1. Abantu abarukukira obwingi barora bata emirimo?

ABANTU abarukukira obwingi omu kiikaro nambere oikara barora bata emirimo? Omu mahanga maingi, abantu beyongire kukora muno kandi bamara obwire bwingi ha mirimo. Abantu abakora ekihinguraine tibatunga obwire bw’okuhuumura, obwokuba nab’omu maka gaabo, rundi kufaaho ebyetaago byabo eby’omwoyo. (Mug. 2:23) Baitu abantu abandi tibagondeza kimu kukora kandi batunga eby’okwekwasa bingi.​—Nfu. 26:13, 14.

2-3. Yahwe hamu na Yesu bakatuteraho kyokurorraho ki obukirukuhika ha kukora?

² Omulingo Yahwe na Yesu baroramu emirimo nigwahukana n’entekereza ez’abantu barukukira obwingi ezitahikire ezirukukwata ha mirimo. Hataroho kugurukyagurukya Yahwe mukozi. Yesu akakyoleka kurungi, obuyagambire ati: “Isenyowe nakora na hati hona, nanyowe ninkora.” (Yoh. 5:17) Tekerezaaho omulimo Ruhanga oguyakozere obwakaba nahanga bamalaika abaingi muno, enyunyuzi hamu n’ebintu ebindi ebiri omu mwanya. Niturora n’ebintu ebindi ebirungi muno ebiyahangire ebiri hanu omu nsi. Omuhandiiki wa Zabuli akaba ahikire obuyagambire ati: “Ai [Yahwe] emirimo yawe ka mingi! Yona okagikora namagezi: ensi ijuire obuguda bwawe.”​—Zab. 104:24.

³ Yesu akahondera ekyokurorraho kya Ise. Ruhanga “obuyataireho iguru” Yesu akamukonyera. Akaba ali na Yahwe nakora ‘nk’omukozi omukuru.’ (Nfu. 8:27-31) Hanyuma y’akasumi obwakaba ali omu nsi, akakora omulimo gw’amaani. Omulimo Yahwe y’amuhaire gwali nk’eby’okulya haluwe, kandi gukagumya ngu Ruhanga akaba amutumire.​—Yoh. 4:34; 5:36; 14:10.

4. Ekyokurorraho kya Yahwe n’ekya Yesu nibitwegesa ki ha kuhuumura?

 ⁴ Ekyokurorraho kya Yahwe na Yesu eky’okwekamba nikimanyisa ngu titusemeriire kuhuumura? Nangwa. Yahwe tajwaha, nahabweki tarukwetaaga kuhuumura. Baitu Baibuli n’egamba ngu Yahwe obuyamazire kuhanga iguru n’ensi, “akahumura, yatekana.” (Kurug. 31:17) Kinu nikisobora kumanyisa ngu Yahwe akemerezaamu emirimo ye kandi y’asemererwa habw’ebintu ebiyakozere. Yesu nauwe n’obwaraaba yakoraga muno obwakaba ali omu nsi, yatungaga obwire obw’okuhuumuraho n’okuliira hamu n’abanywani be.​—Mat. 14:13; Luk. 7:34.

5. Abaheereza ba Yahwe basemeriire kukora ki?

⁵ Baibuli etererra abaheereza ba Ruhanga kuba bakozi. Abaheereza be basemeriire kuba abekambi hatali kuba bagara. (Nfu. 15:19) Nosobora kuba oine omulimo ogwokora kusobora kurolerra eka yaawe. Kandi nk’omu h’abegeswa ba Yesu, oine n’obujunanizibwa obw’okutebeza amakuru amarungi. Baitu, nabwo osemeriire kuhuumura ekirukumara. Haroho obukikugumira kutunga obwire oburukumara obw’okukora omulimo gwawe, kutebeza, hamu n’okuhuumura? Nitusobora tuta kumanya obwire obutusemeriire kumara nitukora hamu n’obutusemeriire kumara tuhuumwire?

6. Marako 6:30-34 n’eyoleka eta ngu Yesu akaba aine entekereza ey’ehikire ha kukora hamu n’okuhuumura?

⁶ Obukirukuhika ha mirimo, tusemeriire kuba n’entekereza ey’ehikire. Omukama Sulemani akaterekerezebwa Ruhanga kuhandiika ati: “Buli kintu kyona kiine akasumi kakyo, n’emirimo yoona ine akasumi kayo.” Akabazaaho kubyara, kwombeka, kurra, kuseka, kuzina, hamu n’ebintu ebindi. (Mug. 3:1-8, NW) Nitukirorra kimu ngu omu bwomeezi haroho ebintu bibiri ebikuru, kukora hamu n’okuhuumura. Kiro kimu, abakwenda bakagaruka hanyuma y’okutebeza omu biikaro bingi. Kandi “bakaba batanyina kacu nobuhokuba hokulira.” Yesu akabagambira ati: “Muije inywenka omunsita omu kiikaro nambere hatarumu bantu, muhumuleho [kake].” (Soma Marako 6:30-34.) N’obukiraaba ngu obumu Yesu hamu n’abegeswa be balemwaga kutunga obwire obw’okuhuumura, Yesu akaba akimanyire ngu nikyetagisa.

7. Kwegaho ekiragiro kya Sabiiti nikitukonyera kita?

⁷ Obwire obumu itwena twetaaga kuhuumura rundi kukorayo ekintu ekihyaka. Kinu nitukirorra ha ntekaniza Ruhanga yakoliire abaheereza be abakara obuyabahaire Sabiiti eya buli wiiki. N’obuturaaba tutali hansi y’Ebiragiro bya Musa, kwegaho Sabiiti nikitugasira. Kandi nikisobora n’okutukonyera kwetegereza obuturaaba twine entekereza ey’ehikire ha mirimo hamu n’okuhuumura.

8. Kusigikirra ha Okuruga 31:12-15, Sabiiti kyali kiro kya ki?

⁸ Ekigambo kya Ruhanga nikitugambira ngu hanyuma “y’ebiro” mukaaga eby’okuhanga, Ruhanga akemereza emirimo ye ey’okuhanga ebintu omu nsi. (Kub. 2:2) Baitu nk’oku Yahwe agonza kukora, “na hati hona” aikaire nakora omu miringo endi. (Yoh. 5:17) Yahwe kuha Abaisaleri Sabiiti eya buli wiiki akaba nagonza bahondere ekyokurorraho kye eky’okuhuumura ekirukubazibwaho omu kitabu eky’Okubanza. Ruhanga akagamba ati Sabiiti kaali kokurorraho hagati ye na Isaleri. Kyali kiro ‘eky’okuhuumura . . . , ekirukwera hali [Yahwe].’ (Soma Okuruga 31:12-15.) Ha kiro kinu busaho muntu wena akaba asemeriire kukora omulimo gwona, otwaliiremu abaana, abairu, hamu n’ebisoro eby’omu ka. (Kurug.  20:10) Kinu kyakonyeraga abantu kutunga obwire obw’okwejumbira omu ebintu eby’omwoyo.

9. Omu kasumi Yesu obwakaba akyali omu nsi, abantu abamu baali baine ntekereza ki ezitahikire ha Sabiiti?

⁹ Ekiro kya Sabiiti kyagasiraga muno abantu ba Ruhanga, baitu omu kasumi Yesu obwakaba ali omu nsi, abebembezi baingi abamadiini bakaba beteriireho ebiragiro ebigumangaine eby’okulinda Sabiiti. Bagambaga ngu kyali kitarukwikirizibwa n’okunogaho kake engano rundi kukiza omurwaire ha Sabiiti. (Mar. 2:23-27; 3:2-5) Entekereza ya mulingo ogu ekaba etarukwikiraniza n’eya Ruhanga kandi Yesu ensonga enu akagisoborra kurungi abo abamuhuliriize.

10. Kusigikirra ha Matayo 12:9-12 omulingo Yesu yatwaramuga Sabiiti nigutwegesa ki?

¹⁰ Yesu hamu n’abahondezi be Abayudaaya balindaga Sabiiti habwokuba bakaba bali hansi y’Ebiragiro bya Musa. * Baitu omu bikorwa, n’omu bigambo Yesu akoleka ngu kyali kihikire kukora ebikorwa by’embabazi n’okukonyera abandi ha kiro kya Sabiiti. Akakyoleka kurungi ngu: “Kirungi okukora okurungi ha kiro ekya Sabiti.” (Soma Matayo 12:9-12.) Atarole kukora ebikorwa by’embabazi n’okukonyera abandi nk’ebikorwa ebirukucwa ekiragiro kya Sabiiti. Omulingo Yesu yayetwaizemu gukooleka ngu akaba namanya kurungi ekigendererwa ekikuru ekya Sabiiti. Habwokuba abantu bahuumuraga, kyabakonyeraga kuta omutima ha bintu eby’omwoyo. Eka nambere Yesu yakuliire n’esobora kuba yakozesaaga ekiro kya Sabiiti kwirra haihi na Ruhanga. Eki nitukimanya kakuba  tusomaho Yesu ebiyakozere obwakaba ali omu rubuga nambere yakuliire orwa Nazalesi. “[Yesu] yataha omu isorrokaniro ha kiro kya Sabiti, nkengesoze okuzikaba ziri, yaimuka okusoma.”​—Luk. 4:15-19.

11. Noha ayateriireho Yesu ekyokurorraho ekirungi eky’okukora emirimo?

¹¹ Yusufu akegesa Yesu kukora omulimo gw’okubaija kandi yamwegesa n’omulingo Ruhanga aroramu emirimo. (Mat. 13:55, 56) Yesu nasobora kuba yaroraga Yusufu nayekamba kukora buli kiro nukwo asobole kurolerra eka ye enkooto. Nahabweki tikirukutuhuniriza Yesu obuyagambiire abegeswa be ngu: “Omukozi asemeriire emperaye.” (Luk. 10:7) Hataroho kugurukyagurukya, Yesu akaba amanyire kukora emirimo ey’amaani.

12. Byahandiikirwe ki ebirukwoleka ngu Baibuli esagika kwekamba kukora?

¹² Omukwenda Paulo nauwe yayekambaga kukora emirimo ey’amaani. Omulimo gwe omukuru gukaba gw’okuha obwakaiso ha ibara lya Yesu n’ebiyayegeseze. Baitu nabwo, Paulo yakoraga kusobora kwehikyaho ebyetaago bye. Abasesalonika baali bakimanyire nk’oku “omu kutalibana nokujwaha,” Paulo ‘yakoraga emirimo ekiro na nyamusana, nukwo aleke kujwahya omuntu wena’ omulibo. (2 Bas. 3:8; Eng. 20:34, 35) Paulo nasobora kuba akaba namanyisa omulimo oguyakoraga ogw’okukora eheema. Obwakaba ali omu Kolinso, yaikaraga na Akura na Pirisikira ‘nibakora omulimo, ogw’okukora ehema.’ Paulo obuyagambire ngu yakoraga “ekiro na nyamusana” tikirukumanyisa ngu tiyahuumuraga. Ekyokurorraho, ebiro ebimu, nka ha Sabiiti Paulo tiyakoraga omulimo ogw’okukora eheema. Ha kiro eki, yatungaga omugisa ogw’okutebeza Abayudaaya nabo ababaga bahuumwire.​—Eng. 13:14-16, 42-44; 16:13; 18:1-4.

13. Ekyokurorraho kya Paulo nikitwegesa ki?

¹³ Omukwenda Paulo akatuteraho ekyokurorraho ekirungi. N’obukiraaba ngu yakoraga kutunga sente, yakoraga kyona ekirukusoboka kutebeza “enjiri ya Ruhanga” butoosa. (Bar. 15:16; 2 Kol. 11:23) Akekambisa n’abandi nabo kutebeza butoosa. Ekyokurorraho Akura na Pirisikira ‘bakorraga hamu na [Paulo] omu Kristo Yesu.’ (Bar. 12:11; 16:3) Paulo akatererra Abakolinso ‘kwekambaga obutosa omu mirimo ya Mukama.’ (1 Kol. 15:58; 2 Kol. 9:8) Yahwe akaterekereza Paulo kuhandiika nagamba ati: “Omuntu wena obwaraba atarukugonza okukora, aleke nokulya.”​—2 Bas. 3:10.

14. Yesu akaba namanyisa ki obuyagambire ebigambo ebiri omu Yohana 14:12?

¹⁴ Omu biro binu ebya ha mpero, omulimo ogurukukirayo obukuru nugwo ogw’okutebeza n’okufoora abantu abegeswa. Kandi Yesu akaranga kara ngu abegeswa be bakukozere omulimo ogurukukira oguyakozere! (Soma Yohana 14:12.) Akaba atarukumanyisa ngu nibaija kukora eby’amahano nk’ebi y’akozere. Oihireho, akaba namanyisa ngu abahondezi be bakaba nibagenda kutebeza omu biikaro bingi, abantu baingi, kandi n’okumara akasumi akaraihire kumukira.

15. Bikaguzo ki ebitusemeriire kwekaguza, kandi habwaki?

¹⁵ Obworaaba oine omulimo, wekaguze ebikaguzo binu: ‘Nambere nkorra, manyirwe nk’omuntu arukukora n’amaani? Emirimo yange ngikora kurungi kandi ngimaliiriza omu bwire?’ Obworaaba nukwo okora, mukama wawe naija kweyongera kukwesiga. Kandi abakozi bagenzi baawe nibasobora n’okugonza kuhuliiriza amakuru amarungi habw’okurora obwekambi bwawe. Osemeriire n’okwekaguza ebikaguzo binu obukirukuhika ha mulingo otebezaamu kandi oyegesaamu: ‘Manyirwe nk’omutebezi omwekambi? Ntekaniza kurungi enyanjura ez’okukozesa ha murundi ogw’okubanza?  Ngarukayo bwangu kurora abantu abanatebiize abayolekere okugonza? Nkira kwejumbira omu miringo ey’okutebeza erukwahukana?’ Obworaaba okora ebintu binu, noija kutunga okusemererwa omu mulimo ogw’okutebeza.

16. Omulingo Yesu n’abakwenda be baroramuga kuhuumura nigwahukana guta n’omulingo abantu abarukukira obwingi kasumi kanu b’aroramu kuhuumura?

¹⁶ Yesu akaba akimanyire ngu obwire obumu uwe n’abegeswa be bayetagaga kuhuumura. Baitu abantu omu kasumi ako, kandi n’abarukukira obwingi omu kasumi kanu, baine entekereza nk’ey’omusaija omuguuda Yesu ou yabalizeeho. Omusaija onu akaba aine entekereza erukugamba ngu: “Humura, olye, onywe, osemererwe.” (Luk. 12:19; 2 Tim. 3:4) Akaba natekereza ngu ekirukukira obukuru omu bwomeezi nukwo kuhuumura n’okwesemeza. Baitu Yesu hamu n’abakwenda be batebembeze kwesemeza bonka.

17. Tusemeriire kukozesa tuta obwire obutukuba tutali ha mirimo yaitu?

¹⁷ Naitwe omu kasumi kanu tuhondeera kyokurorraho kya Yesu, obutukozesa obwire obutuba tutali ha mirimo kuhuumura, kutebeza, hamu n’okugenda omu nsorrokano ez’Ekikristaayo. Habwokuba kikuru muno kukora omulimo ogw’okufoora abantu abegeswa hamu n’okugenda omu nsorrokano, tukora kyona ekirukusoboka kurora ngu twayejumbira omu bintu binu obutoosa. (Baheb. 10:24, 25) Nobutuba tugenzere kuhuumuraho omu kiikaro kindi, tugenda omu nsorrokano hoona nambere tuli, kandi tukozesa buli kagisa koona kutebeza abantu abatutangatangana.​—2 Tim. 4:2.

18. Omukama waitu Yesu Kristo n’agonza tukole ki?

¹⁸ Twine omugisa gw’amaani habwokuba Omukama waitu Yesu Kristo tarukutunihirramu kukora ebitutarukusobora. Kandi atukonyera kuba n’entekereza ey’ehikire ha mirimo hamu n’okuhuumura. (Baheb. 4:15) Nagonza tuhuumule ekirukumara. Kandi nagonza tukole n’amaani tusobole kutunga ebyetaago byaitu hamu n’okwejumbira omu mulimo ogurukuhuumuza ogw’okufoora abantu abegeswa. Omu kicweka ekirukuhonderaho, nitwija kubazaaho Yesu ekiyakozere kutujuna kuruga omu bwiru.