1. Tugasirwa tuta obutubazaaho omulingo twaizire omu “mananu”?

 “OKAIJA ota omu mananu?” Hataroho kugurukyagurukya ogarukiremu ekikaguzo eki emirundi nyingi. Kiri kimu ha bikaguzo eby’okubanza Omukristaayo mugenzi wawe ekyakukaguza obwaba nagonza kukumanya kurungi. Tugonza kuhurra omulingo ab’oruganda na banyaanya itwe batandikire kumanya n’okugonza Yahwe kandi naitwe kitusemeza muno kubagambira omulingo amananu g’omugaso muno haliitwe. (Bar. 1:11) Obutubazaaho ebintu binu kitukonyera kwikara nitwijuka nk’oku amananu gali g’omuhendo muno haliitwe. Ekindi, nikiija kutuletera kucweramu kimu ‘kugendera omu mananu,’ ekirukumanyisa kwikara nitwetwaza omu mulingo oguratuletera emigisa hamu n’okusiimwa Yahwe.​—3 Yoh. 4.

2. Biki ebiturukwija kubazaaho omu kicweka kinu?

² Omu kicweka kinu nitwija kubazaaho ensonga ezimu ezituletera kugonza amananu. Hanyuma nitwija kubazaaho omulingo tusobora kugumizaamu nitwoleka ngu nitugonza ekisembo kinu eky’omuhendo. Hataroho kugurukyagurukya, kubazaaho ebintu binu nikiija kutuletera kweyongera kusiima Yahwe habw’okutuleeta omu mananu. (Yoh. 6:44) Ekindi, nikiija kutwongera ekihika eky’okugonza kwegesa abandi amananu.

3. Nsonga ki erukukira obukuru ey’etuletera kugonza amananu?

³ Haroho ensonga nyingi habwaki tugonza amananu. Ey’erukukira obukuru, tugonza Yahwe Ruhanga Endugirro y’amananu.  Kuraba omu Kigambo kye Baibuli, titugarukiire ha kumumanya nk’Omuhangi ow’amaani ow’iguru n’ensi, baitu nka Isiitwe ow’omu iguru ow’okugonza kandi ow’atufaaho. (1 Pet. 5:7) Tukimanyire ngu Ruhanga waitu “aijuire okuganyira kandi owembabazi, aikaraho okutabihirwa, asagire ebyokuganyira namazima.” (Kurug. 34:6) Yahwe agonza obwinganiza. (Is. 61:8) Kimusaaliza obwarora nitubonabona, ayetekaniize, kandi alindiriire n’ekihika akasumi obwalimaraho okubonabona kwona. (Yer. 29:11) Naitwe tulindiriire akasumi ako akarungi! Egi niyo emu ha nsonga habwaki tugonza muno Yahwe!

4-5. Habwaki omukwenda Paulo yalengesaniize okunihira kwaitu n’enanga?

⁴ Nsonga ki endi ey’etuletera kugonza amananu? Amananu gatugasira muno omu miringo nyingi. Tekerezaaho ekyokurorraho. Amananu kuruga omu Baibuli nigatwarramu okunihira kwaitu okw’omu kasumi ak’omu maiso. Omukwenda Paulo akakozesa ekyokurorraho kwoleka omugaso ogw’okunihira kunu obuyahandiikire ati: “Okutunyinakwo nkekyokusibika omutima, okunihira okwamazima okutatengetatengeta.” (Baheb. 6:19) Nk’oku eky’okusibika rundi enanga etanga eryato kutwarwatwarwa, okunihira kwaitu okurukusigikirra ha Baibuli nikusobora kutukonyera kwikara tutekaine obutuhikwaho ebizibu.

⁵ Omu nkarra zinu, omukwenda Paulo akaba nabazaaho okunihira okw’omu iguru Abakristaayo abaseserweho amagita okubegondezaamu. Baitu ebigambo bye nibikwataho n’Abakristaayo abalindiriire kwomeera ebiro n’ebiro omu rugonjo orurungi omu nsi. (Yoh. 3:16) Busaho kugurukyagurukya, kwegaho okunihira okurukukwata ha bwomeezi obutahwaho, kituletiire kuba n’obwomeezi obw’ekigendererwa.

6-7. Yvonne agasiirwe ata habw’okwega amananu kuruga omu Baibuli agarukukwata h’akasumi ak’omu maiso?

⁶ Tekerezaaho ekyokurorraho kya munyaanya itwe Yvonne. Atakurre omu mananu, kandi obwakaba ali muto yatiinaga kufa. Naijuka nasoma ebigambo ebyatasobora kwebwa ebirukugamba ngu: “Kiro kimu, buli omu wena alifa.” Nagamba ati: “Ebigambo ebi byandeteraga kuraara nindora, nintekerezaaho akasumi ak’omu maiso. Nkatekereza ngu ‘Obwomeezi busemeriire kuba bwine ekigendererwa.’” Akaba atarukwetegereza habwaki tuli omu nsi, baitu kandi akaba atarukugonza kufa!

⁷ Hanyuma, Yvonne obwakaba ali nsinganto, akatangatangana Abakaiso ba Yahwe. Nagamba ati: “Nkatandika kwikiriza ngu ninsobora kuba n’okunihira okw’okwomeera ebiro n’ebiro omu rugonjo orurungi omu nsi.” Kwega amananu kigasiire kita munyaanya itwe onu? Nagamba ati: “Hati tinkyaburwa oturo habw’okweralikirra h’akasumi ak’omu maiso rundi okufa.” Nikyeyolekera kimu ngu amananu g’omuhendo muno hali Yvonne, kandi nikimusemeza muno kugambiraho abandi ha kunihira kwe okw’akasumi ak’omu maiso.​—1 Tim. 4:16.

8-9. (a) Omu kyokurorraho kya Yesu, omusaija akooleka ata ngu ekiitungo eky’akaba azoire kyali ky’omuhendo muno hali uwe? (b) Amananu g’omuhendo kwingana nkaha haliiwe?

⁸ Amananu kuruga omu Baibuli nigatwarramu amakuru amarungi agarukukwata ha Bukama bwa Ruhanga. Yesu akalengesaniza amakuru amarungi ag’Obukama n’ekiitungo ekyaserekerwe omu musiri. Nk’oku kyolekerwe omu Matayo 13:44, Yesu akagamba ati: “Obukama obwomu iguru nibusisana nkekiitungo ekyaserekerwe omu musiri; omuntu ekiyaboine nakisereka; obwokusemererwakwe yagenda [yatunda] ebyanyinabyo byona,  yagura omusiri ogu.” Wetegereze ngu omusaija ogu akaba atarukuserra ekiitungo eki. Baitu obuyakizoire akefeereza ebintu bingi kusobora kukitunga. Akatunda byona eby’akaba aine. Habwaki? Habwokuba akaba amanyire nk’oku kiri ky’omuhendo mwingi. Kikaba nikikirra hara ebi byona ebiyayeferiize.

⁹ Naiwe nukwo oyehurra oti h’amananu? Hataroho kugurukyagurukya nukwo oyehurra oti! Tukimanyire ngu busaho kintu kyona omu nsi ekirukukira omuhendo okusemererwa okw’otunga omu kuheereza Yahwe hati, n’okunihira okw’obwomeezi obutahwaho omu kasumi ak’omu maiso ha nsi y’Obukama bwa Ruhanga. Omugisa ogutwine ogw’okuba n’enkoragana enungi na Yahwe nigukirra hara ekintu kyona ekitusobora kwefeereza. Ekintu ekikirayo kutuletera okusemererwa, nikyo kusemeza Yahwe omu bwijwire.​—Bak. 1:10.

10-11. Kiki ekyayekambisize Michael kukora empindahinduka ez’amaani omu bwomeezi bwe?

¹⁰ Baingi omuliitwe tukefeereza ebintu bingi kusobora kusiimwa Yahwe. Abamu bakefeereza emirimo ey’amaani omu nsi. Abandi balekere kulengaho kweserurra itungo. Kandi abandi bakahindurra kimu omulingo bayetwazaamuga obubayegere hali Yahwe. Eki nikyo Michael yakozere. Atakurre omu mananu. Obwakaba akyali muto akatendekwa karate. Nagamba ati: “Kikaba kikuru muno hali nyowe kwikara nintendeka omubiri gwange. Obwire obumu nayehurraga ngu busaho omuntu wena asobora kunteera.” Baitu Michael obuyatandikire kwega Baibuli, akeega omulingo Yahwe anoba okurwana. (Zab. 11:5) Michael akabazaaho ow’oruganda na munyaanya itwe abamwegeseze ati: “Batangambire kuleka karate, baitu bakagumizaamu nibanyegesa amananu kuruga omu Baibuli.”

¹¹ Michael obuyayeyongiire kwega hali Yahwe, akeyongerra kimu kumugonza. Ekyakizire kumukwataho, nugwo omulingo Yahwe ayolekamu abaheereza be embabazi. Hanyuma y’akasumi, Michael akakyetegereza ngu akaba nayetaaga kukora encwamu ey’amaani. Nagamba ati: “Nkaba nkimanyire ngu kuleka karate yali negenda kuba ncwamu ey’egumire muno kukira encwamu ezindi zoona ezinakakora. Baitu nabwo nkaba nkimanyire ngu nikiija kusemeza Yahwe, kandi nkaba ninkigumiza kimu ngu kumuheereza kikaba nikikirra hara ekintu kyona ekinsobora kwefeereza.” Michael akaba akimanyire ngu amananu agaakaba azoire g’omuhendo muno, kandi egi niyo nsonga habwaki y’aikiriize kukora empindahinduka ez’amaani omu bwomeezi bwe.​—Yak. 1:25.

12-13. Amananu kuruga omu Baibuli gakakonyera gata Mayli?

¹² Kwoleka omugaso gw’amananu, Baibuli erengesaniza amananu n’etaara ey’erukwaka omu mwirima. (Zab. 119:105; Bef. 5:8) Mayli, kuruga Azerbaijan, nasiima muno obukonyezi obuyatungire kuruga omu Kigambo kya Ruhanga. Akakurra omu ka enyakurumu enyikiriza ezirukwahukana. Ise akaba ali Musiraamu kandi nyina akaba ali omu diini ey’Ekiyudaaya. Nagamba ati: “N’obukiraaba ngu naikirizaaga ngu Ruhanga aroho, nkaba nyine ebikaguzo bingi ebinayekaguzaaga. Nkekaguza, ‘Habwaki Ruhanga yahangire abantu, kandi nikigasa ki omuntu kubonabona obwomeezi bwe bwona kandi hanyuma akamalirra abonabonesiibwe ebiro n’ebiro omu murro ogutaraara?’ Ekindi, nk’oku abantu bagambaga ngu buli kintu kyona ekibaho kuba kugonza kwa Ruhanga, nkekaguza, ‘Ruhanga aleetera abantu kubonabona, nukwo kimusemeze?’”

¹³ Mayli akagumizaamu naserra eby’okugarukamu by’ebikaguzo bye. Hanyuma y’akasumi akaikiriza kwegesebwa Baibuli kandi yafooka omu h’Abakaiso ba Yahwe. Nagamba ati: “Amagezi agarukunanura agarukusangwa omu  Baibuli gakankonyera kufooka omuntu ow’aine okusemererwa. Omulingo Baibuli esoborramu ensonga kindetera obusinge omu mutima.” Nka Mayli, itwena tukugiza Yahwe, “[Ogu ayatwesere] okuruga omu muirima, okutaha omu musanagwe ogwamahano.”​—1 Pet. 2:9.

14. Nitusobora tuta kweyongera kugonza amananu? (Rora akasanduuko “ Ebintu ebindi amananu galengesanizibwa nabyo.”)

¹⁴ Binu biri bimu ha byokurorraho ebirukwoleka omugaso gw’amananu. Hataroho kugurukyagurukya naiwe oine ebindi bingi eby’omanyire. Habwaki otakora entekaniza ey’okwesomesaaho ensonga ezindi ezituletera kugonza amananu? Obuturakikora nikiija kutukonyera kweyongera kugonza amananu. Obuturayeyongera kugonza amananu, nitwija kweyongera kuserra emiringo ey’okwoleka ngu nitugagonza.

15. Mulingo ki ogumu ogutusobora kwoleka ngu nitugonza amananu?

¹⁵ Nitusobora kwoleka ngu nitugonza amananu kuraba omu kwesomesa buli kiro Baibuli hamu n’ebitabu ebirukusigikirra ha Baibuli. Katube tumazire akasumi kaingi omu mananu, twikara twine bingi eby’okwega. Watchtower eyabandiize kimu kuturukibwa ekagamba eti:  “Omu nsi munu harumu ebisuba bingi, ekiretiire kumanyirra amananu kuguma. Kakuba oba nogagonza osemeriire kwikara nogaserra kandi osemeriire kutamu amaani maingi kugatunga. Otamarwa amananu agawakeega. Ikara noserra amananu agarukukiraho kuruga omu Baibuli.” Kwesomesa kyetaagisa kuteekamu amaani, baitu amaani ag’oba otairemu garugamu ebirungi.

16. Mulingo ki ogw’okwesomesa ogukizire kukugasira? (Enfumo 2:4-6)

¹⁶ Abamu omuliitwe titugonza kusoma n’okwesomesa. Baitu Yahwe natusaba kwikara ‘nituserra’ nukwo tusobole kwetegereza kurungi amananu. (Soma Enfumo 2:4-6.) Obutwekamba kuserra amananu, tugasirwa. Ow’oruganda Corey nagamba ngu omu kwesomesa kwe okwa Baibuli, ateeka omutima ha rukarra rumu rumu. Nasoborra ati: “Nsoma obugambo bwona obwa hansi hamu n’ebyahandiikirwe byona ebyolekerwe omu rubaju, kandi nkora okuseruliiriza okurukukiraho. . . . Omulingo gunu gunkonyire kwega ebintu bingi!” Katube nitukozesa omulingo gunu rundi ogundi, twoleka ngu amananu g’omuhendo haliitwe, obutukozesa obwire bwaitu kandi tukateekamu amaani kugeesomesa.​—Zab. 1:1-3.

17. Nitusobora tuta kuteeka omu nkora ebiturukwega omu bwomeezi bwaitu? (Yakobo 1:25)

¹⁷ Amananu gali, tukimanyire ngu kwesomesa amananu kyonka tikirukumara. Kusobora kugasirwa omu bwijwire tusemeriire kuteeka omu nkora ebiturukwega omu bwomeezi bwaitu. Obu nubwo amananu garatuletera okusemererwa kwonyini. (Soma Yakobo 1:25.) Nitusobora kukigumya tuta ngu nituteeka omu nkora ebiturukwega? Ow’oruganda omu natuha amagezi kwekebiija tukarora nambere turukukora kurungi kandi nambere tusemeriire kusemezaamu. Omukwenda Paulo akakibazaaho ati: “Ha rulengo orutuhikireho omu kukurakurana, leka tugumizeemu niturubata kurungi omu muhanda nugwo gumu.”​—Baf. 3:16, NWT.

18. Habwaki tukora kyona ekiturukusobora ‘kugendera omu mananu’?

¹⁸ Tekerezaaho omulingo tugasirwa obutukora kyona ekiturukusobora ‘kugendera omu mananu’! Titugarukira ha kutunga obwomeezi oburungi kyonka, baitu tuletera Yahwe hamu n’Abakristaayo bagenzi baitu okusemererwa. (Nfu. 27:11; 3 Yoh. 4) Zinu nizo ensonga ezirukukirayo, ezisemeriire kutuletera kugonza amananu hamu n’okugateeka omu nkora omu bwomeezi bwaitu.