Omu nyikara nk’egi, ekitebe kirora obuswere obw’okubanza nk’obwahoireho omusaija ogu obuyatahire obuswere obuhyaka, kandi kirora obuhyaka nk’oburukwikirizibwa. Kusobora kwetegereza ensonga habwaki nitugamba tuti, leka tubazeeho Yesu ekiyabaliize hakugaitururwa n’okutaaha obuswere obuhyaka.

Omu Matayo 19:9, Yesu akooleka ensonga emu yonka kusigikirra ha Byahandiikirwe erukwikirizibwa kumaraho obuswere. Akagamba ati: “Wena obwalibinga mukaziwe, rundi okumujunaniza obwobusihani, naswera ondi, buli asihaine.” Kuruga omu bigambo bya Yesu, nitwega (1) obusihani niyo nsonga yonka kusigikirra ha Byahandiikirwe esigikirwaho kumaraho obuswere omu kugaitururwa (2) kandi ngu omusaija ow’agaitururwa na mukazi we atasigikiriire ha nsonga egi kuruga omu Byahandiikirwe kandi akaswera ondi aba asiihaine. *

Ebigambo bya Yesu nibimanyisa ngu omusaija ow’asihana kandi akagaitururwa na mukazi we aba aine obugabe kusigikirra ha Byahandiikirwe obw’okutaaha obuswere obundi? Nangwa. Mukazi we ow’ataine musango nuwe asobora kucwamu kumuganyira rundi kwanga. Kakuba ayanga kumuganyira kandi bakagaitururwa kusigikirra omu biragiro, boona babiri nibaba baine obugabe obw’okutaaha obuswere obundi.

Ha rubaju orundi, omukazi ow’ataine musango nasobora kugonza kwikara na musaija we kandi nasobora kumugambira ngu ayetegekere kumuganyira. Baitu kiki ekibaho kakuba omusaija ayanga mukazi we kumuganyira kandi akagenda omu biragiro akagaitururwa? Habwokuba omukazi ayetekaniize kumuganyira kandi n’okugumizaamu n’obuswere bwabo, omusaija naaba ataine bugabe kusigikirra ha Byahandiikirwe obw’okutaaha obuswere obundi. Kakuba acwamu kuswera omuntu ondi n’obwaraaba atarukwikirizibwa kukikora kusigikirra ha Byahandiikirwe aba asiihaine omurundi ogwakabiri, abagurusi b’ekitebe nibaba baine kwongera kukora akatebe ak’okucwa omusango kuhurra omusango gunu omuhyaka.​—1 Kol. 5:1, 2; 6:9, 10.

Omusaija ow’ataine bugabe kusigikirra ha Byahandiikirwe obw’okutaaha obuswere obuhyaka obw’abutaaha ekitebe kirora kita obuswere bwe obw’okubanza hamu n’obuhyaka? Kusigikirra ha Baibuli obuswere obw’okubanza nibuba bukyaroho? Omukazi ow’ataine musango nasobora kucwamu kuganyira omusaija ow’akaba ali iba rundi kwanga kumuganyira? Ekitebe kirarora obuswere obuhyaka nk’obusihani?

Kara ekitebe kyaroraga obuswere obuhyaka nk’obusihani kakuba omukazi ow’ataine musango yabaga akyali mwomeezi, atakataahire obuswere obundi, kandi atasihaine. Baitu Yesu atabazeeho omukazi ow’ataine musango obwakaba nabazaaho okugaitururwa hamu n’okwongera kutaaha obuswere. Oihireho, akasoborra ngu omusaija ow’agaitururwa atarukusigikirra ha Byahandiikirwe kandi akaswera omukazi ondi aba asiihaine.  Omu nyikara nk’egi okugaitururwa hamu n’okutaaha obuswere obundi Yesu ekiyagambire ngu nikisisanira kimu n’okusiihana nikiba ky’amazireho obuswere obw’okubanza.

Omusaija obwagaitururwa na mukazi we kandi akaswera ondi nikiba kitakyasoboka mukazi we ow’okubanza, ow’akaba ataine musango kumuganyira rundi kwanga kumuganyira. Nahabweki omukazi ow’ataine musango abatakyaine mugugu ogw’okucwamu kuganyira ow’akaba ali iba rundi kwanga kumuganyira. Ekindi ekitebe tikirikwija kurora obuswere obuhyaka nikisigikirra ha mukazi ow’akaba ataine musango kuba mwomeezi, kuba yataahire obuswere obundi, rundi kuba yasiihaine. *

Omu kyokurorraho ekitubalizeeho eruguru omusaija akasiihana ekyarugiremu kugaitururwa. Baitu kiki ekibaho kakuba omusaija aba atasiihaine baitu akagaitururwa kandi hanyuma akataaha obuswere obuhyaka? Rundi kiki ekibaho kakuba omusaija asiihana hanyuma y’okugaitururwa kandi hanyuma akataaha obuswere obundi n’obukiraaba ngu mukazi we akaba ayetekaniize kumuganyira? Omu byokurorraho binu byona omuntu obw’agaitururwa kandi akaswera ondi aba asiihaine, ekimaraho obuswere obw’okubanza. Obuswere obuhyaka nibwikirizibwa kusigikirra ha biragiro. Watchtower eya Novemba 15, 1979, ha rupapura 32, ekagamba ngu “hati omusaija aba ataahire obuswere obuhyaka kandi tasobora kumara gaburugamu kandi akagarukira mukazi we ow’okubanza, obuswere obw’okubanza bukahwaho obuyagaiturwirwe, yasiihana, kandi yataaha obuswere obundi.”

Empindahinduka enu empyaka terukumanyisa ngu Abakristaayo nibatekereza ngu obuswere tibukyali oburukwera rundi ngu obusihani tikikyali kibi eky’amaani. Omusaija obwagaitururwa na mukazi we habw’ensonga etarukusigikirra ha Byahandiikirwe kandi hanyuma akaswera ondi n’obukiraaba ngu taine bugabe kusigikirra ha Byahandiikirwe obw’okutaaha obuswere obundi aba aine kutangatangana n’akatebe akarukucwa omusango habw’obusihani. (Kakuba omukazi omuhyaka ow’aswirwe aba ali Mukristaayo, na uwe aine kutangatangana n’akatebe akarukucwa omusango habw’obusihani.) N’obukiraaba ngu ekitebe tikirukwija kurora obuswere obuhyaka nk’obusihani, omusaija onu tarukwija kutunga obujunanizibwa bwona omu kitebe kumara emyaka nyingi, kandi kuhikya abantu obubalireka kwehurra kubi habw’ekibi ekiyakozere rundi kuhikya obubalyongera kutandika kumuteekamu ekitiinisa. Abagurusi batakahaire omusaija onu obujunanizibwa bwona nibaba nibetaaga kubanza kutekerezaaho enyikara ya mukazi we ow’okubanza ouyatwaize omu mulingo ogw’obugobya kandi obubaraaba bakaba baine abaana, n’enyikara y’abaana abayanagireho.​—Mara. 2:14-16.

Kusigikirra ha bizibu eby’amaani ebisobora kuruga omu kugaitururwa okutarukusigikirra ha Byahandiikirwe hamu n’okutaaha obuswere obuhyaka, ky’amagezi Abakristaayo begere hali Yahwe kandi barole obuswere nk’oburukwera.​—Mug. 5:4, 5; Baheb. 13:4.