1-2. Kusigikirra ha kyokurorraho kya Angelito, kiki itwena ekitusemeriire kukora?

BAZAIRE baawe Bakaiso ba Yahwe? Obukiraaba nukwo kiri, oikale okimanyire ngu tosobora kutunga enkoragana enungi na Yahwe ngu habwokuba bazaire baawe nibamuheereza. Bazaire baitu n’obubaraaba nibaheereza Ruhanga rundi nangwa, buli omu asemeriire kweyombekera enkoragana ye na Yahwe.

² Tekerezaaho ekyokurorraho eky’ow’oruganda arukwetwa Angelito. Akakurra omu ka ey’Abakaiso ba Yahwe. Baitu obwakaba akyali muto, akaba atarukwehurra ngu aine enkoragana na Yahwe. Angelito nagamba ati: “Naheerezaaga Yahwe habwokuba nkaba ningonza kukora abanyabuzaale bange ekibakaba nibakora.” Baitu, Angelito akacwamu kutunga obwire obw’okusoma Ekigambo kya Ruhanga n’okukyecumitirizaaho, kandi akatandika n’okusaba muno Yahwe. Kiki ekyarugiremu? Angelito nagamba ati, “Nkega ngu omulingo gwonka ogu nsobora kwirra haihi na Ise nyowe ow’engonzi nugwo ogw’okwongera kumumanya nyowe nk’omuntu.” Ekyokurorraho ekya Angelito nikituletera kwekaguza ebikaguzo binu ebikuru: Mbaganiza ki enyakuli hagati y’okumanya Ruhanga hamu n’okumumanya kurungi? Kandi nitusobora tuta kumanya Yahwe kurungi?

3. Mbaganiza ki enyakuli hagati y’okumanya Ruhanga hamu n’okumumanya kurungi?

 ³ Omuntu ow’amanyire ibara lya Ruhanga, ebintu ebiyagambire, hamu n’ebiyakozere naba amumanyire. Kumanya ebintu binu tikirukumanyisa ngu tumanyire Yahwe kurungi. Tusemeriire kutunga obwire oburukumara kwegaho Yahwe hamu n’emiringo ye. Obutukikora kitukonyera kumanya kiki ekimuleetera kubaza n’okukora ebyaba acwiremu. Kinu nikiija kutukonyera kwetegereza entekereza, encwamu, hamu n’ebikorwa eby’agonza. Obutumara kumanya Yahwe eby’agonza tusemeriire kubikora.

4. Kubazaaho ebyokurorraho eby’abantu abali omu Baibuli nikiija kutukonyera kita?

⁴ Abantu abamu nibasobora kutusekereza habw’okugonza kuheereza Yahwe, kandi nibasobora n’okutuhiganiza obututandika kugenda omu nsorrokano. Baitu kakuba twesiga Yahwe, tarukwija kutulekaho. Nitwija kuba nitwombeka omusingi omurungi ogw’enkoragana enungi na Yahwe obwomeezi baitu bwona. Nikisoboka kumanya Yahwe kurungi? Ego nikisoboka! Ebyokurorraho eby’abasaija abatahikiriire nka Musa hamu n’Omukama Daudi nibyoleka ngu nikisoboka. Obuturaaba nitubazaaho ebibakozere nitwija kugarukamu ebikaguzo binu: Kiki ekyabakonyire kumanya Ruhanga kurungi? Ebyokurorraho byabo nibitwegesa ki?

5. Kiki Musa ekiyacwiremu kukora?

⁵ Musa akateeka omu nkora eby’akaba ayegere. Musa obwakaba ali haihi kuhikya emyaka 40, akacwamu kukoragana n’abantu ba Ruhanga Abaheburaniya omu kiikaro eky’okwikara namanywa ‘nkomwana w’omuhara wa Faraho.’ (Baheb. 11:24) Musa akefeereza ekiikaro eky’amaani. Habw’okusagika Abaheburaniya abakaba bali bairu omu Misiri, Musa akateeka obwomeezi bwe omu kabi, habwokuba Faraho akaba ali omulemi ow’amaani, ow’ekiniga, kandi Abamisiri bamuroraga nka ruhanga. Eki kyali kikorwa eky’okwikiriza okw’amaani! Musa akesiga Yahwe kandi kinu nikyo kyamuletiire kutunga enkoragana enungi nauwe obwomeezi bwe bwona.​—Nfu. 3:5.

6. Ekyokurorraho kya Musa nikitwegesa ki?

⁶ Kinu nikitwegesa ki? Nka Musa, itwena twine encwamu ey’okukora: Naitwe turacwamu kuheereza Yahwe n’okukoragana n’abantu be? Kinu nikisobora kutwetagisa kwefereza ebintu ebimu kusobora kuheereza Ruhanga, kandi nitusobora n’okuhiganizibwa. Baitu kakuba twesiga Yahwe nitukigumya ngu naija kutusagika!

7-8. Musa akagumizaamu nayega ki?

⁷ Musa akagumizaamu nayega emiringo ya Yahwe kandi nakora Yahwe eby’agonza. Nk’ekyokurorraho, Yahwe obuyamugambiire kwebembera Abaisaleri kuruga omu Misiri, akatiina kandi akaikara nagambira Yahwe ngu tarukusobora. Baitu Ruhanga akamugarukamu omu mulingo ogw’embabazi kandi y’amukonyera. (Kurug. 4:10-16) Kinu kikasobozesa Musa kutwara obutumwa obw’amaani kandi obw’omusango hali Faraho. Hanyuma y’ebi, Musa akarora Yahwe nakozesa amaani ge kujuna Abaisaleri kandi n’okuhwerekereza Faraho n’amahe ge omu Nyanja Erukutukura.​—Kurug. 14:26-31; Zab. 136:15.

⁸ Hanyuma ya Musa kwebembera Abaisaleri kuruga Misiri, bakaikara nibatontorooma. Musa akarora omulingo Yahwe yagumisiriize abantu be abakaba aihire omu bwiru. (Zab. 78:40-43) Kandi akarora omulingo Yahwe yayebundaize obuyamuhuliriize yaleka kuhwerekereza Abaisaleri.​—Kurug. 32:9-14.

9. Kusigikirra h’Abaheburaniya 11:27, enkoragana ya Musa na Yahwe ekaba egumire kwingana nkaha?

 ⁹ Hanyuma ya Musa kucungura Abaisaleri kuruga Misiri, enkoragana ye na Yahwe ekeyongerra kimu kuguma kandi yasisanaga oti rundi yaroraga Ruhanga. (Soma Abaheburaniya 11:27.) Habwokuba enkoragana yabo ekaba eri y’amaani, Baibuli n’egamba eti: “[Yahwe] yabazaga na Musa nibarorangana ha maiso, nkomuntu okwabaza nenganjaniye.”​—Kurug. 33:11.

10. Kiki ekitusemeriire kukora kusobora kumanya Yahwe kurungi?

¹⁰ Kinu nikitwegesa ki? Kumanya Yahwe kurungi nikyetagisa kwega emiringo ye n’okukora eby’agonza. Omu kasumi kanu, Yahwe nagonza “abantu bona okujunwa, nokuhika omu kumanyira kimu amazima.” (1 Tim. 2:3, 4) Omulingo gumu ogutusobora kukora Ruhanga eby’agonza nukwo kwegesa abantu ebirukumukwataho.

11. Kwegesa abandi hali Yahwe kitukonyera kita kweyongera kumumanya kurungi?

¹¹ Emirundi erukukira obwingi, obutwegesa abantu ebirukukwata hali Yahwe naitwe tweyongera kumumanya kurungi. Ekyokurorraho, turora embabazi za Yahwe obw’atukonyera kuzoora abantu ab’arukugonza kumanya amananu. (Yoh. 6:44; Eng. 13:48) Turora amaani g’Ekigambo kya Ruhanga obuturora abeegi baitu aba Baibuli nibasingura engeso embi kandi nibajwara omuntu omuhyaka. (Bak. 3:9, 10) Kandi turora okugumiisiriza kwa Ruhanga obw’aikara n’atusindika tugende tukonyere abo abali omu kicweka kyaitu eky’okutebezaamu kumumanya nukwo basobole kujunwa.​—Bar. 10:13-15.

12. Nk’oku kyolekerwe omu Okuruga 33:13, kiki Musa ekiyasabire Yahwe, kandi habwaki?

¹² Musa akatwara enkoragana ye na Yahwe kuba ey’omuhendo. Musa n’obwaraaba yakozere eby’amahano omu ibara lya Ruhanga, n’okwebundaaza kwingi, akasaba Yahwe amukonyere nukwo ayoyeyongere kumumanya kurungi. (Soma Okuruga 33:13.) Musa akaba aine emyaka 80 obuyasabire Yahwe ekintu eki habwokuba akakyetegereza ngu akaba akyaine bingi eby’okwega hali Ise ow’omu iguru kandi ow’engonzi.

13. Mulingo ki gumu ogutusobora kwoleka ngu nitutwara enkoragana yaitu na Yahwe kuba ey’omuhendo?

¹³ Kinu nikitwegesa ki? Tusemeriire kwikara nitutwara enkoragana yaitu na Yahwe nk’ekintu eky’omuhendo n’obukiraaba ngu tumazire akasumi kaingi nitumuheereza. Kusaba nugwo omulingo gumu ogurukwoleka ngu enkoragana yaitu na Yahwe y’omuhendo.

14. Kusaba kutukonyera kuta kweyongera kumanya Ruhanga kurungi?

¹⁴ Kubaza obutoosa nikyo kigumya enkoragana hagati y’abantu. Nahabweki, weyongere kwirra haihi na Ruhanga kuraba omu kumusaba obutoosa hamu n’okumugambira omulingo orukwehurramu otarukutiina. (Bef. 6:18) Munyanya itwe arukwetwa Krista, arukwikara omu ihanga lya Turkey, nagamba ati: “Buli murundi obu nsaba ningambira Yahwe ebindukutekereza kandi nkarora omulingo ankonyera, kinkonyire kurora Yahwe nka Ise nyowe kandi munywani wange.”

15. Yahwe akabazaaho ata Omukama Daudi?

¹⁵ Omukama Daudi akazaarwa omu ka n’ihanga nambere abantu baramyaga Yahwe. Daudi ataramye Yahwe ngu habwokuba abanyabuzaale be baali nibamuramya. Baitu akeyombekera enkoragana ye na Ruhanga ekyaletiire Yahwe kumugonza muno. Yahwe akabazaaho Daudi ati: “Omusaija arukusemeza omutima gwange.” (Eng. 13:22, NW)  Kiki ekyakonyire Daudi kutunga enkoragana nk’enu na Yahwe?

16. Daudi akeega ki obuyarozere ebintu Yahwe yahangire?

¹⁶ Ebintu Yahwe yahangire bikakonyera Daudi kumwegaho. Daudi obwakaba akyali muto, yamaraga obwire bwingi ali omu kisaka naliisa entaama za ise. Nikizooka ngu omu kasumi ako, Daudi nubwo yatandikire kwecumitirizaho ebintu Yahwe yahangire. Ekyokurorraho, Daudi obuyaroraga enyunyuzi haiguru ekiro kikamwegesa ebintu bingi. Aketegereza emiringo ey’Ogu ayazihangire. Kinu kikaletera Daudi kuhandiika nagamba ati: “Iguru ligamba ekitinisa kya Ruhanga; nahagati hayoleka emirimo eyemikono ye.” (Zab. 19:1, 2) Daudi obuyatekerizeeho omulingo abantu bahangirwemu, akarora amagezi ga Yahwe. (Zab. 139:14) Kandi obuyayecumitirizeeho ebintu Yahwe yahangire, kikamuletera kwebundaaza.​—Zab. 139:6.

17. Kwecumitirizaaho ebintu Yahwe yahangire nikiija kutukonyera kwega ki?

¹⁷ Kinu nikitwegesa ki? Faayo kwetegereza ebintu Yahwe yahangire. Tunga obwire obw’okubitekerezaaho n’okubitaho omutima. Omu bwomeezi bwawe obwa buli kiro, wecumitirizeeho eby’orukwega hali Yahwe kuruga omu ebintu ebikwetoroire nk’ebimera, ebisoro hamu n’abantu. Kinu nikiija kukukonyera buli kiro kwega amasomo amahyaka hali Yahwe. (Bar. 1:20) Kandi buli kiro noija kweyongera kumugonza.

18. Nk’oku kyolekerwe omu Zabuli 18, Daudi aketegereza ki?

¹⁸ Daudi akakyetegereza nk’oku Yahwe akaba n’amukonyera. Ekyokurorraho, Daudi obuyaisire entale hamu n’edubu ebikaba nibigonza kulya entaama za ise, akakyetegereza ngu Yahwe nuwe y’amukonyire kusingura enyamaiswa ezi ez’amaani. Obuyasingwire omurwani ow’amaani kandi omukooto Goliasi, Daudi akakirorra kimu ngu Yahwe nuwe y’amukonyire. (1 Sam. 17:37) Kandi obuyakizire kwitwa Omukama Saulo ow’akaba aine ihali, Daudi akakyetegereza ngu Yahwe nuwe yamujunire. (Zab. 18, obugambo oburukubanza) Kakuba Daudi akaba aine emyehembo yakubaire agambire ngu nuwe y’akozere ebintu binu byona. Baitu Daudi akaba ali mwebundaazi, nahabweki akakyetegereza ngu Yahwe nuwe y’amukonyire kubikora.​—Zab. 138:6.

19. Ekyokurorraho kya Daudi nikitwegesa ki?

¹⁹ Kinu nikitwegesa ki? Titusemeriire kugarukira ha kusaba Yahwe kutukonyera. Baitu tusemeriire kulengaho kwetegereza akasumi n’omulingo atukonyeramu. Obuturaaba tuli bebundaazi nitwija kukyetegereza ngu titusobora kukora buli kimu kyona omu maani gaitu itwenka baitu nitwetaaga obukonyezi bwa Yahwe. Kandi buli murundi turarora omulingo Yahwe arukutukonyeramu enkoragana yaitu nauwe niija kweyongera kuguma. Ow’oruganda Isaac kuruga omu ihanga lya Fiji kandi ow’amazire emyaka nyingi n’aheereza Yahwe, nagumya ensonga enu. Nagamba ati: “Obuntekerezaaho ebindabiremu, ninkirorra kimu ngu Yahwe nuwe aikaire n’ankonyera kuruga ntandika kwega Baibuli n’okuhikya na hati. Kinu kindetiire kukigumya ngu Yahwe aikaire nanyowe.”

20. Enkoragana ya Daudi na Ruhanga netwegesa ki?

²⁰ Daudi akegera ha miringo ya Yahwe. Yahwe akatuhanga n’obusobozi obw’okwegera ha miringo ye. (Kub. 1:26) Obuturayeyongera kwegaho emiringo ya Yahwe nikiija kutukonyera kuhondera ekyokurorraho kye. Habwokuba Daudi akaba amanyire kurungi Ise ow’omu iguru, kikamukonyera kumanya omulingo ogw’okutwazamu abantu abandi.  Tekerezaaho ekyokurorraho kinu. N’obukiraaba ngu Daudi akasiisa omu maiso ga Yahwe obuyasiihaine na Basiseba kandi hanyuma yaita musaija we, Yahwe akacwamu kumuganyira. (2 Sam. 11:1-4, 15) Yahwe akamuganyira habwokuba Daudi yahonderaga ekyokurorraho kye kandi akaba ayolekere abantu abandi embabazi. Habwokuba Daudi akaba aine enkoragana enungi na Yahwe, akafooka omu ha bakama abakaba nibakira kugonzebwa muno abantu kandi Yahwe y’amukozesaga nk’ekyokurorraho hali abakama abandi Abaisaleri.​—1 Bakam. 15:11; 2 Bakam. 14:1-3.

21. Kusigikirra ha Abefeso 4:24 na 5:1, kiki ekirugamu ‘obutukuratira omulingo gwa Ruhanga?’

²¹ Kinu nikitwegesa ki? Tusemeriire ‘kukuratira omulingo gwa Ruhanga.’ Obutukora eki tugasirwa kandi kitukonyera kweyongera kumumanya. Obutwegera ha miringo ya Ruhanga, twoleka ngu tuli baana be.​—Soma Abefeso 4:24; 5:1.

22-23. Kiki ekirarugamu obuturateeka omu nkora ebiturukwega hali Yahwe?

²² Nk’oku twegere, Yahwe atukonyera kumumanya n’akozesa ebintu ebiyahangire hamu n’Ekigambo kye Baibuli. Baibuli ijwiremu ebyokurorraho bingi eby’abaheereza ba Yahwe abesigwa ebitusobora kwegeraho, nk’ekya Musa hamu na Daudi. Yahwe akozere ogwe, hati kiri hali itwe kweyongera kwega bingi ebirukumukwataho.

²³ Nitwija kwikara nitwega hali Yahwe ebiro n’ebiro. (Mug. 3:11) Baitu ekikuru muno nukwo kuteeka omu nkora ebitumwegereho hatali kubyega kwonka. Obuturateeka omu nkora ebiturukwega kandi tukalengaho kuhondera ekyokurorraho ekya Isitwe ow’okugonza, nitwija kweyongera kumwirra haihi. (Yak. 4:8) Yahwe n’akozesa Ekigambo kye kutugumya ngu talireka abo boona abamuserra.