozesa “MUKAMA” omu nyuguta enkooto omu kitabu kya baingi beta Endagano empyaka kikoleka ngu ibara lya Ruhanga naho lisemeriire kubamu.

6. Habwaki nitusiima muno kuba na Baibuli eya New World Translation?

⁶ Baibuli ya King James Version ey’okubanza obu yaturukibwe, orulimi rwayo rukaba ruli ha mulembe omu kasumi ako. Baitu akasumi obu karabireho, erulimi rwayo narwo rukagende niruhwa ha mulembe kandi hati nurwo rukyakizireyo kuguma kwetegereza. Eki nikyo kyahikire na ha Baibuli ez’endimi ezindi. Baitu hati tukasemererwa kutunga Baibuli eya New World Translation of the Holy Scriptures, enyakukozesa orulimi oruli ha mulembe. Baibuli enu eri omu ndimi ezirukuhingura omu 150, abamu bagine omu bwijwire kandi abamu baine ekicweka kyayo. Kinu nikimanyisa ngu abantu baingi omu nsi hati nibasoma Baibuli enu omu rulimi rwabo. Baibuli enu n’ekozesa orulimi oruli ha mulembe orukukonyera abantu kwetegereza obutumwa bwa Ruhanga. (Zabuli 119:97) Baitu ekifoire Baibuli enu kuba y’embaganiza muno nukwo kugarra ibara lya Ruhanga hona nambere lyasangwaga omu Baibuli ezabandize.

7, 8. (a) Habwaki Abayudaya abarukukira obwingi omu kyasa kyakasatu B.C.E. bakaba batarukwetegereza Ebyahandikirwe eby’Oruheburaniya? (b) Septuagint ey’Oruyonani ekaba niyo eha?

⁷ Okuhinduka omu by’obulemi haroho obu kiretiire orulimi rw’abantu narwo kuhinduka. Baitu Yahwe akozere kyona ekirukusoboka kurora ngu abantu batunga Baibuli omu rulimi orubarukwetegereza. Ekyokurorraho, ebitabu 39 ebirukubanza omu Baibuli bikahandikwa omu rulimi rw’Abayudaaya rundi Abaisareri. Nubo babandize ‘kwahuzibwa ebigambo bya Ruhanga.’ (Abarumi 3:1, 2) Ebyahandikirwe binu bikabanza kuhandikwa omu Ruheburaniya rundi omu Orwaramu. Baitu nambere ekyasa kyakasatu B.C.E. kyahikiire, Abayudaaya abarukukira obwingi bakaba batakyayetegereza Oruheburaniya. Habwaki? Habw’okuba Alexander the Great obu yafokere mulemi, akahamba ebicweka bingi eby’ensi, kyaletera obulemi bw’Abayonani kujanjara omu bicweka bingi eby’ensi. Kinu kikaletera abantu baingi abakaba bali hansi y’obulemi bw’Abayonani kutandika kukozesa Oruyonani omu kiikaro ky’endimi zabo. (Danieri 8:5-7, 20, 21) Kandi n’Abayudaaya abarukukira obwingi nabo bakozesaga Oruyonani, ekyabaletiire kulemwa kwetegereza Baibuli ey’Oruheburaniya. Ekizibu kinu bakakimaraho bata?

⁸ Emyaka nka 250 Yesu atakazairwe, ebitabu 5 ebirukubanza omu Baibuli bikahindurwa byagarurwa omu rulimi Oruyonani. Hanyuma y’akasumi, ebitabu ebindi byona ebyali bisigaireho nabyo bikahindurwa. Empindura enu bakagyeta Septuagint ey’Oruyonani. Niyo empindura eyabandize kumanywa ey’ebitabu eby’Oruheburaniya.

9. (a) Septuagint n’empindura ezindi eza kara zikakonyera zita abantu kusoma Ekigambo kya Ruhanga? (b) Kicweka ki ekirukukira kukusemeza omu Byahandikirwe eby’Oruheburaniya?

⁹ Empindura enu ekakonyera muno Abayudaaya abakaba nibabaza Oruyonani kusobora kusoma Baibuli ey’Oruheburaniya omu rulimi Oruyonani. Nosobora kuteramu akasisani okarora omulingo abantu banu basemeriirwe  habw’okuhurra rundi kusoma Baibuli omu rulimi rwabo habwabo? Obwire bukahika ebitabu bya Baibuli byahindurwa n’omu ndimi ezindi ez’abantu bakozesaga, nk’ekyokurorraho Syriac, Gothic, hamu na Latin. Abantu abandi nabo obu basoboire kusoma n’okwetegereza Baibuli, bakatandika kugigonza muno. Nabo bakatandika kutunga enkarra ezibagonzaga muno nka itwe okutusobora kuba twine enkarra ezitugonza. (Soma Zabuli 119:162-165.) Mali Ekigambo kya Ruhanga kigumisirize n’obu habaireho empindukahinduka omu by’obulemi n’omu ndimi eza buli kiro.

10. Omu busumi bwa John Wycliffe, habwaki abantu abarukukira obwingi bakaba batarukusobora kusoma Baibuli?

¹⁰ Emyaka nyingi, abebembezi abamu bakalengaho kulemesa abantu kusoma Baibuli. Baitu kinu kitalemese abantu abakaba nibatina Ruhanga kugenda omu maiso kuhindura Baibuli. Omu ha basaija banu yayetwaga John Wycliffe, ayaikaraga omu Bungereza omu kyasa kya 14. Uwe akaba narora ngu buli muntu akaba aine obugabe bw’okusoma Baibuli. Omu kasumi ako, abantu abarukukira obwingi omu Bungereza bakaba batakahurrahoga ekintu kyona kuruga omu Baibuli ekiri omu rulimi rwabo. Baibuli bakaba nibaziseera muno, kandi buli emu ekaba eine kuhandikwa buhandikwa n’emikono. Nahabweki, bantu bataito muno abakaba baine Baibuli. Kandi abantu abarukukira obwingi omu kasumi ako bakaba batamanyire kusoma. Abagendaga omu makanisa bahurraga Baibuli n’esomwa omu rulimi oru Latini, baitu kandi orulimi oru rukaba ruhoire ha mulembe abantu ba buli kiro batakyarwetegereza kurungi. Yahwe akakora ki kurora ngu abantu batunga Baibuli omu ndimi zabo?​—Enfumo 2:1-5.

11. Baibuli ya Wycliffe ekakwataho eta abantu?

¹¹ Omu mwaka gwa 1382, John Wycliffe n’abantu abandi bakahindura Baibuli omu Rungereza. Baibuli ya Wycliffe ekamanywa muno omu bahondezi be abayetwaga Lollards. Abantu banu bagonzaga muno Baibuli. Bakarubata kyaro ha kyaro bayetorora Bungereza yona nibasomera abantu Baibuli kandi nibabaha ebicweka byayo ebi bahandikire  n’emikono yabo. Ekintu eki kikaletera Baibuli kwongera kumanywa.

12. Abebembezi b’ediini bakehurra bata habwa Baibuli ya Wycliffe hamu n’ebyakaba nakora?

¹² Abebembezi b’ediini bakanobera kimu Wycliffe, Baibuli ye, hamu n’abahondezi be. Bakahiganiza abahondezi ba Wycliffe kandi bayokya Baibuli zona ez’omusaija onu ezi basangire. N’obu kiraba ngu Wycliffe akaba afire ira, ababembezi b’ediini bakamweta omunyanzigwa w’Ekeleziya. Bakazikura amagufa ge, bagokya, kandi iju balisesa ha kyambu ekirukwetwa Swift. Baitu abantu baingi bagonzaga kusoma n’okwetegereza Ekigambo kya Ruhanga, kandi Ekeleziya etasobole kubalemesa. Emyaka nyingi eyahondireho, abantu omu Bulaya n’omu bicweka bindi eby’ensi bakahindura kandi batera Baibuli omu ndimi ez’abantu baingi bakaba nibetegereza.

13. Kiki eki tutasobora kugurukyagurukya? Kandi kinu kigumya kita okwikiriza kwaitu?

¹³ Baibuli ekahandikisibwa Ruhanga. Baitu kinu tikirukumanyisa ngu Ruhanga nuwe yakozeseze abasaija banu kuhandika Septuagint, Baibuli ya Wycliffe, King James Version, rundi empindura ezindi zona. Baitu obu twekebiija, omulingo empindura zinu zaturukiibwe, nikyeyolekera kimu ngu nkoku Yahwe akaba agambire, Ekigambo kye kisoboire kugumaho. Kinu nikigumya okwikiriza kwaitu ngu buli kintu eki Yahwe araganiize nikiija kuhikirra.​—Yosuha 23:14.

14. Ebintu ebitwegere hali Baibuli nibituletera bita kweyongera kugonza Ruhanga?

¹⁴ Obu turora omulingo Yahwe alinziremu Ekigambo kye, kigumya okwikiriza kwaitu kandi tweyongera kumugonza. * (Rora obugambo obuli hansi.) Habwaki Yahwe yatuhaire Baibuli kandi yaraganiza n’okugirinda? Habwokuba natugonza kandi nagonza kutwegesa nukwo tugasirwe. (Soma Isaya 48:17, 18.) Kinu kituletera kumugonza n’okumworobera.​—1 Yohana 4:19; 5:3.

15. Kiki ekiturukwija kubazaho omu kicweka ekirukuhonderaho?

¹⁵ Tugonza muno Ekigambo kya Ruhanga. Baitu nitusobora kugasirwa tuta omu kusoma Baibuli? Nitusobora kukora ki kukonyera abantu abatutebeza kweyongera kugonza Baibuli? Abegesa omu kitebe basemeriire kukora ki kurora ngu byona ebi barukwegesa nibisigikirra ha Kigambo kya Ruhanga? Nitwija kugarukamu ebikaguzo binu omu kicweka ekirukwongeraho.