EKICWEKA KY’OKWEGA 35
EKIZINA 123 Kworobera Entekaniza Ruhanga ey’Ataireho
Omulingo Abagurusi Basobora Kukonyera Abo Abaihirwe omu Kitebe
“Nukwo halibaho okusemererwa omu iguru obwomusiisi omu anyakwegarukamu, okukira abahikiriire kyenda mu mwenda abataserra okwegarukamu.”—LUK. 15:7.
EBI TURAYEGA
Habwaki abantu abamu basemeriire kwihwa omu kitebe n’omulingo abagurusi basemeriire kukonyera abantu nk’abo kwegarukamu n’okwongera kutunga enkoragana enungi na Yahwe.
1-2. (a) Yahwe arora ata omuntu ow’akora ekibi kandi akanga kwegarukamu? (b) Yahwe naagonza abasiisi kukora ki?
YAHWE taikiriza engeso eza buli mulingo; kandi anoba ekibi. (Zab. 5:4-6) Naatwetaagisa kuhondera endengo ze ez’okuhikirra ezirukusangwa omu Kigambo kye Baibuli. Baitu Yahwe akimanyire ngu tuli bantu abatahikiriire kandi tasobora kutunihirramu kumworobera kikumi ha kikumi. (Zab. 130:3, 4) Ha murundi nugwo gumu taikiriza “abantu abatarukutina Ruhanga, nibahindura embabazi za Ruhanga waitu okuzifora orwanju.” (Yud. 4) Egi niyo ensonga habwaki Baibuli ebazaaho ‘okuhwerekerezebwa okw’abantu abatarukutiina Ruhanga’ ha bulemu bwa Ruhanga obwa Haramagedoni.—2 Pet. 3:7; Kus. 16:16.
2 Baitu nabwo, Yahwe tagonza omuntu weena okuhwerekerra. Nk’oku twarozere omu bicweke ebyahwaire, Baibuli neyoleka kurungi ngu agonza “bona bahike omu kwegarukamu.” (2 Pet. 3:9) Abagurusi beegera hali Yahwe kuraba omu kwoleka okugumiisiriza obu nibalengaho kukonyera abantu abakozere ebibi kukora empindahinduka n’okugarraho enkoragana yabo na Yahwe. Baitu tibali boona abakora ebibi ngu begarukamu. (Is. 6:9) Abamu bacwamu kugumizaamu nibakora ebibi abagurusi n’obu bakora kyona ekirukusoboka kubakonyera kwegarukamu. Ekyo obu kibaho kiki abagurusi eki basemeriire kukora?
“MUIHEMU OMUBI OGU”
3. (a) Baibuli egamba ngu abasiisi abatarukwegarukamu basemeriire kubakorra ki? (b) Omuntu obu ayanga kwegarukamu, habwaki nitugamba ngu aba ayecweriiremu kwihwa omu kitebe?
3 Omuntu ow’aba akozere ekibi obu ayanga kwegarukamu, abagurusi baba batakyaine eky’okukora baitu kuhondera oburagirizi oburukusangwa omu 1 Abakolinso 5:13, oburukugamba buti: “Muihemu omubi ogu hagati omulinywe.” Kisisana oti rundi omuntu ow’aba akozere ekibi aba ayecweriiremu kwihwa omu kitebe; omu mulingo ogu aba naagesa ebi asigire. (Bag. 6:7) Habwaki nitugamba tuti? Habwokuba aba ayangire kuhinduka abagurusi n’obu balengaho emirundi nyingi kumukonyera kuhinduka. (2 Bakam. 17:12-15) Ebikorwa bye biba nibyoleka ngu acwiremu kutahondera endengo za Yahwe.—Bir. 30:19, 20.
4. Habwaki ekirango kirangwa omusiisi ow’atarukwegarukamu obu aihwa omu kitebe?
4 Omusiisi ow’ategarukamu obu aba aihirwe omu kitebe, ekirango kirangwa kumanyisa ekitebe ngu takyali omu h’Abakaiso ba Yahwe. a Ekigendererwa ky’ekirango eki tikiri kuswaza ow’akozere ekibi. Oihireho, kikorwa nukwo ab’oruganda na banyaanya itwe bahondere okutererwa kwa Baibuli okurukugamba, “okutaterana hamu” n’omuntu ogu, “nobukwakuba okulya nauwe.” (1 Kol. 5:9-11) Haroho ensonga enungi habwaki Yahwe yatuteriireho ekiragiro eki. Omukwenda Paulo akahandiika ati: “Ekitumbisa ekike kitumbisa ekiihuro kyona.” (1 Kol. 5:6) Omuntu ow’atarukwegarukamu ebibi bye, obu ataihwa omu kitebe abandi nibasobora kuteekereza ngu tikirukubetaagisa kworobera ebiragiro bya Yahwe.—Nfu. 13:20; 1 Kol. 15:33.
5. Tusemeriire kurora tuta omuntu ow’aihirwe omu kitebe, kandi habwaki?
5 Hati tusemeriire kurora tuta ow’oruganda rundi munyaanya itwe ow’aihirwe omu kitebe? N’obu kiraaba ngu titusemeriire kukoragana n’omuntu ogu, tusemeriire kumurora nk’entaama ey’ebuzire hatali nk’entaama ey’etaine okunihira. Entaama ey’erugire omu igana nesobora kugaruka. Ijuka ngu omuntu ogu akehayo hali Yahwe. Eky’obusaasi, hati aba atakyatwaza obwomeezi bwe kusigikirra ha kwehayo kwe, kandi eki kimuteeka omu nyikara ey’akabi. (Ez. 18:31) Nahabweki, embabazi za Yahwe obu ziraaba zikyaroho, haroho okunihira ngu omuntu ogu aligaruka. Nahabweki abagurusi nibasobora bata kukonyera omusiisi ow’aihirwe omu kitebe?
OMULINGO ABAGURUSI BAKONYERA ABO ABAIHIRWE OMU KITEBE
6. Bintu ki abagurusi ebi barakora kukonyera omuntu ow’aihirwe omu kitebe?
6 Omuntu obu aihwa omu kitebe, abagurusi baleka kumukonyera kwongera kugaruka hali Yahwe? Nangwa! Abagurusi obu baba nibagambira omuntu ow’ayangire kwegarukamu ngu naija kwihwa omu kitebe, bamugambira n’ebintu ebi asemeriire kukoraho nukwo asobole kugaruka. Baitu abagurusi bakora n’ekirukukiraho. Emirundi erukukira obwingi bagambira ogu ow’akozere ekibi ngu baakugondeze kwongera kutangatangana na uwe hanyuma y’emyezi nke kurabaho kurora obu araaba ahindwire omutima gwe. Kakuba omuntu ow’akozere ekibi aikiriza kutangaana abagurusi, ha murundi ogu nibaija kumwesengereza ayegarukemu kandi agaruke. N’obwakuba ategarukiremu omu kasumi ako, abagurusi nibaija kumutangatangana omurundi ogundi omu kasumi ak’omumaiso kandi bamwekambise kwegarukamu.
7. Abagurusi booleka bata embabazi nk’eza Yahwe obu baba nibakonyera omuntu ow’aihirwe omu kitebe? (Yeremiya 3:12)
7 Abagurusi bekamba kwegera ha mbabazi za Yahwe obu baba nibakonyera ogu ow’aihirwe omu kitebe. Yahwe atalinde abantu be abakaba bamurugireho omu ihanga erya Isaleri eya kara kubanza kugira eki baakoraho. Oihireho nuwe yabandize kugira eki yakoraho, kubahikirra batakoolekere obwokurorraho bwona obw’okwegarukamu. Nk’oku kyayolekerwe omu kicweka ekyakabiri ekiri omu magazini enu, Yahwe akooleka embabazi obu naagambira nabbi Hoseya kuganyira mukazi we ow’akaba nakyasiisa. (Hos. 3:1; Mara. 3:7) Obu nibegera hali Yahwe, abagurusi bagondeza kimu omusiisi kugaruka, kandi tibagumanganiza obwomeezi bwe.—Soma Yeremiya 3:12.
8. Ekyokurorraho kya Yesu ekirukukwata ha mwana ayazaahire nikitukonyera kita kumanya kurungi omulingo Yahwe ayehurra hali abo abamurugireho? (Luka 15:7)
8 Ijuka eky’okurorraho kya Yesu eky’omwana ow’akaba azaahire, ekyabazibweho omu kicweka ekyakabiri eky’omu magaziini enu. Ise obu yarozere omwana we naagaruka omuka “yairuka, yamugwa omunda, namunywegera muno.” (Luk. 15:20) Wetegereze ngu ise omwana atabanze kulinda omwana we kumusaba ekiganyiro. Oihireho taata nuwe yabandize kugira eki yakoraho habwokuba akaba naagonza omwana we. Omu mulingo nugwo gumu, abagurusi balengaho kwoleka omutima nugwo gumu hali abo abarugire hali Yahwe. Nibagonza entaama zinu ezibuzire “kugaruka omuka.” (Luk. 15:22-24, 32) Omusiisi obu agaruka hali Yahwe, habaho okusemererwa omu iguru n’omu nsi!—Soma Luka 15:7.
9. Kiki Yahwe eki arukwekambisa abasiisi kukora?
9 Kusigikirra ha bitwarora, nikyeyoleka kurungi ngu Yahwe taikiriza omuntu ow’aba akozere ekibi kandi akanga kwegarukamu kwikara omu kitebe. Baitu nabwo alengaho kumukonyera. Nagonza bagaruke hali uwe. Ekyahandiikirwe ekiri omu Hoseya 14:4 nikyoleka omulingo Yahwe ayehurra hali abo abeegarukamu, obu kigamba kiti: “Ndibakiza okugaruka enyuma kwabu nokugonza ndibagonza: baitu ekiniga kyange kihindukire okumurugaho.” Mali kinu kanikyekambisa abagurusi kutekerezaaho obwokurorraho bwona obusobora kwoleka ngu omuntu ayegarukiremu. Ekindi, nikyekambisa abo abarugire hali Yahwe kugaruka omu bwangu.
10-11. Abagurusi nibaija kulengaho bata kukonyera abo abamazire akasumi baihirwe omu kitebe?
10 Abagurusi nibaija kulengaho bata kukonyera abo abaihirwe omu kitebe emyaka nyingi enyuma? Abantu nk’abo nibasobora kuba batakyakora ekibi ekyabaleetiire kuruga omu kitebe. Omu nyikara ezimu nibasobora kuba batakyaijuka ekintu ekyabaleetiire kwihwa omu kitebe. K’ebe nsonga ki, abagurusi nibaija kulengaho kuserra abantu abo kandi bababungire. Abagurusi obu baraabaga bababungiire, nibaija kusabaga na bo kandi babekambise kugaruka omu kitebe. Kyamananu ngu, omuntu nk’ogu ow’aba amazire emyaka nyingi atarukwija omu nsorrokano, hataroho kugurukyagurukya naija kuba acekiire kimu omu by’omwoyo. Nahabweki kakuba ayoleka ngu naagonza kugaruka omu kitebe, abagurusi nibasobora kukora enteekaniza n’omuntu nukwo atandiike kumwegesa Baibuli n’obu kiraaba ngu takagarwirwe omu kitebe. Omu nyikara zinu zoona, abagurusi nibo basemeriire kukora enteekaniza ez’okumwegesa Baibuli.
11 Abagurusi balengaho kwegera ha mbabazi Yahwe ezi ainiire abantu, obu nibakora kyona ekirukusoboka kuserra abo boona abarugire hali Yahwe kandi babekambise kugaruka hali uwe. Omusiisi obu ayoleka ngu ayegarukiremu kandi akaleka ekibi eki yakozere, naasobora kugarurwa omu kitebe omu bwangu.—2 Kol. 2:6-8.
12. (a) Nyikara za mulingo ki ez’etaagisa abagurusi kwegendereza? (b) Habwaki tutasemeriire kuteekereza ngu abasiisi abamu Yahwe tasobora kubooleka embabazi? (Rora n’obugambo obuli hansi.)
12 Omu nyikara ezimu, abagurusi basemeriire kwegendereza muno batakagarwire omuntu omu kitebe. Ekyokurorraho kakuba omuntu aba yatwaize kubi omwana, rundi yayecwaho ekitebe rundi yakora ekintu akigenderiire ngu nikyo asigikirreho kugaitururwa, abagurusi basemeriire kukigumya ngu omuntu ogu ayegarukiremu kwo. (Mara. 2:14; 2 Tim. 3:6) Basemeriire kulinda ab’oruganda na banyaanya itwe omu kitebe. Baitu nabwo tusemeriire kukimanya ngu Yahwe naija kwikiriza omusiisi ow’ayegarukiremu kuruga ha mutima kandi akaleka engeso ze. Nahabweki, n’obu kiraaba ngu abagurusi basemeriire kukigumya ngu omuntu ayatwaize kubi abandi ayegarukiremu kuruga ha mutima, tibasemeriire kuteekereza ngu Yahwe tasobora kumwoleka embabazi. b—1 Pet. 2:10.
EKITEBE EKI KISEMERIIRE KUKORA
13. Mbaganiza ki enyakuli hagati y’omulingo tutwazaamu omuntu ow’ahanirwe abagurusi n’omulingo tutwazaamu ogu ow’aihirwe omu kitebe?
13 Nk’oku kyolekerwe omu kicweka ekihoire, obwire obumu baranga ekirango ngu omuntu ahanirwe. Omu nyikara nk’egi nitusobora kwikara nitukoragana na uwe obu nitukimanya ngu ayegarukiremu kandi alekere ekibi kye. (1 Tim. 5:20) Naaba akyali kicweka ky’ekitebe kandi aba naayetaaga ab’oruganda na banyaanya itwe kumukonyera kugumizaamu naakora ekihikire. (Baheb. 10:24, 25) Baitu, enyikara enu neyahukana n’omuntu ow’aihirwe omu kitebe. Tuleka ‘kukoragana’ n’omuntu ogu, “nobukwakuba okulya nauwe”—1 Kol. 5:11.
14. Abakristaayo nibasobora kukozesa bata omuntu wabo ow’omunda ow’atenderwe kusigikirra ha Baibuli obu kirukuhika ha muntu ow’aihirwe omu kitebe? (Rora n’ekisisani.)
14 Baitu ebintu ebi twabazaaho nibimanyisa ngu tusemeriire kwecweraho kimu omuntu ow’aihirwe omu kitebe? Nangwa. Kyamananu ngu titusemeriire kukoragana na uwe. Baitu Abakristaayo nibasobora kukozesa omuntu wabo ow’omunda ow’atendekerwe Baibuli kucwamu kuraaliza omuntu ow’aihirwe omu kitebe—naasobora kuba ali munyabuzaale wabo rundi omuntu ow’akaba ali munywani wabo—kwija omu nsorrokano. Kakuba omuntu ogu aija omu nsorrokano, tusemeriire kumutwaza tuta? Enyumaho, titwamuramukyaga. Baitu nabwo buli Mukristaayo asemeriire kukozesa omuntu we ow’omunda ow’atendekerwe kusigikirra ha Baibuli kucwamu eki asemeriire kukora. Abamu nikisobora kubanguhira kuramukya omuntu ogu rundi kumutangirra obu aba aizire omu nsorrokano. Baitu nabwo titusemeriire kubaza muno n’omuntu ogu rundi kumara na uwe obwire.
Abakristaayo nibasobora kukozesa omuntu wabo ow’omunda ow’atendekerwe Baibuli obu barukuba nibacwamu kuraaliza omuntu ow’aihirwe omu kitebe kwija omu nsorrokano rundi kumutangirra obu nibamuramukyaho kake (Rora akacweka 14)
15. Bibi bya mulingo ki ebirukubazibwaho omu 2 Yohana 9-11? ( Rora n’akasanduuko “Paulo na Yohana Bakaba Nibabazaaho Ekibi Nikyo Kimu?”)
15 Abamu nibasobora kwekaguza, ‘Baibuli tegamba ngu Omukristaayo aw’aramukya omuntu nk’ogu aba nakwataniza na uwe omu bibi bye?’ (Soma 2 Yohana 9-11.) Ebyahandiikirwe ebyetoroirwe enkarra zinu nibyoleka ngu oburagirizi bunu nibukwata hali abo abecwireho ekitebe, hamu n’abandi abakurakuraniza ebikorwa ebibi. (Kus. 2:20) Nahabweki kakuba omuntu aba naakurakuraniza enyegesa ez’abecwireho ekitebe rundi ebikorwa ebindi ebibi, abagurusi tibarukwija kukora enteekaniza ez’okumubungira. Kyamananu ngu nikisoboka omuntu ogu kwegarukamu. Baitu obu kiraaba kitakabaireho, titusemeriire kuramukya omuntu ogu rundi kumuraaliza kwija omu nsorrokano.
KWEGERA HA MBABAZI ZA YAHWE
16-17. (a) Yahwe naagonza abasiisi bakole ki? (Ezekyeri 18:32) (b) Abagurusi nibasobora bata kukorra hamu na Yahwe?
16 Biki ebi twegere omu bicweka binu bitaano? Yahwe tagonza omuntu weena kuhwerekerra! (Soma Ezekyeri 18:32.) Naagonza abasiisi bagaruke hali uwe. (2 Kol. 5:20) Egi niyo ensonga habwaki kuruga kara na kara, Yahwe aikaire naatererra abantu be abamurugireho kwegarukamu kandi bakagaruka hali uwe. Abagurusi b’ekitebe baine omugisa ogw’okukorra hamu na Yahwe, obu nibalengaho kukonyera abasiisi kwegarukamu.—Bar. 2:4; 1 Kol. 3:9.
17 Habaho okusemererwa kwingi omu iguru abasiisi obu begarukamu! Isiitwe ow’omu iguru Yahwe asemererwa muno buli murundi entaama ey’eba ebuzire obu egaruka omu kitebe. Tweyongera kugonza Yahwe obu tuteekerezaaho embabazi ze ezitatusemeriire.—Luk. 1:78.
EKIZINA 111 Ebituletera Okusemererwa
a Titurukwija kwongera kubazaaho abantu nk’abo nk’ababingirwe. Kuhikaana n’ebigambo bya Paulo ebirukusangwa omu 1 Abakolinso 5:13, hati nitwija kubabazaaho nk’abaihirwe omu kitebe.
b Baibuli, egamba ngu abantu abamu tibasobora kuganyirwa. Abantu nk’abo baba bacwiremu kwikara nibahakaniza Ruhanga. Yahwe na Yesu nubo bonka abasobora kucwamu omuntu obu araaba atarukuganyirwa.—Mar. 3:29; Baheb. 10:26, 27.
