1. Kiki ekisobora kutuhikaho kakuba tuhwamu amaani?

BULI kiro tutunga ebizibu kandi twekamba muno kubigumira. Baitu kigumire muno kugumira ebizibu byaitu obuturukuba tuhwairwemu amaani. Nahabweki tusemeriire kukiijuka ngu okuhwamu amaani nikusobora kutuletera kwehurra nk’abataine mugaso, kandi n’okutumaraho okusemererwa. Enfumo 24:10 nirugamba ngu: “Obworaba [ohoirwemu amaani] omu kiro kyobujune, buli amani gawe make.” Mali okuhwamu amaani nikisobora kutumaramu amaani agaturukwetaaga kusobora kugumira kurungi ebizibu.

2. Biki ebisobora kutuletera kuhwamu amaani, kandi kiki ekiturukwija kubazaaho omu kicweka kinu?

² Haroho ebintu bingi ebisobora kutumaramu amaani, nk’okwetekerezaaho kubi, ensobi ezitukora, rundi oburwaire. Nitusobora n’okuhwamu amaani kakuba tutatunga omugisa ogw’okuheereza Yahwe omu buheereza obuturukugonza rundi kakuba tuba twine kutebeza omu kicweka nambere abantu abarukukira obwingi batahuliiriza obutumwa bwaitu. Omu kicweka kinu, nitwija kubazaaho ebintu ebimu ebitusobora kukora kusobora kugumira okuhwamu amaani.

3. Kiki ekisobora kutukonyera kuba n’entekereza ey’ehikire ha butahikirra bwaitu?

³ Kyanguhire muno kwehurra kubi habw’obutahikirra bwaitu hamu n’ensobi ezitukora. Nahabweki, nitusobora kutekereza ngu habwokuba tukora ensobi, Yahwe tarukwija kutwikiriza kutaaha omu nsi empyaka. Entekereza nk’egi n’esobora kuba y’akabi muno. Obutahikirra bwaitu tusemeriire kuburora tuta? Oihireho  Yesu, Baibuli egamba ngu abantu boona “bakasisa.” (Bar. 3:23) Yahwe ayahandiikisize Baibuli, tatuserramu ensobi, rundi tatunihira kuba abahikiriire. Baitu ali Isiitwe ow’okugonza, arukugonza kutukonyera, kandi agumiisiriza. Arora omulingo twekamba kurwanisa obuceke bwaitu, kuleka kwetekerezaaho kubi, kandi ayetegekere kutukonyera.​—Bar. 7:18, 19.

4-5. Kusigikirra ha 1 Yohana 3:19, 20, kiki ekyakonyire banyaanya itwe babiri kurwanisa okuhwamu amaani?

⁴ Tekerezaaho ekyokurorraho kya Deborah na Maria. * Deborah obw’akaba akyali muto, yatwazibwaga omu miringo etali y’okugonza, ekyamuleteraaga kwetekerezaaho kubi muno. Kandi tibakiraga kumusiima. Nahabweki obuyakuzire kikamuletera kwikara nayetekerezaaho kubi. Obuyakoraga ensobi entaito kyamuleteraga kutekereza ngu busaho kintu kyona eky’asobora kukora kurungi. Maria na uwe akaba aine ekizibu nikyo kimu. Abanyabuzaale be bamuleteraga kwehurra kubi. Kandi kinu kikamuletera, kwikara nayehurra nk’ow’ataine mugaso. Na hanyuma y’okubatizibwa, akatekereza ngu tasemeriire kuba omu h’Abakaiso ba Yahwe!

⁵ Baitu, banyaanya itwe banu babiri, bataleke kuheereza Yahwe. Habwaki? Habwokuba bakanagira Yahwe emigugu yabo kurabira omu kusaba okw’amaani. (Zab. 55:22) Bakeega ngu Isiitwe ow’omu iguru kandi ow’okugonza akimanyire nk’oku ebintu ebibi ebitwarabiremu kara nibisobora kutuletera kwetekerezaaho kubi. Kandi arora n’emiringo enungi eitwine, n’obukiraaba ngu haroho obututekereza ngu titwine omulingo gwona omurungi.​—Soma 1 Yohana 3:19, 20.

6. Kiki omuntu eky’asobora kukora kakuba agarukamu kukora ensobi ey’akaba akozereho?

⁶ Omuntu n’asobora kuba n’alengaho muno kuleka omuze omubi. Baitu n’asobora kwongera kukora ensobi niyo emu kandi akahwamu amaani. Tukira kwehurra kubi obutusiisa. (2 Kol. 7:10) Baitu titusemeriire kwehurra kubi ekihinguraine habw’ensobi yaitu tukatandika n’okutekereza ngu ‘tinyine mugaso, kandi Yahwe talinganyira.’ Entekereza nk’egi teri y’amananu kandi n’esobora kutuletera kuleka kuheereza Yahwe. Ijuka ebigambo ebitusomerege omu Enfumo 24:10​—ngu amaani gaitu nigaija kuba make obuturaaba tuhoirwemu amaani. Nahabweki, saba Yahwe kandi omwesengereze akwoleke embabazi. (Is. 1:18) Yahwe obw’arora ngu mali oyegarukiremu kwo kandi oliyo nolengaho kukora empinduka, akuganyira. Kwongerraho, hikirra abagurusi b’ekitebe. N’obugumiisiriza nibaija kukukonyera kwongera okaba kurungi omu by’omwoyo.​—Yak. 5:14, 15.

7. Habwaki tutasemeriire kuhwamu amaani obukiraaba nikitugumira kukora ebihikire?

 ⁷ Jean-Luc, omugurusi w’ekitebe omu France, naha amagezi abo abarukurwanisa obuceke ati: “Omuntu omuhikiriire omu maiso ga Yahwe, tali muntu ow’atasobya, baitu muntu ow’ayegarukamu habw’ensobi ze kandi ow’alengaho muno kukora empindahinduka.” (Bar. 7:21-25) Nahabweki otatekereza ngu toine mugaso n’obworaaba oine obuceke obw’orukurwanisa. Habwokuba itwena tukora ensobi, nitwetaaga embabazi za Yahwe ezitatusemeriire, ezatwoleka kurabira omu kicunguro.​—Bef. 1:7; 1 Yoh. 4:10.

8. Nibaha abatusobora kusaba obukonyezi obuturukuba tuhoirwemu amaani?

⁸ Ab’oruganda na banyaanya itwe omu kitebe nibaija kutugarramu amaani! Nibasobora kutuhuliiriza kurungi obutuba nitwetaaga omuntu ow’okubaza na uwe, kandi nibasobora kutugarramu amaani. (Nfu. 12:25; 1 Bas. 5:14) Munyaanya itwe Joy kuruga omu ihanga lya Nigeria, ow’aikaire narwanisa ekizibu eky’okuhwamu amaani nagamba ati: “Nakubaire nkaha kakuba mbaire ntaine ab’oruganda? Ab’oruganda na banyaanya itwe, bwakaiso oburukwoleka ngu Yahwe agarukamu okusaba kwange. Mbegiireho omulingo nk’oku nsobora kugarramu amaani abantu abandi abenuubire.” Baitu kandi tusemeriire kwikara nitwijuka ngu obumu ab’oruganda na banyaanya itwe nibasobora kutakimanya ngu nitwetaaga kugarurwamu amaani. Nahabweki nikisobora kutwetaagisa kuhikirra ow’oruganda rundi munyaanya itwe ow’akuzire omu by’omwoyo tukamusaba obukonyezi.

9. Zabuli 41:3 hamu na 94:19 nizitugarramu zita amaani?

⁹ Serra obukonyezi kuruga hali Yahwe. Obuturukuba taturukwehurra kurungi, kandi kukira muno obutuba tumazire akasumi kaingi turwaire, nikisobora kutugumira kutekerezaaho ebintu ebirungi. Yahwe kasumi kanu takora ebyamahano kutukiza, baitu atuhumuuza kandi atuha amaani agaturukwetaaga kugumiisiriza. (Soma Zabuli 41:3; 94:19.) Ekyokurorraho, nasobora kuletera ab’oruganda na banyaanya itwe kutukorraho emirimo ey’omu ka rundi kutugendera omu katale. Nasobora kuletera ab’oruganda kusaba naitwe. Rundi n’asobora kutukonyera kwijuka ebintu ebirukuhuumuza ebirukusangwa omu Kigambo kye, nk’omurago ogw’okutunga obwomeezi oburungi obutarumu kurwara n’obusaasi omu nsi empyaka.​—Bar. 15:4.

10. Habwaki Isang atarasigaire ahwairwemu amaani hanyuma y’obutandwa?

¹⁰ Ow’oruganda Isang, arukwikara omu Nigeria akatunga obutandwa obwamuletiire kusarara. Dakitaali we akamugambira ngu tarukwija kwongera kurubata. Isang nagamba ati: “Nkacweka omutima kandi nahwamu amaani.” Akaikara ahwairwemu amaani? Nangwa! Kiki ekyamukonyire? Nasoborra ati: “Nyowe na mukazi wange tutaleke kusaba Yahwe n’okwesomesa Ekigambo kye. Kandi tukacwamu kwikara nitusiima habw’ebirungi ebitwine, otwaliiremu omurago ogw’obwomeezi obutahwaho omu nsi empyaka.”

11. Munyanya Cindy akatunga ata okusemererwa obwakaba arwaire?

¹¹ Munyaanya itwe Cindy arukwikara Mexico bakamusangamu oburwaire obukaba nibusobora kumwita. Kiki ekiyakozere kubugumira? Obwakaba natunga obujanjabi, aketeraho ekigendererwa eky’okutebezaaga buli kiro. Akahandiika nagamba ati: “Kukora eki kikankonyera kuteeka omutima h’abantu abandi hatali kuguteeka kusemezebwa kwange, rundi ha busaasi obw’amaani obunkaba nyine. Ganu nugo amagezi nakozesaaga: Obunabaga nimbaza n’abadakitaali rundi banaasi, nabakaguzaaga ebirukukwata h’amaka gaabo. Hanyuma nabakaguzaaga  habwaki baacwiremu kukora omulimo ogu ogugumire muno. Eki kyankonyeraga kumanya enyanjura ez’okukozesa ezisobora kuhika ha mitima yabo. Baingi bakangambira ngu abarwaire tibakira kubakaguza nk’oku bali. Kandi baingi bansiimaga habw’okubooleka ngu nimbafaaho. Abamu bakampa endagirro zaabo rundi enamba zaabo ez’esimu. Omu bwire obu obukaba bugumire, Yahwe akampa okusemererwa okw’amaani omu mutima. Kinu kikampuniriza muno!”​—Nfu. 15:15.

12-13. Abarwaire abamu rundi abaceke basoboire bata kwejumbira omu buheereza, kandi biki ebirugiremu?

¹² Abarwaire rundi abaceke nibasobora kuhwamu amaani habwokuba tibarukusobora kutebeza nk’oku bakugondeze. Baitu nabwo, baingi basoboire kutebeza. Omu ihanga lya Amerika, munyaanya arukwetwa Laurel akaba aine kwikara omu ka omu kyoma ekya mukonyeraga kwikya kumara emyaka 37! Akaba aine na kansa, bakamusemeza emirundi nyingi, kandi akaba endwaire zindi ha mubiri gwe. Baitu ebizibu binu eby’amaani muno bitamutange kutebeza. Yatebezaaga banaasi hamu n’abantu abaijaga omu ka ye. Kiki ekyarugiremu? Akakonyera abantu nka 17 kufooka Abakaiso ba Yahwe! *

¹³ Richard, omugurusi w’ekitebe omu France, aine amagezi agarukuha abo abatasobora kuruga omu ka gaabo rundi abo abarukwikara omu biikaro nambere balindira abakuzire omu myaka. N’agamba ati: “Nibasobora kuteeka ebitabu byaitu nambere abantu basobora kubirora bwangu. Abantu abarukurabaho obubarabirora, nikiija kubaletera kukukaguza. Kinu nikisobora kugarramu amaani ab’oruganda na banyaanya abo abatakyasobora kutebeza nju ha nju.” Abo abatasobora kuruga omu ka gaabo nibasobora kwejumbira omu buheereza kurabira omu kuhandiika amabbaruha rundi okutebeza okwa ha simu.

14. Kyokurorraho ki Omukama Daudi ekiyatuteriireho?

¹⁴ Habw’emyaka, oburwaire, rundi ensonga ezindi, nitusobora kutaheereza rundi kutunga obujunanizibwa omu kitebe rundi omu circuit obuturukugonza. Omu nyikara nk’egi, nitusobora kwegera ha kyokurorraho ky’Omukama Daudi. Obubamugambiire ngu tarukwija kwombeka yekaru ya Ruhanga, ekintu ekyaba alindiriire n’ekihika kingi, akacwamu kusagika ogu Yahwe ow’akaba akomere kukora omulimo ogu. Daudi akahayo n’ebintu nk’ezaabu, n’efeeza kusagika okwombeka oku. Mali Daudi akatekaho ekyokurorraho kirungi ekitusobora kwegeraho!​—2 Sam. 7:12, 13; 1 Byom. 29:1, 3-5.

15. Ow’oruganda Hugues akasingura ata ekizibu eky’okuhwamu amaani?

¹⁵ Oburwaire bukaletera ow’oruganda Hugues arukwikara France kuleka kuheereza  nk’omugurusi omu kitebe, kandi akaba atakyasobora n’okukora obulimo obutaito omu ka ye. Akahandiika nagamba ati: “Ha kubanza nkehurra nk’ataine mugaso kandi nahwamu muno amaani. Baitu hanyuma y’obwire, nkakyetegereza habwaki kikuru muno kuleka kusaasa habw’ebintu ebi nkaba ntakyasobora kukora. Hanyuma nkasobora kutunga okusemererwa habw’ebintu ebinkaba nikyasobora kukora kuheereza Yahwe. Nkacwamu kugumizaamu nimpeereza. Ninyija kwikara nindwana nka Gideoni hamu n’abasaija be ebikumi bisatu, abagumizeemu nibarwana n’obukiraaba ngu bakaba bajwahire!”​—Bac. 8:4.

16. Kiki ekitusobora kwegera ha kyokurorraho kya Bamalaika?

¹⁶ Bamalaika abesigwa bali kyokurorraho ekirungi. Omu kasumi k’obulemi bw’Omukama Ahabu, Yahwe akakaguza bamalaika entekereza yabo ha mulingo basobora kudomesa Omukama Ahabu ow’akaba ali mubi muno. Bamalaika abamu bakahamu entekereza yabo. Baitu Yahwe akakoma malaika omu kandi yamugambira ngu ekitekerezo kye nikiija kukora. (1 Bakam. 22:19-22) Bamalaika abandi bakahwamu amaani nibatekereza ngu, ‘Habwaki tusisire obwire bwaitu kuhayo entekereza yaitu? Nangwa batahwemu amaani. Bamalaika bebundaazi kandi bagonza ekitiinisa kyona kigarukire Yahwe.​—Bac. 13:16-18; Kus. 19:10.

17. Kiki ekitusemeriire kukora kakuba twehurra tuhoirwemu amaani habw’okutatunga obujunanizibwa omu kitebe?

¹⁷ Ikara noijuka ngu omugisa ogurukukira obukuru ogutwine nugwo ogw’okuba omu h’Abakaiso ba Yahwe kandi n’okutebezaaho Obukama bwe. Nitusobora kutunga obujunanizibwa rundi nibusobora kuhwaho, baitu twijuke ngu tibuli nubwo butufoora b’omuhendo omu maiso ga Ruhanga. Obuturaaba tuli bebundaazi, nitwija kufooka b’omuhendo hali Yahwe, hamu n’ab’oruganda na banyaanya itwe. Nahabweki, wesengereze Yahwe akukonyere kusigara oli mwebundaazi kandi muculeezi. Wecumitirizeeho ebyokurorraho ebirungi ebiri omu Kigambo kye ebirukukwata ha buculeezi n’obwebundaazi. Weheyo kuheereza ab’oruganda omu mulingo gwona ogworukusobora.​—Zab. 138:6; 1 Pet. 5:5.

18-19. Nosobora ota kutunga okusemererwa omu buheereza, n’obukiraaba ngu abantu omu kicweka kyanyu tibarukugonza kwega amananu?

¹⁸ Wakehurraga ohoirwemu amaani habwokuba abantu omu kicweka kyanyu tibarukwenda kwega amananu rundi tibakira kuba omu maka gaabo? Omu nyikara nk’egi, kiki ekitusobora  kukora kusobora kwongera ha kusemererwa kwaitu rundi kukwikazaaho? Amagezi agamu gali omu kasanduuko “ Emiringo Osobora Kusemezaamu Obuheereza Bwawe.” Kandi kikuru muno kuba n’entekereza ehikire ha mulimo ogw’okutebeza. Kinu nikitwarramu ki?

¹⁹ Omutima guteeke ha kurangirra ibara lya Ruhanga n’Obukama bwe. Yesu akakyoleka kurungi ngu, bake muno abakuzoire omuhanda ogurukugenda omu bwomeezi. (Mat. 7:13, 14) Obuturukuba tuli omu buheereza, twine omugisa ogw’okukorra hamu na Yahwe, Yesu, hamu na bamalaika. (Mat. 28:19, 20; 1 Kol. 3:9; Kus. 14:6, 7) Yahwe n’aserra abantu abarukugonza kumuheereza . (Yoh. 6:44) Nahabweki, omuntu kakuba atahuliiriza obutumwa bwaitu ha murundi ogw’okubanza, nasobora kutuhuliiriza ha murundi ogundi.

20. Ekyahandiikirwe ekiri omu Yeremiya 20:8, 9 nikitwegesa ki ha kurwanisa okuhwamu amaani?

²⁰ Nitusobora kwegera bingi ha nabbi Yeremiya. Akaheebwa obujunanizibwa obw’okutebeza omu kicweka ekigumire muno. Abantu bamujumaga kandi bamusekerezaaga “okuiza obwire.” (Soma Yeremiya 20:8, 9.) Akahika yahwamu muno amaani yagonza n’okwerekera kutebeza. Baitu atakikole. Habwaki? “Ekigambo kya [Yahwe]” kikaba kiri nk’omurro omunda ya Yeremiya, kandi akaba atasobora kugugumira! Naitwe nukwo twehurra tuti obutwijuza omu bitekerezo n’omutima gwaitu Ekigambo kya Ruhanga. Egi niyo ensonga endi habwaki tusemeriire kwekamba kwesomesa Baibuli obutoosa n’okugyecumitirizaaho. Kinu nikiija kutuletera kwongera kutunga okusemererwa omu buheereza kandi n’abantu nibasobora kutuhuliiriza.​—Yer. 15:16.

21. Nitusobora tuta kusingura okuhwamu amaani?

²¹ Deborah outusangirwe tubalizeeho akagamba ngu “Kuhwamu amaani ky’okurwanisa eky’amaani Sitaani eky’akozesa kuturwanisa.” Baitu Yahwe Ruhanga aine amaani maingi kukira Sitaani hamu n’eby’okurwanisa bye byona. Nahabweki kakuba oyehurra ohweirwemu amaani habw’ensonga ezitali zimu na zimu, wesengereze Yahwe akukonyere. Naija kukukonyera kurwanisa obutahikirra hamu n’obuceke bwawe. Naija kusagika n’obworaaba orwaire. Naija kukukonyera kwikara n’entekereza ehikire ha obujunanizibwa omu kitebe. Kandi naija kukukonyera kuba n’entekereza ey’ehikire omu buheereza. Saba Isiitwe ow’okugonza kandi omugambire nk’oku orukwehurra. Habw’obukonyezi bwe nosobora kusingura okuhwamu amaani.