Omu iguru, Yesu akeega emiringo ey’amukonyire kukorra hamu kurungi n’abandi, hanyuma obwakaba ali omu nsi kinu kikamukonyera kuteekaho ekyokurorraho ekirungi eky’okukorra hamu n’abandi. Ekyokurorraho kya Yesu nikisobora kutugasira kita? Kwegaho ekyokurorraho kye, nikiija kutukonyera kumanya emisingi esatu ey’eratukonyera kukorra hamu kurungi n’abandi. Emisingi egi niija kutukonyera kukorra hamu omu bumu n’Abakristaayo bagenzi baitu.

Omuntu arukukorra hamu kurungi n’abandi, omu mulingo gw’obwebudaazi atwara abakozi bataahi be nk’ab’omuhendo kandi talengaho n’okweyoleka. Obwebudaazi nk’obu guli gumu ha miringo Yesu yayegere kuruga hali Ise. N’obukiraaba ngu Yahwe nuwe wenka asemeriire kwetwa Omuhangi, akooleka obujunanizibwa Omwana we kandi omukozi mutaahi we obuyahikiriize. Kinu nitukirorra omu bigambo bya Ruhanga obuyagambire ati: “Tukole muntu okuba nkaitwe, omu kusisana kwaitu.” (Kub. 1:26) Yahwe obuyagambire ebigambo ebi, Yesu aine kuba yakirozere ngu Yahwe mwebundaazi muno.​—Zab. 18:35.

Yesu obwakaba ali omu nsi na uwe akooleka obwebundaazi nk’obu. Abantu obubamuhaisaniize habw’ebintu eby’akaba akozere ekitiinisa akakigarurra Ruhanga habwokuba nuwe akaba akisemeriire. (Mar. 10:17, 18; Yoh. 7:15, 16) Yesu akekamba kwikazaaho obusinge n’abegeswa be  kandi akabatwaza nk’enganjani ze hatali nk’abairu. (Yoh. 15:15) Akabanaabya n’ebigere byabo kubeegesa obwebundaazi. (Yoh. 13:5, 12-14) Naitwe tusemeriire kuteekamu ekitiinisa abakozi bagenzi baitu, omu kiikaro ky’okwebembeza ebiturukugonza. Kakuba tuteekamu abandi ekitiinisa kandi tukaleka kweraliikirra ow’arasiimwa habw’omulimo tukozere nitwija kukora bingi n’okukiraho.​—Bar. 12:10.

Omuntu omwebundaazi akyetegereza ngu ‘omu kuhanuura kw’abaingi’ haroho ekihikirizibwa. (Nfu. 15:22) Nobukiraaba ngu tokozere ekintu kumara akasumi kaingi rundi twine obukugu bwingi, tusemeriire kukiijuka ngu busaho muntu n’omu ow’amanyire buli kimu. Na Yesu akagamba ngu haali haroho ebintu eby’atamanyire. (Mat. 24:36) Ekindi, yagonzaaga kumanya entekereza z’abegeswa be abatahikiriire. (Mat. 16:13-16) Egi niyo ensonga habwaki abakozi bagenzi be bagonzaaga kukora na uwe. Omu mulingo nugwo gumu, obuturaaba bebundaazi tukaijuka ngu titumanyire buli kimu kyona, kandi tukahuliiriza entekereza ez’abandi, nitwija kuleetaho obusinge, kandi omu kukwataniza nabo habeho ekitwahikiriza.

Kikuru muno abagurusi b’ekitebe kwegera ha kyokurorraho kya Yesu obubarukuba nibakorra hamu. Nibetaaga kukiijuka ngu omwoyo ogurukwera nigusobora kuletera omugurusi wena h’akatebe k’abagurusi kubaza ekintu ekirabakonyera kukora encwamu enungi. Omu nkurato zaabo abagurusi bakigumya ngu buli omu n’ahuura aine obugabe obw’okubaza ekyakutekereza, kandi obubakorra hamu bakora encwamu ezigasira ekitebe kyona.

Omuntu ow’akorra hamu kurungi n’abandi ayoleka okwetegereza hali abakozi bagenzi be. Tagumangana kandi aikiriza entekereza ez’abandi. Busaho kugurukyagurukya Yesu akatunga emigisa nyingi kurora Ise nayoleka omulingo gunu ogw’okwetegereza. Ekyokurorraho, Yahwe akamutuma kujuna abantu omusango gw’okufa ogwali gubasemeriire.​—Yoh. 3:16.

Yesu yaikirizaaga entekereza ez’abandi obukyabaga nikyetaagisa. Ijuka nk’oku yakonyire omukazi Omukanaani n’obukiraaba ngu akaba atumirwe hali enju ya Isaleri. (Mat. 15:22-28) Ekindi akooleka okwetegereza omuli ebi eby’akaba n’anihirramu abegeswa be. Hanyuma ya munywani we nfe na nfe Petero kumwehakana omu rwijwire rw’abantu, Yesu akaba ayetekaniize kumuganyira. Kandi hanyuma akamuha obujunanizibwa obw’amaani. (Luk. 22:32; Yoh. 21:17; Eng. 2:14; 8:14-17; 10:44, 45) Ekyokurorraho kya Yesu nikitwoleka ngu  “[okwetegereza] kwanyu kumanywe abantu bona” kurabira omu kwikiriza entekereza ez’abandi.​—Baf. 4:5.

Okwetegereza nikwija kutuletera kukora empindahinduka eziratusobozesa kukorra hamu omu businge n’abantu ba buli mulingo. Yesu yatwazaaga kurungi abantu abaabaga na uwe, egi niyo ensonga habwaki abanyanzigwa be ab’ihali bakamujunaana kuba “nganjani yabahoza nabasisi” abaikiriize obutumwa bwe. (Mat. 11:19) Kusisanaho na Yesu, naitwe nitusobora kukorra hamu kurungi n’abantu abarukwahukana? Ow’oruganda Louis, ow’amazire akasumi omu mulimo gw’okubungira ebitebe hamu na ha Beseeri n’agamba ati: “Ndengesaniza buli guruupu ei nkora nayo n’ekisiika ekyombekerwe n’amabaale agatarukwinganaingana. Kurabira omu kukora empindahinduka omu kupanga amabaale agamu, omalirra oyombekere ekisiika ekiterekeriire. Kandi nanyowe ndengereho kukora empindahinduka kusobozesa ekisiika kuterekerra.” Mali egi ntekereza nungi muno!

Ni di nambere tusobora kwoleka omutima gw’okukwataniza omu kitebe? Twine omugisa ogw’okukora eki obutuba tuli hamu na guruupu yaitu ey’obuheereza. Nitusobora kukorra hamu n’abatebezi abaine obujunanizibwa obw’amaka oburukwahukana n’obwaitu, rundi n’abo abarukwahukana naitwe omu myaka. Naitwe nitusobora kurubatira ha sipiidi yabo, rundi kwejumbira omu mulingo gw’okutebeza ogurukubanguhira nukwo bakatunga okusemererwa okurukukiraho?

Omuntu ow’akorra hamu kurungi n’abandi aikara ‘ayetekaniize kugaba.’ (1 Tim. 6:18) Yesu obwakaba n’akorra hamu na Ise aine kuba yakyetegeriize ngu atamusereke kintu kyona. Yahwe “obuyataireho iguru,” Yesu ‘akaba aroho,’ kandi akaba nasobora kumwegeraho. (Nfu. 8:27) Hanyuma, Yesu na uwe n’okusemererwa okwingi akabaganaho n’abegeswa be ebiyahuliire kuruga hali Ise. (Yoh. 15:15) Naitwe nitusobora kwegera ha kyokurorraho kya Yahwe kurabira omu kubagana n’abakozi bagenzi baitu amagezi hamu n’obukugu ebitutungire. Omuntu ow’akorra hamu kurungi n’abandi talengaho kulinda ekiikaro kye kurabira omu kubasereka ebintu ebimu ebibarukwetaaga kumanya, rundi ebisobora kubakonyera. Nikiija kumusemeza kugambira abandi ebintu ebirungi ebyayegere.

Naitwe tusemeriire kubagana n’abakozi bagenzi baitu amagezi hamu n’obukugu obututungire. Nitusobora n’okubaganaho ebigambo ebirukugarramu amaani n’abakozi bagenzi baitu. Tikitusemeza omuntu obw’arora amaani agatutairemu kandi akatusiima kuruga ha mutima. Yesu akatunga obwire kugambira abakozi bagenzi be ebirungi yabaroramuga. (Lengesaniza Matayo 25:19-23; Luka 10:17-20.) Kandi akabagambira ngu bakaba nibagenda kukora emirimo ey’erukukira eye obukooto. (Yoh. 14:12) Omu kiro Yesu obwakaba atakafiire akasiima abakwenda be abesigwa nagamba ati: “Ninywe mwaikaraga nanyowe omu [kulengwa] kwange.” (Luk. 22:28) Tekerezaaho omulingo ebigambo bye byabagarwiremu amaani kandi byabekambisa kugira ekibakoraho! Naitwe obututunga obwire tukasiima abakozi bagenzi baitu, hataroho kugurukyagurukya nibaija kutunga okusemererwa kandi byeyongere kwekamba.

Ow’oruganda Kayode n’agamba ati: “Omuntu arokukorra hamu kurungi n’abandi tarukwetaaga kuba ow’ahikiriire, baitu aleetera abandi okusemererwa kandi n’omulimo gwanguha. Oli mukozi wa mulingo ogu? Habwaki otekaguzaaho, bamu h’Abakristaayo abokora nabo kukugambira oli mukozi wa mulingo ki? Obubaraaba nibegondeza omu kukorra hamu naiwe nk’oku abegeswa ba Yesu baayegondiize omu kukorra hamu na uwe, naiwe n’osobora kugamba nk’omukwenda Paulo ayagambire ati: “Tuli bakozi batahi banyu, omu kusemererwa kwanyu.”​—2 Kol. 1:24.